2024 2023 2022 Flere år...
24-04-2008
Aaqqiagiinngissutinik isumaqatigiissitsiniaasarneq pillugu nunat tamalaat oqallittarfianni Kalaallit Nunaat tikilluaqquneqarluarpoq
Aaqqiagiinngissutinik isumaqatigiisitsiniaasarnerit assigiinngitsut nunani arlalinni atorneqartarsimapput. Nunat ilaanni - assersuutigalugu Tuluit Nunaanni Norgemilu - ukiut qulikkaat arlallit ingerlanneqareersimallutik. Pitsaasunik misilittagaqarfigineqarpoq. Ima pitsaatigalutik nunat atuilersut suli amerliartorlutik. Imalu aamma pitsaatigalutik allaat Naalagaaffiit Peqatigiit Europamilu Siunnersuisoqatigiit aaqqiagiinngissutinik isumaqatigiisitsiniaasarnerup atorneqarnissaa pillugu kaammattuuteqarsimallutik.
Kalaallit Nunaata aaqqiagiinngissutinik isumaqatigiisitsiniaanermik atuinialernera ataatsimeersuarnermi aaqqissuisut ¿European Forum for Restorative Justice¿-p (Aaqqiagiingissutinik isumaqatigiisitsiniaasarneq pillugu ataatsimeersuarnermi Europami isummersoqatigiiffik) nuannaarutigaa Kalaallillu Nunaanni tamatumani ineriartorneq soqutigalugu malinnaaffigiumallugu.
Inatsisartut Inatsisit Atortinneqarnerannut Ataatsimiititaliaannit peqataasut ataatsimeersuarnermit annertuumik pissarsiaqarlutik angerlassapput. Ilaatigut attaveqarfissat iluaqutaasut pissarsiaralugit. Ilaatigullu Europami Europallu avataani assersuutigalugu Shetlandip qeqertaani, kisiannili aamma Australiami, New Zealandimi Canadamilu nunat inoqqaavisa ileqqui malillugit aaqqiagiinngissutinik isumaqatigiisitsiniaasarnermi periutsit pillugit paasissutissanik pissarsisoqarpoq.
Nunarput ilaatigut ima siunnersorneqarpoq: Nunat allat misilittagaat isumassarsiorfigisigit, periuserli piorsarsimassutsissinnut atukkassinnullu tulluuttoq nammineq pilersissiuk.
Tamanna suliassaq pissanganartoq Inatsisartut Inatsisit Atortinneqarnerannut Ataatsimiititaliaata qilanaaraa. Tamatumunngalu attuumassuseqartut tamarmik isumaliutigineqartuni ilaatinneqassasut ataatsimiititaliap kaammattuutigaa. Politiit / unnerluussisussaatitaasut eqqartuussiviillu kisiisa pinnagit, aammali soorlu assersuutigalugu isumaginninnermi oqartussat pinerluttaalisitsinermik suliaqartut ilaatinneqassapput.
Paasissutissanut annertunerusunut attavigiuk:
Kristian Jeremiassen, Inatsisartut Inatsisit Atortinneqarnerannut Ataatsimiititaliaata siulittaasua: 54 06 94
Vittus Mikaelsen: 59 82 12
Lene Knüppel: 49 11 66
Esmar Bergstrøm: 55 33 80