2024 2023 2022 Flere år...
28-05-2008
Ulluni 27.-29. maj 2008-mi Qalasersuaq pillugu ataatsimeersuarnermi Inatsisartut Nunanut Allanut Sillimaniarnermullu Ataatsimiititaliaannit aallartitat peqataassapput.
Ataatsimeersuarneq nunanit tamalaanit annertuumik eqqumaffiginiarneqarpoq, tassami USA-mit, Norgimit, Canadamit, Ruslandimit, Kalaallit Nunaannit Danmarkimiillu ministerit aallartitallu ataatsimeersuarnermi peqataassammata. Taamaalillunilu nunat Qalasersuup qanittuaniittut tamarmik aggersarneqarput.
Apeqqutit pissutsillu amerlasuut Qalasersuarmut attuumassutillit pillugit nunanik peqataasumik oqaloqatigiissutiginerisa attatiinnarneqarnissaa qulakkeerniarlugu taamatut ataatsimeersuarneq periutsitut eqqortuunerarlugu Naalakkersuisut siulittaasuata Hans Enoksenip aammalu Nunanut Allanut ministerip Per Stig Møllerip oqaatigisaat Inatsisartunut ilaasortanit peqataasunit isumaqatigineqarpoq. Ajornartorsiutit ataatsimut aaqqiiviginiarlugit ukiuni aggersuni amerlasuuni iliuuserisassanut sammivigitinneqartussaq ataatsimeersuarnermi qularutissaanngitsumik ilusilersorneqarlunilu aalajangersarneqassaaq.
Assersuutigalugu sumiiffimmi angallannermut, sumiiffimmi avatangiisinik illersuinermut pisuussutinillu uumassusilinnik aqutsinermut malittarisassiornissaq pillugu suliamik ilisimasaqarluni kinguneqarluartussamillu oqaloqatigiinnissamik Qalasersuarmi sikup sukkasuumik aakkiartornera pisariaqalersitsivoq, tamatumani pineqarsinnaallutik uuliaqarsinnaanera, gasseqarsinnaanera, aatsitassaqarsinnaanera, imermik isumalluutit imaluunniit pisuussutit uumassusillit.
Qalasersuaq pillugu maannakkut paasissutissanik ullumikkumut tunngassuteqarnerusunik ajornartorsiutinillu susassaqartunik ataatsimeersuarneq Inatsisartut Nunanut Allanut Sillimaniarnermullu Ataatsimiititaliaannit aallartitaat pissarsiviuvoq.
Tamatuma saniatigut pisortatigoortuunngitsumik oqallinnerit aqqutigalugit nunat akornanni oqaloqatigiinnerit siuarsarneqarnissaannut, tassunga ilanngullugu nunanit tamalaanit aallartitanik peqataasunik attaveqarnerup attatiinnarnissaanut annertusarneqarnissaanullu Inatsisartunut ilaasortanut peqataasunut ataatsimeersuarneq periarfissatsialaasimavoq.
Annertunerusumik paasisaqartoqarusukkuni oqaaseqartoqarusukkunilu Inatsisartunut ilaasortat peqataasut oqarasuaatikkut attavigineqarsinnaapput.
Thomas Kristensen, Inatsisartut Nunanut Allanut Sillimaniarnermullu Ataatsimiititaliaanni siulittaasoq +299 59 84 26.
Marie Fleischer, Inatsisartut Nunanut Allanut Sillimaniarnermullu Ataatsimiititaliaanni ilaasortaq +299 48 45 25.
Johan Lund Olsen, Inatsisartut Nunanut Allanut Sillimaniarnermullu Ataatsimiititaliaanni sinniisoq +299 55 54 85.