Nutaarsiassat

28-10-2008

Ulluni oktobarip 27-anit 29-anut 2008 finlandmiut illoqarfiisa pingaarnersaanni Helsingforsimi Nunat Avannarliit Siunnersuisoqatigiivisa Ataatsimeersuarneranni Inatsisartut sinniisuutitaat peqataassapput.

Ataatsimiinnerit aaqqissuussallu finlandimiut inatsisiliortuini; Eduskuntami, ingerlanneqassapput.

 

Nunat Avannarliit Siunnersuisoqatigiivini Avatangiisinut Pinngortitamullu Ataatsimiititaliamut Augusta Salling ilaasortaavoq, Josef Motzfeldtilu Kultureqarnermut Ilinniartitaanermullu Ataatsimiititaliamut.

 

Ataatsimeersuarnermi naalakkersuisut illua tungiusullu siuttui oktobarip ulluisa 28-ani 2008 naapeqatigiippata Nunarsuarmi tamarmi aningaasaqarnikkut ajornartoorneq pingaarutilittut sammineqassaaq.

 

Ataatsimeersuarnermut akuliullugit nunatta peqataatitaasa peqataaffigisinnaasaattut aaqqissuussat pingasut ingerlanneqassapput:

• Avannaanut Suliniummut tunngatillugu inatsisiliortut immikkoortukkaarlutik oqallinnerat ingerlanneqassaaq, taannalu Ruslandip, Islandip Norgillu EU¿mik suleqateqarnerannut taaguutaalluni.
• Nunani avannarlerni oqaatsinut tunngatillugu immikkoortukkaarluni oqallinneq. Oqaatsit sorliit atorlugit siunissami nunani avannarlerni suleqatigiinneq ingerlanneqassava?
• Ima qulequtalimmik immikkoortukkaarluni oqallinneq ingerlanneqassaaq; Kikkut Østersøen annaatissavaat?

Avannaanut Suliniummut EU¿p naalakkersuinikkut anguniagaanut tunngatillugu naalakkersuinikkut suliniutit erseqqinnerusumik imarisaannik immikkoortukkaarluni oqallinnermi, nunat assigiinngitsorpassuit sinniisuutitaasa ilaannai taallugit, peqataassapput EU-mi, Sverigemi, Danmarkimi, Norgemi, Finlandimi, Ruslandimi, Savalimmiuni, Estlandimit, Letlandimi, Polenimi, Kalaallit Nunaanni Islandimilu inatsisartunut ilaasortat.

 

Nunani Avannarlerni Siunnersuisoqatigiit nunanit Norgemit, Danmarkimit, Sverigemit, Finlandimit, Islandimit nunanillu namminersornerusunit, Ålandimit, Savalimmiunit Kalaallillu Nunaannit 87-nik ilaasortalittut suleqatigiiffiuvoq.

 

Nunani Avannarlerni Siunnersuisoqatigiinnut Inatsisartut marlunnik ilaasortaatitaqarlutillu marlunnik sinniisussaqarput. Inatsisartunut ilaasortat Augusta Salling Atassummiit, Josef Motzfeldtilu Inuit Ataqatigiinniit ilaasortaapput, taakkulu nammineerlutik sinniisussaraat inatsisartunut ilaasortaq Lars Emil Johansen, Siumumiit, inatsisartunullu ilaasortaq Ane Hansen, Inuit Ataqatigiinniit. Augusta Salling aamma Lars Emil Johansen Avatangiisinut Pinngortitamullu Ataatsimiititaliamut attuumassuteqarput, aammalu Josef Motzfeldt Ane Hansenilu Kultureqarnermut Ilinniartitaanermullu Ataatsimiititaliamut attuumassuteqarlutik.

 

Paasissutissanik annertunerusunik pissarsiumasut inatsisartunut ilaasortaq Augusta Salling, oqarasuaat angallattagaq (+299) 55 03 10 aamma Josef Motzfeldt, oqarasuaat angallattagaq (+45) 24 42 34 06 attavigisinnaavaat.