Nutaarsiassat

06-06-2006

Inatsisartut Attaveqaqatigiinnermut Ineqarnermullu Ataatsimiititaliaata ilaasortai Paamiuni

Inatsisartut Attaveqaqatigiinnermut Ineqarnermullu Ataatsimiititaliaata

ilaasortai ulloq juunip arfernanni 2006 Paamiuliarlutik umiarsuarmik aallarput

Inatsisartut Ataatsimiititaliaanni marlunni ilaasortat Paamiut qitiutillugit ulluni juunip arfineq-aappaani arfineq-pingajuannilu paasisassarsiorlutik angalanertik piviusunngortippaat.

Ilaasortat ataatsimiititalianut marlunnut ilaasortaanerat atorluarlugu Paamiut kommuniata isumassarsiorfiusumik ikiuunneratigut angalanermut pilersaarut imartooq ingerlatissavaat, Attaveqaqatigiinnermut Ineqarnermullu Ataatsimiititaliap Ilaqutariinnermullu Ataatsimiititaliap suliaqarfiinut tunngassutilinni ilaasortat paasisassarsiussammata.

Juunip arfineq-aappaani kommunip borgmesteria Lars Sørensen aningaasaqarnermullu Ataatsimiiti taliaq ataatsimeeqatigineqassapput. Suliffeqarfiit, sanaartukkat sullissiviillu ataatsimiititaliat ualikkut takuniassavaat, tamatumalu saniatigut nal. 19.00, unnukkut arfineq-marlunut, innuttat katersortarfimmi ataatsimiitinneqassallutik.

Ulloq juunip arfineq-pingajuat isumaginninnermut tunngassutillit immikkut nassuiaatigineqassapput, ullaap tungaagut Isumaginninnermut Ataatsimiititaliaq ataatsimeeqatigineqassammat. Ualeq illoqarfimmi sullissiviit arfinillit takuniarneqarnissaannut pilersaarusiorneqarsimavoq.

Paasisassarsiorneq naggaserlugu ulloq juunip qulingiluaat Inatsisartuni sulinerminnut atugassanik nunatsinni kommunit ilaannit paasisaqarluarsimallutik misilittakkanillu pissarsisimallutik umiarsuarmut ilaallutik ilaasortat Paamiuniit aallassapput.

Ilisimatitsissutigineqarsinnaavoq Inatsisartunut ilaasortat uku peqataammata:

Godmand Rasmussen, Atassut, siulittasoq, Inatsisartut Attaveqaqatigiinnermut Ineqarnermullu Ataatsimiititaliaat

Agathe Fontain, Inuit Ataqatigiit, Siulittaasoq, Inatsisartut Ilaqutariinnermut Ataatsimiititaliaat, Inatsisartullu Attaveqaqatigiinnermut Ineqarnermullu Ataatsimiititaliaannut ilaasortaq

Esmar Bergstrøm, Demokraatit Inatsisartut Attaveqaqatigiinnermut Ineqarnermullu Ataatsimiititaliaannut, Inatsisartullu Ilaqutariinnermt Ataatsimiititaliaannut ilaasortaq

Kim Kielsen, Siumut, Inatsisartut Attaveqaqatigiinnermut Ineqarnermullu Ataatsimiititaliaanni sinniisussaq.