Nutaarsiassat

12-06-2009

Inatsisartut inissitsiterput

Inatsisartut inissitsiternertik ullumi ulloq 12. juni 2009, nal. 11.00 aallartippaat.

Inissitsiterluni ataatsimiinnissap ammarneqarnissaa sioqqullugu Hans Egedep Illuani kaffisoqatigiinnissamut Inatsisartunut sivisunerpaamik ilaasortaasimasoq Josef Motzfeldt qaaqqusivoq. Tamatuma kingorna innuttat qinigaat 31-iusut Naalakkersuisut nutaat peqatigalugit Annaassisitta Oqaluffiani naalagiarput, tamatumalu kingorna ileqqoq malillugu Inatsisartut ataatsimiittarfiannut ingerlaaqatigiillutik.

Ullormi ataatsimiiffimmi siullermi ullormut oqaluuserisassanut ilaatigut ilaapput Inatsisartut siulittaasussaannik siulittaasullu tullissaanik, Naalakkersuisut siulittaasussaannik aammalu Naalakkersuisunik qinersineq. Josef Motzfeldt Inatsisartut siulittaasuattut qinerneqarpoq.

Inatsisartut Siulittaasoqarfiat:

Siulittaasoq: Josef Motzfeldt, IA Sinniisussaq: Akitsinnguaq Olsen, IA

siulittaasup tullia siulleq: Olga P. Berthelsen, IA Sinniisussaq: Naaja Nathanielsen, IA

siulittaasup tulliata aappaa: Ruth Heilmann, S Sinniisussaq: Malik Berthelsen, S

siulittaasup tulliata pingajuat: Debora Kleist, IA Sinniisussaq: Juliane Henningsen, IA

siulittaasup tulliata sisamaat: Justus Hansen, D Sinniisussaq: Astrid Fleischer Rex, D

Ullumi ataatsimiinneq ullormut oqaluuserisassatut immikkoortut aalajangersarneqartut naammassillugit oqaluuserineqarnerannik naggaserneqartussaagaluarpoq. Inatsisartulli immikkoortoq 10 taamaallaat tikillugu angumeraat. Taamaattumik immikkoortut ulloq 12. juni 2009-mi suliarineqartussatut aalajangersarneqartut suliarissallugit aqagu ulloq 13. juni, nal. 10.00 Inatsisartut ataatsimeeqqissapput.

Assini takuneqarsinnaapput ulloq 12. juni 2009-mi Inatsisartunut ilaasortat sinniisussallu.