2024 2023 2022 Flere år...
01-07-2008
Qanimut suleqatigiinnissaq ataqatigiissaarinissarlu pillugu kissaateqarneq
Nunat Avannarliit Killiit ataatsimeersuarneranni Ministerit Inatsisartunullu ilaasortat, Nunat Avannarliit killiit imaatigut annaassiniartarnermi pisortaat tamarmik, Norgimiit, Sverigimiit Danmarkimiillu, ilinniagaqarsimasut immikkullu ilisimasallit, katillugit inuit 50-t sinnerlugit peqataapput.
Savalimmiuni, Kalaallit nunaanni, Islandimi Norgimilu imaatigut annaassiniartarnermut kiisalu nunat pineqartut imaatigut annaassiniartarnermi piginnaasaannut tunngatillugu ullumikkut pissutsit qaqilerneqarput. Suleqatigiinnissamut isumaqatigiissutit kiisalu pineqartuni ataatsimoorluni imaatigut annaassiniarnermut sungiusarnerat qimerloorneqarput.
Atlantikup Avannaani ataavartumik sillimasoqarnissaanut annaassiniarnermilu upalungaarsimasoqarnissaanut atatillugu Nunani Avannarlerni Killerni tamani immamik avatangiisilinnit soqutigineqarnera ersarissoq peqataasunit isumaqatigiissutigineqarpoq, nunani pineqartuni sillimaniarnerup nukittorsarneqarnissaanut imaatigut annaassianiartarnermut atatillugu annertunerusumik suleqatigiittoqarnissaa pingaaruteqarpoq.
Umiarsuit ilaasunik-, assartugassanik- ikummatissanillu angallassissutit angisuut nunani pineqartuni ukiuni kingullerni amerleriarujussuarsimapput siunissamilu amerliartuinnartussaallutik. Angalanerup tamatuma annertusiartornera ilutigalugu imaatigut annaassiniarnermi piginnaasat sullissinerillu patajaallisarneqarnissaat annertuumik pingaaruteqartoq oqaatigineqarpoq.
Imaatigut sillimaniarneq pillugu apeqqutit suliarineqartillugit sammivinnit marlunnit isigalugu suliarineqartarnissaa ataatsimeersuarnermi oqaatigineqarpoq: Sillimaniarnerup annertusarnissaanut suut pitsaaliuinermi suliniutaassanersut, ajutoortoqartillugulu sillimaniarnermi atortut piareersimasussat qanoq pitsanngorsarneqarsinnaanersut.
Pitsaaliuinermi sulissutigisassatut atorneqarsinnaasut suliniutigineqarsinnaasut arlallit siunnersuutigineqarput. Nunani Avannarlerni Killerni sinerissamut qanittumi angalatilluni umiarsuarni takornariartaatini umiarsuarnilu assartuutini nunap immikkoortuini ilisimasalinnik umiarsuarmiittoqartarnissaa nunallu immikkoortuini immap assingi nutarterneqarnissaat ilaatigut siunnersuutigineqarpoq. Sumi angalanissaq akuerisaanersoq sumiiffiillu ilaanni imaatigut aqqutit ulorianaateqarsinnaasuni inerteqquteqalernissaq malittarisassiuunneqarsinnaapput.
Tamatuma saniatigut Nunani Avannarlerni Killerni annertunerusumik isumasioqatigiittoqarnissaa nunallu immikkoortuini angalanernut tunngatillugu ataatsimoorussamik amerlanerusunik malittarisasiortoqarnissaa kiisalu nunat tamalaat akornanni malittarisassiortoqarnissaa nunallu tamalaat imartaanni angalasinnaaneq pillugu ataatsimut malittarisassiortoqarnissaa isumaqatigineqarluinnarpoq.
Naak annaassiniarnermik upalungaarsimanissamik pisariaqartitsisoqanngisaannarnissaanik neriuuteqartoqaraluartoq ajutoortoqartillugu sillimasoqartoqartariaqartoq ataatsimeersuarnermi inerniliunneqarpoq. Suleqatigiinnerup, isumasioqatigiittarnerup ataqatigiissaarinerullu kiisalu nunat tamalaat Nunallu Avannarliit Killiit akornanni imaatigut annaassiniartarnermi ataatsimoorluni sungiusartarnerit nukittorsarneqarnissaa kiisalu Atlantikulli Avannaani anguniakkap tamatuma angunissaanut amerlanerusut peqataasinnaanerat isumaqatigilluinnarneqarpoq.
