2024 2023 2022 Flere år...
11-08-2009
Atuagagdliutinut allakkat ammasut
Inuttut Inatsisartunullu siulittaasutut ullumi pingaarnertut allaaserisami AG-p aammaarluni pasillerniarsaraanga. Oqaaseq sallutooq uannut atorneqarpoq. Atornerluinerit pillugit oqallinnernik unitsiteqataaniannginnama aammaarlunga naqissuserpara, kisiannili inunnut ataasiakkaanut, matumani uannut, malersuinermi ooqattaasakkatut atorneqarnera naammagilerpara.
Atornerluineq suna tamarmi, inatsisinik unioqqutitsineruguni inatsisinilluunniit naapertuineruguni atornerluisunut avatangiiserisaannullu, minnerunngitsumillu ilaqutarisaannut ajornartorsiummut qanoq iliuuseqarsinnaanngitsunut soorunami alianartorujussuuvoq. Pissutsit tamakku ukiualunnguit matuma siornatigut paquminartutut isigineqartut ullumikkut oqaluuserilersinnaasimagatsigit nersortariaqarpoq, tamatumanilu qanigisaasut avatangiiserisaasullu qanoq iliuuseqarsinnaanngigajupput ikiortissaqarnatillu. Atornerluisut ullumikkut ikiortissaqarlutik aammalu atornerluinerminnik aniguiniarunik ikiorneqarnissamut periarfissaqarlutik nalunngilaat.
Pisortatigoortumik tusagassiortuni pissuserissaarnissamut killissarisaasut aamma Kalaallit Nunaanni malinneqarnissaat pingaaruteqarpoq. Paparazinik atuilernissamut mianersoqqusiitigaluni AG-p pingaarnertut allaaserisamini nammineq allannermisuulli “tutsuiginninneq” tunngavigalugu aviisi oqaatigisaqarpat tamanna marloqiusamik isummernertut oqaatigineqartariaqarpoq. Tamanna illuatungeriinnut tamanut atorneqarsinnaanngilaq inuiaqatigiillu siunertalimmik oqallinnerannut Kalaallit Nunaata pisariaqartitaanut iluaqutaanani. Nunani aviisinik assigiinngitsorpassuarnik toqqagassalinni aviisit ataasiakkaat uissuuminartunik tusagassiornissartik toqqartarpaat. Akerlianik Kalaallit Nunaata nuna tamakkerlugu saqqummertartunik marluinnarnik aviisillip inuiaqatigiinnik isornartorsiuilluni tusarliisartumik piviusorsiortumik annaasaqarnissani saperpaa.
Taamaattumik tusatsiakkat uppernarsineqanngitsut, ilimagisat, taamaassorinninnerit allaniillu tusakkat tunngavigalugit tusarliussisarnini AG-p unitsissagaa qinnutigissavara. Manngua 56-imi hashimik, uanga ilisimasaqarfiginngilluinnakkannik nassaarneq pillugu oqaatigineqartut eqqunngitsut aallaavigalugit inuuninnut tamarmut, tassunga ilanngullugu inuusunninni sulerisimaninnut assersuusiornerit akuerisinnaanngilluinnarpakka. Taama tusagassiornikkut periaaseqarnerup naggataatigut Inatsisartut tamarmiusut pasillerneqarnerannik kinguneqassaaq.
Inussiarnersumik inuulluaqqusillunga
Josef Motzfeldt
Inatsisartut Siulittaasuat