2024 2023 2022 Flere år...
10-08-2009
Nunani avannarlerni killerni ilinniartitaaneq pitsanngorsarneqassaaq
Aammattaaq naak inuusuttunik ilinniartitsineq nunat avannarliit killiit unammilligassaasa pingaarnersarigaluaraat inersimasunik killilimmik ilinniagalinnik ilinniartitsinissaq piginnaasaannillu ineriartortitsinissaq aamma pingaaruteqarluinnartoq ataatsimeersuarnermi inerniliunneqarpoq. Inuusuttut inersimasullu ilinniagaat pillugit oqallinnerup amerlasuut ileqqorisaattut avissaartinneqarnissaanut tunngavissat ikitsuinnaapput. Tassunga atatillugu tamatumunnga taarsiullugu inuit tamarmik inuuneq naallugu ilinniarnissaat pingaarnerutinneqartariaqarpoq. Taamaalilluni nunat avannarliit killiit nunarsuarmi unammilleqatigiinnermi peqataanissamut periarfissaqarluarnerulissapput.
Ataatsimeersuarnermi qulequtarineqartoq tassaavoq
Nunat avannarliit killiit inuuneq tamaat ilinniartoqarnissaa isumagissagaat aammalu nunap immikkoortuini sulisussanut ilinniarsimanngitsunut ilinniartitaanernik neqerooruteqartarneq annertusassagaat peqataasunit isumaqatigineqarpoq. Nunat misilittakkaminnik atorluaasinnaaqqullugit tamannarpiaq pillugu suleqatigiinnertik nukittorsarunikku iluaqutaassaaq. Nunat akornanni isumaqatigiissutit sorliit ullumikkut atuutereernersut paasiniaqqullugu aammalu aaqqiissutissanik ujartuilinnginnermi nunani ataasiakkaani ajornartorsiutit annertunerpaat sukumiisumik nassuiaatigeqqullugit nunat ilinniartitaanermut naalakkersuisui qinnuigineqassasut peqataasut isumaqatigiissutigaat.
Nunat suleqatigiinnermi periarfissanik misissuigaangamik nunat ataasiakkaat kulturiat annertuumik eqqumaffiginiarneqartassaaq. Nunap periaasia nunamut allamut imaaliallaannaq nuunneqarsinnaanngilaq, nunalli kulturianut ajornartorsiutaanullu naleqqussaanissaq pingaartinneqassalluni.
Aamma apeqqutit tunngaviusut ataatsimeersuarnermi sammineqarput, soorlu lærlinginut periaaseq inersimasunullu nalinginnaasumik ilinniartitaaneq kiisalu pisortat inuussutissarsiutinillu ingerlataqartut akornanni ataqatigiittoqarnera qanoq annertutigisumik pingaartinneqartariaqarnersut aammalu qaffasinnerusumik ilinniartitaaneq tunngaviusumillu ilinniartitaaneq qanoq pingaartinneqartigissanersut.
Ataatsimeersuarnermi inerniliunneqartut qaammatip naanerani ukiumoortumik ataatsimiinnerminni siunnersuisoqatigiit oqaluuserissavaat aammalu sammisat taakku pillugit nunat naalakkersuisuinut siunnersuutissat oqaasertalersussallugit.
Nunani avannarlerni killerni inatsisartunut ilaasortat 30-t, immikkut ilisimasallit atorfilittallu kiisalu Norgip Stortingiani Sverigillu Riksdagiani ilaasortat peqataapput. Nunat Avannarliit Killiit Siunnersuisoqatigiivisa immikkut qulequtaqartumik ataatsimeersuartarnerat ukiumoortumik ingerlanneqartarpoq, tassanilu qulequttat Nunanut avannarlernut killernut annertuumik soqutiginaateqartutut Siunnersuisoqatigiinnit isumaqarfigineqartut oqaluuserineqartarlutik. Siunnersuisoqatigiit pillugit paasissutissat annertunerusut uani pissarsiarineqarsinnaapput
"Nunani avannarlerni killerni sulisussanut ilinniarsimanngitsunut ilinniarnissamik neqeroorutit ilinniarnissamullu periarfissat ".
Apeqqutit ilaat ataatsimeersuarnermi oqallisigineqartoq tassaavoq ilinniarsimanngitsunut ilinniarnissamik neqerooruteqartarnermut akisussaaffik kimit tigummineqassanersoq. Akisussaaffik pisortat, inuussutissarsiornermik ingerlataqartut tigummissaneraat imaluunniit inuup nammineq tigummissaneraa.www.vestnordisk.is