2024 2023 2022 Flere år...
25-08-2006
Upernavimmi atuartunut angerlarsimaffik pillugu isumasioqatigiinnissaq
Upernavimmi atuartunut angerlarsimaffik pillugu isumasioqatigiinnissaq
Ukiorpassuarni Upernavimmi atuartunut angerlarsimaffissaaleqineq Inatsisartut Kultureqarnermut Ilinniartitaanermullu Ataatsimiititaliaata ajusaarnartutut isumaqarfigaa. Nunaqarfiit meerartaasa kommunimiit ukiumiit ukiumut allatut aaqqiinikkut inissarsiuunneqartarneri, kiisalu meeqqat taakku illoqarfimmi atuartunut sanilliullutik kingusinnerusukkut atuarnertik aallartittarmassuk ajorluinnarpoq.
Taamaattumik Ilinniartitaanermut, Ilageeqarnermut Ilisimatusarnermullu Naalakkersuisup Doris Jakobsenip sapinngisamik piaartumik isumasioqatiginnissamut ataatsimiititaliamit aggersarniarneqarpoq. Pissutsit qanoq innerannik ersarissaasoqarnissaa atuartunullu angerlarsimaffissap nutaap naammassineqarnissaata tungaanut Naalakkersuisunit kommuni qanoq ikiorserniarneqarnersoq tusarusullugu.
Paasissutissat annertunerusut Ataatsimiititaliap Siulittaasuanut Juliane Henningsenimut oqarasuaatikkut 48 81 48 pissarsiarineqarsinnaapput.