2024 2023 2022 Flere år...
14-01-2009
Inatsisartut Eqqissisimatitsinermut Avatangiisinullu Ataatsimiititaliaata Danmarkimi paasisassarsiorluni angalaneranit
Ataatsimiinnerit tamaarmik Ataatsimiititaliamit pissarsiaqarfiulluarput, Ataatsimiititaliamilu ilaasortanit apeqqutissaqartoqaqaaq. DMU-mit, RISØ-mit aamma Miljøstyrelsen-imit sinniisut immikkut tamarmik suliatik nunatsinnut tunngassuteqartut Ataatsimiititaliamut saqqummiuppaat. Avanersuarmi Uummannap eqqaani timmisartorsuup nakkarnerata kingunerisai, Avanersuarmi Uummannap eqqaani amerikamiut qimaannagaat igitaallu kiisalu Kalaallit Nunaanni eqqakkat silaannarmiittut pillugit suliaqarnermi sumiissusersiiniarnermilu suliniaqqinnerit pillugit Inatsisartut Eqqissisimatitsinermut Avatangiisinullu Ataatsimiititaliaat Folketingimi Kalaallit Nunaat pillugu Ataatsimiititaliamik pissarsiffiulluartumik oqaloqateqarpoq.
Tamatumunnga atatillugu Ataatsimiititaliamit nuannaarutigineqarpoq Avanersuarmi Uummannap eqqaani timmisartorsuup nakkarnerata kingunerisaanik annertunerusumik qulaajaanissamut Inatsisartut Eqqissisimatitsinermut Avatangiisinullu Ataatsimiititaliaat aamma Folketingimi Kalaallit Nunaat pillugu Ataatsimiititaliaq ataatsimoorussamik toqqaannartumik soqutisaqarpasimmata. Taamaalilluni januarip 7-ni Folketingimi Kalaallit Nunaat pillugu Ataatsimiititaliamit danskit Nunanut allanut Ministeriat isumasioqatigiinnissamut aggersarneqarpoq, kiisalu Inatsisartut Eqqissisimatitsinermut Avatangiisinullu Ataatsimiititaliaat isumasioqatigiinnermi paasisat pillugit ilisimatinneqarnissamik neriorsorneqarpoq.
Ilisimatusarnerit, sakkutooqarfeqarnerit, aatsitassarsiornerit, radioqarfiit, ilisimasassarsiornerit il.il. kingunerisaannik avatangiisitigut ajornartorsiutit pillugit Ataatsimiititaliap ernummatini Folketingimi Kalaallit Nunaat pillugu Ataatsimiititaliamut ilisimatitsissutigai. Avatangiisinut tunngasunut akisussaaffik Namminersornerullutik Oqartussanit tiguneqarnikuummat Kalaallit Nunaata ajornartorsiutit tamakku kisimiilluni isumagisassanngussagai Inatsisartut Eqqissisimatitsinermut Avatangiisinullu Ataatsimiititaliaanit ingammik ernummatigineqarpoq.
Tamatumunnga atatillugu Avanersuarmi Uummannap eqqaa pillugu Danmarkip aamma USA-p akornanni 2003-mi isumaqatigiissut naapertorlugu danskit naalakkersuisuisa inissisimanertik qanoq isumaqartinniarneraat aalajangiisuussasoq Eqqissisimatitsinermut Avatangiisinullu Ataatsimiititaliaali isumaqarpoq, taamanikkummi avatangiisitigut allatigullu iliuusissanut Danmarki pisariaqartitamigut tamakkiisumik imminut akisussaasuutilerami. Kalaallit Nunaata sineriaata sinnerani avatangiisitigut ikiorsiinissanut allanut tamatuma tunngaviunissaa naatsorsuutigalugu, danskit naalakkersuisuisa apeqqummut tamatumunnga qanoq isumaqarnerata pingaaruteqassusia kingunerisassaalu paasissallugu immikkut pisariaqartutut Eqqissisimatitsinermut Avatangiisinullu Ataatsimiititaliamit isigineqarpoq. Suliat tamakku pillugit oqaloqatigiinnerup ingerlaqqinnissaanut Folketingimi Kalaallit Nunaat pillugu Ataatsimiititaliaata ammasumik periuseqarnera Ataatsimiititaliamit nuannaarutigineqarpoq.
Paasisassarsiorluni angalareernermi Eqqissisimatitsinermut Avatangiisinullu Ataatsi-miititaliaq taamaalilluni suleriaqqinnissaminut atortussaqarlualerpoq. Ataatsimiititaliap ataatsimeeqateqarneranit paasisat ataatsimiititaliap suleriaqqinnissaani ilaassapput, paasisallu pissarsiarineqartut aallaavigalugit piffissami qaninnermi apeqqutit arlaqartut saqqummiunneqassallutik.
Paasissutissanik annertunerusumik paasisaqarumasut ataatsimiititaliap siulittaasuata tullia Isak Davidsen oqarasuaammut uunga attavigisinnaavaat: +299 52 09 53