2024 2023 2022 Flere år...
25-11-2008
Arctic Green Foodip tusagassiorfinnut nalunaarutaanut Aningaasaqarnermut Ataatsimiititaliap oqaaseqaatai
Eqqortormi tassaammat 2009-mi aningaasanut inatsisissatut siunnersuummik suliarinninnermut atatillugu AGF-ip tunisassiorfiini 2009-mit 2012-imut ukiumoortumik sipaaruteqartarnissaq, sipaarutissat ataatsimoortut 2008-mi oktoberip qiteqqunnerani ilusilersorneqarlutillu tamanut saqqummiunneqartut ilaatut Naalakkersuisut namminneerlutik siunnersuutigimmassuk. Naalakkersuisut aalajangersimasumik siunnersuutigaat aningaasaliissutit 2011 ilanngullugu ukiut tamaasa annertuumik ikilisinneqartarnissaat, taamaalillunilu 2012 aallarnerfigalugu aningaasaliissutit peerneqavinnissaat.
Naalakkersuisut sipaarutissatut siunnersuutaat Aningaasaqarnermut Ataatsimiititaliamit isumaqatigiittumit taperserneqarpoq. Tamatuma saniatigut aningaasaliissutit siunnersuutigineqartutut ikilisinneqarnissaat Naalakkersuisut siunnersuutigisaannit sukkanerusumik pissasoq Aningaasaqarnermut Ataatsimiititaliamit siunnersuutigineqarpoq.
Aningaasanut inatsisissatut siunnersuutip pingajussaaneerneqarnerani allannguutissatut siunnersuutit taakku Inatsisartunit isumaqatigiittunit akuersissutigineqarput.
Taamaalillunilu tunisassiorfinnik ingerlatsinermut tapiissutit ikilisinneqarnissaat naggataatigullu peerneqarnissaat Inatsisartunit Naalakkersuisunillu tamakkiisumik isumaqatigiiffiuvoq.
Suliffeqarfiup Namminersornerullutik Oqartussat eqqartuussivimmut suliassanngortilersaarai tusagassiorfimmut nalunaarummini AGF-ip oqaatigaa. Tamanna tunngavigalugu suliffeqarfiup Namminersornerullutik Oqartussanut piumasaqaatigisinnaasatut piginnaatitaaffigisatullu isumaqarfigisinnaasai pillugit tamanut ammasumik oqallinnermi peqataanissaq Aningaasaqarnermut Ataatsimiititaliamit kissaatigineqanngilaq.
Sipaarutissat taakku Namminersornerullutik Oqartussat isumaqatigiissutigisimasaannut kalluaanngitsumik ingerlanneqarsinnaanerat qularutigineqarsinnaasimappat AGF-ip ingerlatsineranut tapiissutit sipaarutigineqarnissaat Naalakkersuisut Inatsisartunut siunnersuutigisimassanngikkaluaraat upperigini ataatsimiititaliap oqaatigissavaa. Tassunga atatillugu eqqaasitsissutigineqartariaqarpoq AGF-imut sullissinissamik isumaqatigiissut maanna atuuttoq 2009-mi januarip naanerani atorunnaartussaammat.
Kiisalu 2009-mi aningaasanut inatsit tassanilu pingaarnersiuilluni tulleriiaarinerit Inatsisartunit ulloq 14. november 2008 akuersissutigineqarmata paasissutissiissutigineqassaaq. Taamaattumillu aningaasaliissutit pingaarnersiuillunilu tulleriiaarinerit Inatsisartunit akuersissutigineqartut maanna allanngortinneqarsinnaanngillat. Tamatumalu kingorna aningaasaliissutit eqqortinneqarnissaannik qulakkeerinissaq Naalakkersuisut suliassarilerpaat.