2024 2023 2022 Flere år...
02-11-2007
Nunat Avannarliit Siunnersuisoqatigiivini 29/10 - 2/11-07 59-issaannik Oslomi Ataatsimiinnermi Inatsisartut peqataanerat
Ataatsimiinnerup nalaani aaqqissuinerit tangillit
Nunani avannarlerni suleqatigiinnerulernissamut periarfissaq
Nunat Avannarliit 59-issaannik Ataatsimiinnerat norskit inatsisiliortuini - Stortingimi - ilaasortat 87-iusut, Norgimeersut, Danmarkimeersut, Sverigimeersut, Finlandimeersut, Islandimeersut aammalu Ålandimi, Savalimmiuni Kalaallillu Nunaanni namminersortuneersut akornanni Augusta Salling inissaminut ingippoq.
Silap pissusaata allanngoriartorneranut akissutissat pillugit nunani avannarlerni naalakkersuisut illua tungerisaasalu siuttuisa akornanni aallarniutaasumik siuttut ataatsimiinnerisa ulluani siullermi Inatsisartunut ilaasortaq Augusta Salling najuuppoq.
Ataatsimiinnerit ulluisa aappaanni Augusta Salling oqallinnermi nammineerluni peqataavoq. Augusta Sallingip oqaasii tusagassiuutitigut nalunaarummut matumunnga ilanngullugit nassiunneqarput.
Ukioq manna ataatsimiinnermi suliassatut oqaluuserisassat amerlasuujupput, peqataasullu iliuuseqarnissartik piffissarlu oqaaseqarfissartik pingaarnersiortariaqarsimavaat.
Nunatsinnut atatillugu silap pissusai, silap pissusaata allanngoriartorneri taakkulu kingunerisaat piviusunut qanilluinnartuupput., taamaammallu nunani avannarlerni nunat nukittuumik ataatsimoortumillu avatangiisinut pitsaanerpaamik iliuuseqarsinnaanerat, taamaalillutillu silap pissusaata allanngoriartornerinut ataatsimoorlutik akiuiniarnissaat, Kalaallit Nunaata annertuumik soqutigisaraa.
Ataatsimoorluni ataatsimiinnerni partiillu politikikkut ataatsimiinnerini peqataanermi saniatigut Augusta Salling Miljø- og Naturressourcceudvalget, Avatangiisini Pinngortitamilu Isumalluutit pillugit Ataatsimiititaliap, ilaasortaaffigilikkami ataatsimiinnerani siullermi peqataavoq.
Avatangiisini Pinngortitamilu Isumalluutit pillugit Ataatsimiititaliap ataatsimiinnerani Alberts-lundip kommunianeersut sinniisutut qaaqquneqarsimapput. Tamanna pivoq Nunat Avannarliit Pinngortitamut Avatangiisinullu unammineranni taanna ajugaasutut nersorniarneqarmat.
Avatangiisinut naalakkersuinikkut anguniakkat sinniisuutitat meeqqat isaannit isigalugu kommunimi meeqqeriviit 87-it tamarmik ataasiakkaarlutik, puiornaguli inersimasut avatangiisinut akisussaasuunerat, meeqqat ulluinnarni ingerlanerannut avatangiisit ilaatittaraat paasissutissiissutigaat.
Tassunga tulliullugu Qallunaat Aallartitaannut, Kalaallit Nunaata Savalimmiullu tamarmik immikkut marlunnik ilaasortaqarfianni, ileqquulersimasutut aallartitat ataatsimiinnerinut ataatsimiigiaqqusisoqarpoq.
Paasisaqarnerujumasut Inatsisartunut ilaasortaq Augusta Salling, mobil (00299) 55 03 10 attavigisinnaavaat.