Nutaarsiassat

04-09-2007

Sooq Uunartimi qulliit qaminneqassappat?

Uunartimi innaallagissiorfiup matuneqarnissaa Ittoqqortoormiut kommuniani  inuttut ingerlalluarnissamut aammalu sukisaarsaarnissamut periarfissanut qanoq iluaqusiisinnaasutut Naalakkersuisut isigaat?

Pineqartoq apeqqutillu allat itisileqqullugit Ilaqutariinnermut Ataatsimiititaliap Ittoqqortoormiunut paasisassarsiorluni angalareernermini Naalakkersuisunut apeqqutigilersaarpai.

Innuttaasut ingerlalluarnissaannut atugarissaarnissaannullu pingaaruteqartutut isigalugu Unnartip sukisaarsarfittut attatiinnarneqarnissaa Ittoqqortoormiut kommuniata maanna ilungersuutigaa. Uunarteq imigassartorfiunngitsoq imigassamik ajornartorsiutilinnik katsorsaanissamut periarfissaqarpoq aammalu meeqqanit inuusuttuaqqanillu atuarfimminngaanniit aallaarsimaarfigineqartarluni. Kommunip innuttaanit minnerunngitsumillu utoqqarnit Uunarteq asiartarfittut annertuumik atorneqartarpoq.

Kommunimi pissutsit pillugit Ilaqutariinnermut Ataatsimiititaliaq tikeraarnermini erseqqinnerusumik nassuiaaffigineqarpoq innuttaasut atugarisaasa inuunermilu naleqassutsip nukittorsarneqarnissaat anguniarluni piffissami sivisuumi kommunip siunnerfilimmik suliniuteqarnera iluatsilluartoq Ilaqutariinnermut Ataatsimiititaliap tikeraarnermini ersarissumik paasivaa. Tamanna ingerlaannaqqunaqaaq, kommunimili inuussutissarsiutitigut ineriartortoqarnissaa pisariaqarpoq, taamaaliornikkut suliffissaaleqisut amerliartuinnartut ikiliartortinneqarsinnaaqqullugit.

Aatsitassarsiorfeqalernissaq, takornariaqarneq pisuussutinillu uumassusilinnik annertunerusumik atorluarneq aammalu illoqarfiup qanitaani mittarfeqalernissaq ineriartornissamut taamaalillunilu  innuttaasut atugarissaarnerulernissaannut apeqqutaalluinnartuusutut kommunimit isigineqartut Ilaqutariinnermut Ataatsimiititaliamit ilisimaneqarpoq.

Tunitsiviup piaartumik ammaqqinneqarnissaanik Artic Greenfood A/S Ilaqutariinnermut Ataatsimiititaliamit kaammattorneqarpoq, taamaaliornikkut Namminersornerullutik Oqartussanut sullissinissamik isumaqatigiissut eqqortinneqarsinnaaqqullugu.

Illoqarfimmik innuttaanillu puigugassaanngitsumik paasisaqarfiulluartumillu naapitsinini assut qujamasuutigalugu Ilaqutariinnermut Ataatsimiititaliaq Ittoqqortoormiuniit aallaqqippoq.

Annertunerusumik paasisaqarusukkuit - Ilaqutariinnermut Ataatsimiititaliami ilaasortat uku attaveqarfigisinnaavatit:

Inatsisartunut ilaasortaq Emilie Olsen, Siulittaasoq, telefon: 34 62 58, mobil 52 86 64

Inatsisartunut ilaasortaq Ruth Heilmann, telefon: 34 62 30, mobil 52 08 05 

Inatsisartunut ilaasortaq Agathe Fontain, telefon: 34 62 26, mobil 48 45 31