2024 2023 2022 Flere år...
09-12-2009
Inunnut kinguaassiuutitigut atornerlunneqarsimasunut neqerooruteqartarnissaq Ilaqutariin-nermut Ataatsimiititaliamit suliniutigineqarpoq
Ilaqutariinnermut Ataatsimiititaliaq piffissami 7. – 15. december 2009-mi Islandimi Danmarkimilu paasisassarsiorluni angalavoq. Paasisassarsiorluni takuniaanerit immikkut sammisaqarluni angalanerup ilagai, tamatumani Islandimi børnehuset, meeqqanik inuusuttuaqqanillu kinguaassiuutitigut innarlerneqarsimasunik tigooraasumik ataatsimiititaliap takuniaanerata saniatigut inunnut kinguaassiuutitigut atornerlunneqarsimasunut tapersersuiviit katsorsaasarfiillu pillugit ilaasortat ilisimasaqarnerulissallutik.
2009-mi ukiakkut ataatsimiinnermi Inatsisartut aalajangiiffigisassaatut siunnersuutinut marlunnut tamanit akuersissutigineqartunut paasisassarsiorluni angalaneq toqqaannartumik atassuteqartutut isigineqassaaq. Kalaallit Nunaanni inunnut kinguaassiuutitigut innarlerneqarsimasunut atornerlunneqarsimasunulluunniit tapersersuivinnik katsorsaasarfinnillu pilersitsisoqarnissaa siunnersuutitigut siunertarineqarpoq. Danmarkimi katsorsaasarfinnik taamaattunik pilersitsinermi ingerlatsinermilu ilisimasanik misilittakkanillu aalajangersimasunik pissarsinissani Ilaqutariinnermut Ataatsimiititaliap kissaatigaa. Katsorsaasarfiit pingasut inunnik atornerlunneqarsimasunik sullissinermi periutsinik assigiinngitsunik tunngavillit, isiginnittaasillit atuutsitsisullu ataatsimiititaliamit takuniarneqassapput. Katsorsaasarfiit ingerlanneqarnerisa aaqqissugaanerat tunngaviilu assigiinngitsut ataatsimiititaliamit paasisaqarfigineqassapput. Tamatumani sulisut, pisortani aaqqissuussaanikkut inissisimaneq aammalu suliassat qanoq ingerlanneqarnerat paasisaqarfigineqassallutik.
Nunat Avannarliit Siunnersuisoqatigiiffiata ukiakkut ataatsimiinnerani nunat avannarliit arfineq pingasuusut – Danmark, Sverige, Norge, Island, Finland, Savalimmiut, Åland aamma Kalaallit Nunaat – siunnersuut Islandimi periuseq malillugu børnehusinik taagorneqartunik nunani taakkunani tamani pilersitsinissamik kaammattuutaasoq akuersissutigaat. Aammattaaq Kalaallit Nunaanni børnehusinik pilersitsisoqartariaqarnera isumaginninnikkut anguniagassanut tunngasuni kaammattuutit amerlasuut ilagaat, taakku meeqqat ilaqutariillu atugarissaarnissaannut atatillugu 2009-mi novemberimi saqqummiunneqarlutik. Kalaallit Nunaanni børnehusinik pilersitsisoqarnissaanut aammalu aningaasanut inatsimmi siunertamut aningaasanik immikkoortitsisoqarnissaanut Ilaqutariinnermut Ataatsimiititaliaq tapersersueqataassappat tamakku pillugit paasissutissanik aalajangersimasunik ataatsimiititaliaq pissarsisariaqarpoq.
Aammattaaq takuniaanerit taaneqartut saniatigut Ilaqutariinnermut Ataatsimiititaliap Odensemi Servicestyrelsen takuniassavaa. Taamaalillutik meeqqanik angerlarsimaffiup avataanut inissinneqarsimasunik oqartussaasut nakkutilliinerat pillugu ilisimasanik annertunerusunik ataatsimiititaliami ilaasortat kissaateqarput. Aamma 2009-mi ukiakkut ataatsimiinnermi aalajangiiffigisassatut siunnersuutit ataatsimiititaliami suliarineqartut toqqaannartumik malitsigisaannik tamanna suliniutaavoq. Meeqqat inuusuttuaqqallu angerlarsimaffiup avataani inissinneqarsimasut atugaannik nakkutilliinermik nukittorsaaqqullugit Naalakkersuisut peqquneqarnissaat siunnersuummi siunertarineqarpoq.