2024 2023 2022 Flere år...
21-04-2008
Nunat Avannarliit Siunnersuisoqatigiiffiata ulluni 14. ¿ 15. april 2008-mi Norgemi Stavangerimi ataatsimiinnerani Inatsisartut peqataatitaqarput
Partiit naalakkersuinermik suliaqartut ataatsimiinneranni ataatsimiititaliallu ataatsimiinneranni peqataanerup saniatigut assartueriaatsit nukinnik atuinikinneruffiusut CO2-millu aniatitsinikinnerusut pillugit isumasioqatigiinnermi pissanganartumi ullutsinnilu oqallisaasumi Inatsisartunut ilaasortat peqataapput. Isumasioqatigiinnermi siunnersuutit nunat avannarliit pineqartoq pillugu suleqatigiinnerannut siuarsaataasinnaasut saqqummiunneqarlutillu oqallisigineqarput.
Stavangerip norskit uuliasiorneranni illoqarfiit pingaarnersaatut inissisimanermini europami kulturimut tunngatillugu 2008-mi illoqarfiit pingaarnersaattut inissilluni ineriartornera pissanganartoq pillugu ulloq 14. april 2008-mi ataatsimeeqatigiittoqarpoq. Inuussutissarsiornikkut kultureqarnikkullu suleqatigiinnerup angusaqarfiusinnaaneranut assersuutissaqqissoq isumaliutigisarialik.
Nunat Avannarliit Siunnersuisoqatigiiffiata ataatsimiititaliai sapaatip akunnerani 26-imi tullianik naapissapput, tassani ataatsimiititaliat aasaanerani ileqquusumik ataatsimiittarnitik tamarmik immikkut ingerlatissallugit. Aasaanerani ataatsimiinnerit sumiiffissaat ukiumi pineqartumi ataatsimiititaliat ataasiakkaat sammisassaannut naapertuussaqqissaarneqartarput. Chernobylimi atomimik ajutoornerup kinguneri annertunerusumik paasisaqarfigiumallugit Nunat Avannarliit Siunnersuisoqatigiiffiata Avatangiisinut Pinngortitamilu Pisuussutinut Ataatsimiititaliaa Hvideruslandimut paasisassarsiorluni angalassaaq. Nunat Avannarliit Siunnersuisoqatigiiffiata Kultureqarnermut Ilinniartitaanermullu Ataatsimiititaliaata aasaanerani ataatsimiinnini Danmarkimi ingerlatissavaa. Nunat Avannarliit Siunnersuisoqatigiiffiata Atugarissaarnissamut Ataatsimiititaliaa, isumaginninnermut peqqissutsimullu apeqqutinik suliaqartuusoq, Nuummut ulluni 23.-27. juni 2008-mi tikeraassaaq, tassungalu atatillugu ataatsimiinnerit takuniaanerillu aqqutigalugit nunatsinni peqqinnissaqarfik isumaginninnikkullu pissutsit pillugit ilisimasanik annertunerusunik pissarsiniassalluni.
Nunat Avannarliit Siunnersuisoqatigiivi inatsisartutigoortumik suleqatigiiffiuvoq Norgimeersunik, Danmarkimeersunik, Sverigimeersunik, Finlandimeersunik, Islandimit aammalu namminersorfiusunit ¿ Ålandimit, Savalimmiunit Kalaallit Nunaanniillu ilaasortalik 87-inik.
Inatsisartut Nunat Avannarliit Siunnersuisoqatigiivini marlunnik ilaasortaatitaqarput marlunnillu sinniissussaqarlutik. Inatsisartunut ilaasortat Augusta Salling Atassummeersoq aammalu Per Berthelsen Demokraatineersoq ilaasortaapput, aammalu sinniisussaralugit inatsisartunut ilaasortaq Lars Emil Johansen Siumumeersoq aammalu inatsisartunut ilaasortaq Josef Motzfeldt Inuit Ataqatigiinneersoq. Augusta Salling Miljø ¿ og Natureressourceudvalgimi ilaasortaavoq, Per Berthelsen Kultur- og Uddannelsesudvalgimi ilaasortaalluni.
Paasissutissanik annertunerusunik pissarsinissaq kissaatigineqarpat uku attavigineqarsinnaapput:
Inatsisartunut ilaasortat Augusta Salling, mobil (+299) 55 03 10 aamma Josef Motzfeldt, mobil +45 24 42 34 06.