Ataatsimiinnermit inerniliunneqartut oqaluuserineqartullu Nunat Avannarliit Killiit Siunnersuisoqatigiivisa iluminni suliarisussanngorpaat, kingornalu augustip qaammataani Nunat Avannarliit Killiit Naalakkersuisuisa Siunnersuisoqatigiiffimmi ukiumoortumik ataatsimiinnissaannut kaammatuutinik saqqummiussissallutik.
Siullermeerutaasumik sungiusaqatigiinneq
Nunat Avannarliit Killiit Siunnersuisoqatigiiffiata sammisaqarluni ataatsimeersuarnermik aaqqissuussineranut atatillugu siullermeerutaasumik Savalimmiuni Islandimilu nammineq piumassutsimik annaassiniartartut, MRCC. Torshavnimiit, Savalimmiuni Upalungaarsimanissamut Oqartussaat, Savalimmiuni Sakkutooqarfik Islandimilu Sinerissamik Nakkutilliisoqarfiup sungiusaqatigiinnermik misileraapput.
Imaatigut annaassiniartarneq nunakkullu annaassiniarnermik sungiusarneq eqqartorneqarput. Inatsisartunut ilaasortat, Naalakkersuisut ataatsimeersuarnermilu peqataasut allat umiarsuarmi Sæbjörgimi Landsbjörgimit Islandimi Nammineq piumassutsiminnik upalungaasimanissamut peqatigiiffimmit pigineqartumit pisuusaartitsinermi peqataapput. Umiarsuaq angallatinit arlalinnit annaassiniarnermilu atortunik allanik ilalerlugu Islandimiit Savalimmiunut ingerlaartinneqarpoq.
Sungiusarneq ingerlanneqarpoq ¿Fantasy¿ Nólsoyarfirðimi umiarsuup maskiinaqarfiani ikuallattoqalerneratigut, maskiina unitsinneqarpoq ajoqusersimasut ilaasullu annanniutinukaassorneqarlutik.
Sungiusarneq iluatsilluarpoq pikkorilluinnartumillu ingerlanneqarluni kiisalu nunani tamalaaneersut peqataaffigisaanni sungiusarnermi peqataasut ataqatigiissaarneqarsimanerat naalakkersuinermik sulialinnit tupigusuutigineqarluni.
Peqataasut taakku tamarmik ataatsimoorlutik sungiusaqatigiinnerat siullermeerutaasoq oqaluttuarisaanermi pingaaruteqarpoq. Nunani Avannarlerni sungiusarnermut atatillugu annaassiniarnermi upalungaarsimanermi ataqatigiissaarinermullu atatillugu suleqatigiinnerup nukittorsarneqarnissaanut sukumiisumik alloriartoqareersimasoq ataatsimeersuarnermi peqataasut ilaannit isumaqatigilluinnarneqarpoq.
Pisut allat
Ataatsimeersuarnermi pilersaarut ilanngunneqarpoq.
Nunat Avannarliit Killit Siunnersuisoqatigiivi Kalaallit Nunaanni Inatsisartut, Savalimmiuni Lagtingip Islandillu Altingiata akornanni pisortatigoortumik suleqatigiiffigaat. Siunnersuisoqatigiiffiup Siulittaasoqarfia inuttai tassaapput Karl V. Matthíasson Islandimi Altingimi ilaasortaq aamma siulittaasup tullia Kári P. Højgaard Savalimmiuni Lagtingimut ilaasortaq aamma Ruth Heilmann Kalaallit Nunaanni Inatsisartut siulittaasuat.
Sammisaqarluni ataatsimeersuarneq pillugu annertunerusumik paasisaqarusukkuit: Siunnersuisoqatigiiffiup allattaanut Thordur Thorarinssonimut, tlf. 00354 563 0731, vestnordisk@althingi.is saaffiginnissinnaavutit.
Ataatsimoorluni sungiusaqatigiinneq pillugu annertunerusumik paasisaqarusukkuit: Upalungaarsimanissamut ataqatigiissaarisumut Rógvi Finnsson Johansenimut, Savalimmiuni Upalungaarsimanissamut Oqartussanut, 00298 236616, rogvi@mrcc.fo saaffiginnissinnaavutit.