Nutaarsiassat

30-03-2010

Siulittaasup isornartorsiuinera USA-p nunanut allanut ministerianit tusaaniarneqarpoq

Washingtonimi nunani assigiinngitsuni inatsisartunut ilaasortat ataatsimiinneranni Nunat Avannarliit Killiit Siunnersuisoqatigiiffiat sinnerlugu Siulittaasup Qalasersuaq avannarleq pillugu nunat issittumiittut tamarmiusumik peqataatinneqannginnerannik Canada isornartorsiorpaa.

Inatsisartut Siulittaasuata Nunat Avannarliit Killiit Siunnersuisoqatigiiffianni siulittaasutut sulinerminut atatillugu angalanermini ataatsimiittarnernit angalanermit nalunaarutaa matumuuna nassiunneqarpoq.

Minnerunngitsumik Washingtonimi Standing Committee of Parliamnetarians of the Arctic Region- imi (SCPAR) ataatsimiinneq USA-mi senatimut ilaasortanut USA-milu nunami namminermi pissutsinut ministerimut issittoq eqqarsaatigalugu oqallisaasut pillugit paasissutisseeqatigiinnissamut periarfissiilluarpoq.

“Matumani immikkut erseqqissarneqassaaq ulloq 18. marts 2010 SCPAR-ip Washingtonimi ataatsimiinnerani Quebecimi issittoq pillugu ataatsimiinnissami Canadap issittormiunik peqataatitsinnginnera isornartorsioreerakku. Tamatumani oqaaserisakka tamarmiusut tusagassiorfinnut nalunaarummut matumunnga ilanngunneqartut innersuussutigissavakka”, Josef Motzfeldt oqarpoq.

Angalanermi sammisarpassuit ataatsimiinnerillu assigiinngitsorpassuit aammalu tusagassiorfinnut nalunaarutikkut naatsuliarineqarsinnaanngitsut angalanermit nalunaarusiakkut takutinneqarnissaat kissaatigineqarpoq.

Ataatsimiinnerit imarisaannik paasisaqarnissamut angalanermit nalunaarusiaq tapeeqataassasoq siulittaasup neriuutigaa, soorluttaaq angalanermi aviisinit tigulaakkat ilanngunneqartut angalanermit paasissutissanut ilassutaasinnaasut.

Annertunerusumik paasisaqartoqarusukkuni Inatsisartut Siulittaasuat Josef Motzfeldt, mobil 55 76 41, saaffigineqarsinnaavoq.