2024 2023 2022 Flere år...
19-12-2008
Inatsisartut taasisarnermut maleruagassaannik unioqqutitsinerit: Inatsisartut Siulittaasoqarfiata inaarutaasumik oqaatigiumasai.
Taamaakkaluarpalluunniilli allanik taasissussineq Inatsisartut Suleriaasiannik taamatullu Inatsisartut Naalakkersuisullu pillugit inatsisartut inatsisaannik unioqqutitsinerummat qularutissaanngilaq.
Inatsisartulli Suleriaasianni Inatsisartulluunniit Naalakkersuisullu pillugit inatsisartut inatsisaanni maleruagassat unioqqutinneqarpata "pillaanissamut" periarfissaqartoqanngilaq.
Taamaammat ilaasortat inatsisartut ataatsimiittarfianni najuutinngitsut sinnerlugit taasinerit pinerluttulerinermut inatsimmik unioqqutitsinerunersut Inatsisartut Siulittaasoqarfiata inatsisilerituumut nalilersissimavai. Immikkut ilisimasalik inatsisilerinikkut misissueqqullugu qinnuigineqartoq tassaavoq Leif Senholt, kalaallini pinerluttulerinermut inatsimmik immikkut ilisimasalik "nunatsinnilu pinerluttulerinikkut eqqartuussisarneq" pillugu inatsisilerinikkut quppersakkamik atuakiortuusoq.
Misissuinermi inerniliisoqarp oq inatsisartunut ilaasortaq allanik taasissussisimasoq pinerluttulerinermut inatsimmi aalajangersakkanik unioqqutitsisisutut eqqartuunneqassasoq ilimagineqarsinnaanngitsoq.
Kalaallit Nunaannut Politimesteri suliamut akuleruteqqullugu qinnuigineqarnissaa tamanna tunngavigalugu siunertaqanngitsoq Inatsisartut Siulittaasoqarfiat isumaqarpoq.
Immikkut ilisimasalittut Siulittaasoqarfiup atugaata eqqartuussisoqarnissaanik naliliineranit allaasumik periarfissaqartoq politiit unnerluussisorlu naliliissagaluarpata suliamik politiit nammineerlutik suliniuteqarlutik misissuinissaat tamatuma akornusissanngilaa. Aamma allat Siulittaasoqarfiup aalajangigaanik naammaginninngitsut politiinut nammineerlutik tunniussinissaat tamatuma akornusissanngilaa.
Taasinermi maleruagassanik unioqqutitsinertut pisut sakkortuumik uparuassallugit Inatsisartut Siulittaasoqarfiat pissutissaqarpoq. Suliassaq suliamut akuusunut allatigut kinguneqaateqassanersoq Inatsisartut Siulittaasoqarfiata oqartussaaffiginngilaa, tamannalu qinersisartut naggataatigut aalajangigassarissallugu.
Inatsisartut taaseriaasiannik elektroniskiusumik maleruagassanik unioqqutitsilluni atuineq pillugu siusinnerusukkut ilisimatinneqarsimanissartik Siulittaasoqarfimmi ilaasortat aamma kissaatiginartissimagaluarpaat.
Inatsisartunut ilaasortat allanik taasissussisarsimanerat, ataatsimiinnermillu aqutsisoq nutaamik taasisitseqqullugu ingerlatiinnarlugu qinnuiginagu ilaasortat allat tamatuminnga takunnittuunerat Inatsisartut isigineqarnerannik qularutissaanngitsumik ajortisaarisuusimavoq, Inatsisartullu ukiakkut ataatsimiinnerata ingerlarnganik ajornakusoortitseqataasimalluni. Tamatumunnga aamma ilanngutassaapput inuttut pilliuteqaatit ¿ kikkummi tamarmik namminneq pisuullutik nammineerlutilluunniit piumassuserinngisaminnik ¿ akuutinneqarmata. Suliaq taamaattoq tamatta pinngitsoorusussimagaluaqaarput, taamatullu pisoqaqqinnissaa kialuunniit kissaatiginagu.
Taamaammat Inatsisartut Siulittaasoqarfiata taasisarnermut maleruagassat malinneqaqqullugit erseqq issaqqippaa.
Inatsisartullu Siulittaasoqarfiat ilitsersueqqippoq, taamaalillunilu maleruagassanut akerliusumik taasisitsinermut atortut ingerlaannartumik paasineqanngitsumik atoqqinneqarnissaat ilimanarunnaarluni.
Aammattaaq Inatsisartut ¿ Siulittaasoqarfiup sulissutigisaanik ¿ Inatsisartut Suleriaasiat ukiut nikinnerannit atuutilersussamik allannguuteqartippaat. Allannguut taanna atorlugu natsisartunut ilaasortaq pineqartoq Inatsisartut pissuserissaarnermut maleruagassaannik sualuttumik unioqqutitsippat ullut ataatsimiiffiit 14-t tikillugit sivisussusilimmik Inatsisartut ilaasortaat ataatsimiinnerni peqataaqqusaajunnaarsissinnaavaa. Inatsisartunut ilaasortaq peqataaqqusaanngitsoq piffissami peqataanngiffimmini aningaasarsiaqartinneqassanngilaq.
Sulianik taamaattunik Inatsisartut piffissami aggersumi naammattuueqqissanngitsut tamanna tunngavigalugu Siulittaasoqarfik neriuuteqarlunilu naatsorsuuteqarpoq.
Inatsisartut Siulittaasoqarfiat sinnerlugu
Ruth Heilmann
Inatsisartut Siulittaasuat