2024 2023 2022 Flere år...
13-11-2009
Ilaqutariinnermut Ataatsimiititaliaq sulilerpoq, ilisimasaqarnerunissamik oqaloqatigiinnissamillu kissaateqarluni
2009-mi ukiakkut ataatsimiinnermi Ilaqutariinnermut Ataatsimiititaliaq sulilluni aallartippoq. Siunnersuutit pineqartut pillugit ataatsimiititaliap isumaliutissiissuteqarnissaa siunertaralugu siunnersuutit amerlasuut ataatsimiititaliami sukumiinerusumik suliarineqartussanngorlugit innersuussutigineqarput. Siunnersuutit Inatsisartunit itigartinneqassanersut akuersissutigineqassanersulluunniit pillugu inaarutaasumik siunnersuutit naliliivigineqartinnagit Inatsisartunit isumaliutissiissutit siunnersuutigineqartunut ataatsimiititaliap qisuariaataanik tunngavilersuutaanillu imaqassapput. Ataatsimiititaliaq isumaliutissiissutinik arlalinnik tunniussaqarpoq, siunnerssuutilli allat 2010-mi upernaakkut ataatsimiinnissamut kinguartittariaqarsimavai, taamaaliornikkut siunnersuutit peqqissaartumik suliarinissaannut ataatsimiititaliaq piffissaqarluarsinnaaqqullugu.
Isumaginninnikkut maanna anguniakkat aammalu Naalakkersuisut maanna ingerlataat pillugit erseqqinnerusumik paasissutissiinissaq siunertaralugu Ilaqutariinnermut Ataatsimiititaliaq arlaleriarluni Isumaginninnermut Naalakkersuisumik Maliina Abelsenimik oqaloqateqareerpoq. Isumaginninnermut Naalakkersuisumik naalakkersuinikkut ataatsimeeqateqartarnerit kinguneqarluartumik ingerlanneqarput, illuatungeriit pitsaasumik oqaloqatigiinnissaminnut periarfissinneqarlutik.
Ataqatigiissumik ataqatigiissakkamillu meeqqanut ilaqutariinnullu suliniutit pillugit kaammattuuterpassuit 2009-mi oktoberip qaammataani Isumaginninnermut Naalakkersuisup saqqummiussaasa sulissutigeqqinnissaat Ilaqutariinnermut Ataatsimiititaliami ilaasortanit qilanaarineqarput. Kaammattuutit 2010-mut Aningaasanut Inatsimmi, pilersaarutit malillugit 27. november 2009-mi inaarutaasumik akuerineqartussami, aningaasatigut annertungaatsiartumik taperserneqariissapput.
Meeqqanut inuusuttunullu tunngasuni suliniutit ataqatigiissumik ataqatigiissaakkanillu pingaarnersiorlugit innersuussutigineqartut pillugit Nalunaarusiaq Naalakkersuisunut ilaasortamit saqqummersinneqangajalersoq Ilaqutariinnermut Ataatsimiititaliami ilaasortanit qilanaarineqarpoq.
Aammattaaq 2009-mi ukiakkut ataatsimiinnermut atatillugu Nuummi arlalinnut paasisassarsiorluni takuniaanissaq Ilaqutariinnermut Ataatsimiititaliamit pingaartinneqarpoq. Maannamut Røde Kors Børnehjemi, ulloq unnuarlu angerlarsimaffiit AJA Matu-lu Ilaqutariinnermut Ataatsimiititaliap takuniarpai, taakku saniatigut ataatsimiititaliap MIPI, Kommuneqarfik Sermersoorlu takuniarpai, matumani utoqqalinersiallit siusinaartumillu soraarnersussutisiallit atugaat sammineqarlutik.
2009-mi ukiakkut ataatsimiinneq assigiinngiiaartorpassuarnik siunnersuuteqarfiusussaavoq, tamarmik immikkut meeqqanut inuusuttunullu, ilaqutariinnut, ajornartorsiutilinnut inunullu sanngiitsunut, utoqqarnut, siusinaartumik soraarnerussutisialinnut, innuttaasunut kinguaassiuutitigut kanngutsaatsuliorfigineqarsimasunut nakuusernerillu aammalu innuttaasut erninermut atatillugu piginnaatitaaffeqalernissaannik pisariaqartitsinernut il.il. tamarmik immikkut sinaakkutissatigut pitsanngorsaavigineqartariaqartut nukittorsarneqartariaqartuni. Siunnersuutit pineqartut tamakkiisut Inatsisartut nittartagaanni www.inatsisartut.gl takuneqarsinnaapput.
Isumaginninnermut sullissinernut suliniutit innuttaasunullu neqeroortitit ikiorserneqarnissamik pisariaqarfiunerusuni ilorraallu tungaanut ingerlariaqqinnissamut kaammatuinernut suliniutinik tulleriiaaqqissaarineq siumut isigisoq Ilaqutariinnermut Ataatsimiititaliamik sulissutiginiarneqarpoq.
Illuatungeriinnik, sullissisunik nunatsinnilu innuttaasunik attaveqarneq oqaloqateqarnerlu Ilaqutariinnermut Ataatsimiititaliap ilaasortat pingaartilluinnarpaat, taamaaliornikkut isumaginninnermut tunngasuni naalakkersuinikkut ilisimasanik tunngavilinnik oqaloqatigiinnerit aallartinneqarsinnaaniassammata. Ilaqutariinnermut Ataatsimiititaliaq allaffissornikkut sullissisuunngilaq, Ilaqutariinnermulli Ataatsimiititaliaq innuttaasunit qinikkatut oqariartuuteqartartutut isumaginninnerlu tamatumanilu aningaasalersuineq kiisalu katersuuffissatut Ilaqutariinnermut Ataatsimiititaliap inissisimavoq.
Ilaqutariinnermut Ataatsimiititaliamut immikkut aaqqissuussani pisussanilu aamma sassartinneqarnissamik ataatsimeeqateqarnissamillu saaffiginnissutit pillugit inatsisartut@inatsisartut.gl –mut saaffiginnissutigineqarsinnaapput.
Annertunerusumik paasissutissinneqarnissaq oqaloqateqarnissallu pillugit – Ilaqutariinnermut Ataatsimiititaliami ilaasortat attavigikkit:
Inatsisartunut ilaasortaq, Debora Kleist, (IA), Siulittaasoq, DEKL@inatsisartut.gl telefon
34 62 24
Inatsisartunut ilaasortaq, Jane Petersen, (IA), Siulittaasup tullia., JAPET@inatsisartut.gl telefon 34 62 47
Inatsisartunut ilaasortaq, Astrid Fleischer Rex, (D) ASFL@inatsisartut.gl telefon 34 62 38