2024 2023 2022 Flere år...
29-10-2008
2009-mi aningaasanut inatsisissatut siunnersuummik Aningaasaqarnermut Ataatsimiititaliap suliarinninnerani killiffik
Allannguutissatulli siunnersuutit taakku kalaallisoortaat Aningaasaqarnermut Ataatsimiititaliamut ullumi nal. 10.30 aatsaat nassiunneqarput. Pineqartut tassaapput allannguutissatut siunnersuutit 50-it sinneqartut, taamaalillunilu taakku suliarinissaat ataatsimiititaliamit aatsaat aallartinneqarsinnaanngorluni.
Taakku saniatigut allannguutissatut siunnersuutinik allanik 140-nik Naalakkersuisut arfininngornermi ulloq 25. oktober unnukkut nassiussipput. Allannguutissatut siunnersuutit taakku suliarinissaat ataatsimiititaliamit suli periarfissaqarfigineqarsimanngilaq.
Taamaalillunilu aningaasanut inatsisissatut siunnersuutip aappassaaneerneqarnissaanut ataatsimiititaliap isumaliutissiissutiminik naammassinninnginnermini allannguutissatut siunnersuutit
200-rujungajaat misissoqqaartariaqarpai.
Aningaasanut inatsisissatut siunnersuutip taamatullu allannguutissatut siunnersuutit sukumiisumik suliarineqarnissaat Aningaasaqarnermut Ataatsimiititaliamit pingaartinneqarmat, tamatuma kingunerisaanik ataatsimiititaliap isumaliutissiissutini pilersaarutaaqqaartutut ulloq 31. oktober naammassisinnaanngilaa.
Taamaattumik 2009-mi aningaasanut inatsisissatut siunnersuutip aappassaaneerneqarnissaata tallimanngornermut ulloq 7. novemberimut kinguartinneqarnissaa ataatsimiititaliap Inatsisartut Siulittaasoqarfiannut qinnutiginiarpaa. Tamatuma kingunerisaanik aappassaaneerinissamut Aningaasaqarnermut Ataatsimiititaliap isumaliutissiissutaa ulloq 4. november ualikkut tamanut saqqummiunneqassasoq naatsorsuutigineqarpoq.
Ataatsimiititaliaq sinnerlugu
Augusta Salling
Aningaasaqarnermut Ataatsimiititaliap siulittaasua