2024 2023 2022 Flere år...
26-09-2008
Nunat Avannarliit Siunnersuisoqatigiivini ataatsimiinnermi peqataaneq ulloq 23.-24. september 2008 Reykjavikimi, Islandimiittumi
Tamatuma kingorna Finlandip illoqarfiisa pingaarnersaanni, Helsingsforsimi ulluni 27.-29. oktober 2008-mi ataatsimiinnerup ingerlanneqalinnginnerani Avatangiisinut Pinngortitamilu Isumalluutit pillugit Ataatsimiititaliami ataatsimiititaliap ataatsimiinnerani naggataarutaasumik Augusta Salling peqataavoq.
Qitiusumik allaffeqarfiup avatangiisinut nukissaqarnermullu artukkiisarnerannik ungasinnerusoq isigalugu annikillisitsisinnaasumik Inatsisartut, Naalakkersuisunik suleqateqarlutik nunami namminermi avatangiisinut naalakkersuinikkut anguniagassamik suliaqarsinnaasariaqarnerat pillugu Augusta Salling Inatsisartut Siulittaasoqarfianni oqaluuserineqarsinnaasumik siunnersuummut saqqummiunneqarsinnaasumut isumassarsisimalluni Islandimi ataatsimiinnermit uterpoq. Avatangiisinik atukkiinnginnerusumik pissusilersorlutalu periuseqartarnissatsinnik qulakkeerisuusumik suliniutit ilaannut Inatsisartut peqataasarnissaat tunngaviusumik pingaaruteqartuusoq Augusta Salling isumaqarpoq. Inatsisartut ataatsimiinnerini pappiaqqanik atuinerup qanoq killilersimaarneqarnissaanut anguniakkanik aalajangersimasunik assersuutigalugu aalajangersaasoqarsinnaasoq ersarippoq. Taamatuttaaq qitiusumik allaffeqarfimmi nukissamik atuineq appartinneqarsinnaavoq qulliit peeriinik sipaarutitalinnik assigisaanillu takussutissalimmik atuinikkut.
Annertunerusumik paasisaqarusuttut Inatsisartunut ilaasortaq Augusta Salling attavigineqarsinnaavoq uunga mobil 55 03 10.
Nunat Avannarliit Siunnersuisoqatigiivi nunat avannarliit tallimat akornanni Inatsisartoqarnikkut suleqatigiiffigaat: Norge, Sverige, Danmark, Island aamma Finland kiisalu namminersornerusoqarfiit pingasut, Åland, Savalimmiut aammalu Kalaallit Nunaat. Nunat Avannarliit Siunnersuisoqatigiivi 87-inik ilaasortaqarput, taakkunannga marluk Kalaallit Nunaata Inatsisartuineersuullutik.