2024 2023 2022 Flere år...
22-05-2009
Majip qaammataani puisit amiinik pisiortornerup ammaqqinneqarnissaanut Naalakkersuisut qinnuteqataannik Aningaasaqarnermut ataatsimiititaliamit suliaq
Puisit amiinik pisiortornermut tapiissutit 3.627.000 kr.-nik qaffanneqarnissaanik Naalakkersuisut qinnuteqaataat Aningaasaqarnermut ataatsimiititaliap ullumikkut suliaraa.
Aningaasaqarnermut ataatsimiititaliami amerlanerussuteqartut Atassummit, Inuit Ataqatigiinnit aamma Demokraatinit inuttaqartut qinnuteqaatip suliarineqarnissaanut periarfissamik nassaarsinnaanngillat. Taamaalilluni qinnuteqaammi siunertarineqartumut itigartitsitsisoqarsinnaananilu allatulluunniit isummertoqarsinnaanngilaq. Taamaattorli ataatsimiititaliamit nalilerneqarpoq piffissami matumani Inatsisartunik qinersinissap nalunaarutigereernerani suliap ingerlanneqarnissaanut inatsisitigut isumannaatsumik naammattumik tunngavissaqanngitsoq. Tamatumunnga atatillugu ataatsimiititaliami amerlanerussuteqartut Naalakkersuisuugallartuni taamatuttaaq Aningaasaqarnermut ataatsimiititaliaagallartumi suliaqarfinnik ingerlatsinermut pisortatigoortumik pingaarnertullu killiliinerit immikkut isiginiarneqarput. Ataatsimiititaliami amerlanerussuteqartut tamatuma saniatigut naliliipput naalakkersuinikkut ingerlatserpalaartumik aningaasaliinissamut qinnuteqaatip piffissami matumani akuerineqarnera naleqquttuunngitsumik siunissami aalajangiisarnissamut tunngaviliisinnaasoq.
Kiisalu Ataatsimiititaliami amerlanerussuteqartut naliliipput aningaasaliissutissatut qinnuteqarnermi maanna Inatsisartuusut sulinissamut atuuffiat qaangiutereersimasoq.
Tamanna tunuliaqutaralugu Ataatsimiititaliami amerlanerussuteqartut qinnuteqaatip Inatsisartunngortussani suliarineqarnissaa innersuussutigaat. Aningaasaqarnermut ataatsimiititaliami ikinnerussuteqartut Siumumit inuttaqartut qinnuteqaat pillugu imikkut ima oqaaaseqaateqasapput:
Aningaasaqarnermut ataatsimiititaliami amerlanerussuteqartut Inuit Ataqatigiinnit, Atassummit aamma Demokraatinit inuttaqartut puisit amiinik pisiortornerup ammaqqinnissaanut Naalakkersuisut qinnuteqaataata suliarineqannginnissaa ullumikkut aalajangerpaat. Aalajangerneq tamanna Siumumit akuersaarneqarsinnaanngilluinnarpoq. Siumumit ilaasortaatitaasut tamanna pissutigalugu Aningaasaqarnermut ataatsimiititaliap ullumikkut tallimanngornermi 22. maj 2009-mi ataatsimiinnerani suliap ingerlanneqarnissaa pillugu kimigiiserput kinguneqanngitsumilli
Aningaasaqarnermut ataatsimiititaliami amerlanerussuteqartut suliap suliarineqannginnissaanut aalajangernerat piniartunut piniartullu ilaqutaannut ajoquseerujussuassaaq, taakkumi puisit amiisa tunisaanerisa unitsinneqarnerannit suli atugarliortinneqassapput.
Aningaasaqarnermut ataatsimiititaliami ilaasortat Siumumeersut oqaatigissavaat qinnuteqaat Naalakkersuisut allattoqarfianit suliarineqareerluni Naalakkersuisunit nassiunneqarnissaanut Inatsisartuni partiit siulittaasuinit tamanit ataaserli minillugu akuerineqartoq. Naak Inatsisartunut qinersinissaq nalunaarutigineqareeraluartoq siuliani pineqartoq tunuliaqutaralugu Aningaasaqarnermut ataatsimiititaliami inatsisinut naapertuuttumik suliap suliarineqarsinnaanera Siumumit qularutissaasutut isigineqanngilaq.
Aningaasaqarnermut ataatsimiititaliaq sinnerlugu
Augusta Salling
Aningaasaqarnermut ataatsimiititaliami siulittaasoq