2024 2023 2022 Flere år...
19-11-2009
Hans Lyngep qalipagaa Nuummi Lions Clubimit Inatsisartunut tun-niunneqarpoq
Hans Lyngep qalipagaa ullumi Inatsisartunut tunniunneqarpoq. Qalipagaq taaguutilik ”Tyske missionærers farvel i Lichtenau i år 1900” nunatta eqqumiitsuliortorsuata 1985-imi qalipagaraa.
Qalipagaq Inatsisartut ataatsimiittarfianni 1990-ikkut aallartinnerannili nivingavoq, Lions Clubilli Eqqumiitsuliornermut Aningaasaateqarfiata maanna aalajangerpaa taanna qaqugumulluunniit Inatsisartunit pigisassanngortinneqarluni nivingaannassasoq.
Tunniussinermik malunnartitsiniarnermut Inatsisartut ataatsimiittarfianni ingerlanneqartumut atatillugu Henrik Hey Nuummi Lions Clubip Eqqumiitsuliornermut Aningaasaateqarfianeersoq naatsumik oqalugiarpoq, tamatumalu kingorna Frederik Holmip Eqqumiitsuliornermut Aningaasaateqarfimmeersup qalipagaq Inatsisartut Siulittaasuannut Josef Motzfeldtimut tunniuppaa.
Josef Motzfeldtip oqalugiarnermini Lions Clubip Eqqumiitsuliornermut Aningaasaateqarfia qujassuteqarfigaa, tamannalu iluatsillugu qalipakkami tunngavigineqartoq aammalu eqqumiitsuliortup Hans Lyngep qanoq taanna isumassarsiarisimaneraa oqaluttuaralugu:
”1985-imi Københavnimi Nunaat avannarliit saqqummersitsinerisa nalaani assilisami, taamanimi qalipagaq saqqummersinneqarmat, takuneqarsinnaavoq Hans Lynge qalipakkap ataani assilisamik nivinngaasimasoq, assilisamillu tassannga isumassarsisimasoq. Assilisami qalipaateqanngitsumi takuneqarsinnaavoq qaannat 212-t, taakkulu qatanngitigiinnianit naggataarutaasumik naalagiartitsinissamut ingialluisuusimapput.
Taamaalilluni Hans Lyngep eqqumiitsuliortutut kiffaanngissuseqarnermigut eqqarsalersissinnaavaatigut qaannat taakku sissamit suna nakkunneraat.
Det Grønlandske Selskabip atuagassiaani ukioq 2000-mi allaatigisami atuarneqarsinnaavoq, qaannat tamakku amerlaqisut Hans Lyngep amigaateqartutut misigisimagai, taasami amigaataasut qajartortut nuliaat meraallu qalipakkamini ilaatilersimavai.”
Hans Lyngep qalipagaa taannarpiaq taama angitiginini pissutigalugu Inatsisartut ataatsimiittarfiannikkuni naleqqunnerussasoq Nuummi Lions Clubip Eqqumiitsuliornermut Aningaasaateqarfiata nalilerpaa. Aammattaaq Hans Lyngep uillarnerata Inge Lyngep pitsaalluinnartutut isigaa qalipagaq maanna Inatsisartunut tunniunneqarmat, taannami Inatsisartut ataatsimiittarfiannut tullaqimmat.
Josef Motzfeldtip oqalugiaataa uani atuaruk
