2024 2023 2022 Flere år...
28-10-2008
Umiarsuit nunatsinneersut ikummatissamik atuinertik 5-10 %-mik annikillisissinnaavaat?
Nunat Avannarliit Siunnersuisoqatigiivisa 2008-mut Ukiumoortumik Avatangiisinut Akissarsiarititaannik pissarsisussaq siunnersuutitut inassutigineqartut 37-it akornannit nanineqarpoq.
Nukissiuutinik atuinermik silallu pissusaanut imarsiornikkut mingutsitsinermik annikillisitsisinnaasutut qarasaasiakkut atortunik inerisaasimanermut akissarsisitsisoqarpoq.
Tassunga assersuutigalugit ilaapput angallatit aalisariutit, umiarsuit ilaasartaatit, umiarsuit nakkutilliissutit, umiarsuit containerinik assartuutit allallu. Oktobarip ulluisa 28-anni 2008 akissarsiassaq kr. 350.000-nik aningaasartalik Helsingforsimi tunniunneqassaaq.
Inatsisartunut ilaasortaq Augusta Salling oqaaseqarpoq: "Sullivimmut aalajangersimasumut ussassaarissanngilanga, ippassarli Avatangiisinut Pinngortitamullu ataatsimiititaliami ilaasortanik ataatsimeeqateqarnermi Dr. Jon Agust Thorsteinsson-imik naapitsinermi umiarsuit orsussamik atuinerisa 5-10 % akornanni annertussusilimmik annikillisinneqarnissaannik atortunik periutsinillu inerisaanermik suliaqarnerata tunuliaqutaanik nassuiaanera eqqarsalersitsivoq." "Inuussutissarsiutinut suliniutit taamaattut ataatsimut isigalugu ingerlatsinikkut iluaqutissanik pilersitsisinnaanersut, Namminersornerullutik Oqartussat avatangiisinut suliniutaannut avatangiisinillu illersuinernermut patajaallisaasinnaanersut qularutissaanngitsumik misissugassaqqissuuvoq," Augusta Salling naggataatigut oqarpoq.
Umiarsuit ataasiakkaat orsussamik atugaasa pitsaassusiat periusiusup ilanngullugu nalunaarsortaraa Dr. Thorsteinsson-ip ataatsimiinnermi ilanngullugu ilisimatitsissutigaa. Periuseq Nunani Avannarlerni orsussamik 3 mio. tonsimik annikilliliinermik maannamut nassataqarsimasoq Dr. Thorsteinsson missingiivoq, tassungalu ilanngussassaallutik orsussamik annikinnerusumik atuinerup kingunerisaatut silaannarmut mingutsitsinermik, CO² -mik, annikinnerusumik aniatitsisoqartartoq.
Nunani Avannarlerni Siunnersuisoqatigiit Avatangiisinut Pinngortitamullu Ataatsimiititaliaanni ullormut ataatsimiinnermit paasisaq aalajangersimasoq tamanna tunngavigalugu Inatsisartut ataatsimiititaliaata susassaqartup, Naalakkersuisut inuussutissarsiutinullu peqataasut nukissiuutitigut atuilluarnerunissamut, orsussamik atuinikinnerunissamut CO² -millu nunatsinni umiarsuit aniatitsinerata annikillisinneqarnissaanut periarfissat erseqqinnerusumik misissorneqassasut Augusta Sallingip kaammattuutigaa.
Paasissutissanik annertunerusunik pissarsiumasut inatsisartunut ilaasortaq Augusta Salling, oqarasuaat angallattagaq (+299) 55 03 10, attavigisinnaavaat.
Nunani Avannarlerni Siunnersuisoqatigiit nunanit Norgemit, Danmarkimit, Sverigemit, Finlandimit, Islandimit nunanillu namminersornerusunit, Ålandimit, Savalimmiunit Kalaallillu Nunaannit 87-nik ilaasortalittut suleqatigiiffiuvoq.
Nunani Avannarlerni Siunnersuisoqatigiinnut Inatsisartut marlunnik ilaasortaatitaqarlutillu marlunnik sinniisussaqarput.
Inatsisartunut ilaasortat Augusta Salling Atassummiit, Josef Motzfeldtilu Inuit Ataqatigiinniit ilaasortaapput, taakkulu nammineerlutik sinniisussaraat inatsisartunut ilaasortaq Lars Emil Johansen, Siumumiit, inatsisartunullu ilaasortaq Ane Hansen, Inuit Ataqatigiinniit. Augusta Salling aamma Lars Emil Johansen Avatangiisinut Pinngortitamullu Ataatsimiititaliamut attuumassuteqarput, aammalu Josef Motzfeldt Ane Hansenilu Kultureqarnermut Ilinniartitaanermullu Ataatsimiititaliamut attuumassuteqarlutik.