2024 2023 2022 Flere år...
08-06-2010
Inatsisartunut ilaasortat tallimat Reykjavíkimi nunani avannarlerni killerni arnat ataatsi-meersuarnerannut peqataaqqammerput
Inatsisartunut ilaasortat tallimat Reykjavííkimi nunani avannarlerni killerni arnat ataatsimeersuarnerannut peqataaqqammerput
Akitsinnguaq Olsen, Aleqa Hammond, Jane Petersen, Olga P. Berthelsen aamma Ruth Heilmann ippassaq nunani avannarlerni killerni arnat ataatsimeersuarnerannut peqataapput. Ataatsimeersuarnermut qaaqqusisuuvoq Islandimi inatsisartut Althingip siulittaasua Ásta R. Jóhannesdóttir.
Ataatsimeersuarneq Islandimi Reykjavíkimi ingerlanneqarpoq siunertaralugulu Nunani avannarlerni killerni naalakkersuinikkut suliaqarnermi inuussutissarsiornermilu inissisimanerat pissaaneqarnerallu qulaajassallugu.
Inatsisartunut ilaasortat tallimat saniatigut Naligiissitaanermut Siunnersuisoqatigiinniiit Poul Hansen aamma Regine Enoksen, kiisalu Ilisimatusarfimmit rektor Tine Pars aamma cand.scient.adm./adjunkt Marie Katrine Poppel peqataapput.
Ataatsimeersuarneq Ásta R. Jóhannesdóttirip ammareermagu, ataatsimeersuarnermi oqaaseqartut allat nunani avannarlerni killerni inatsisartuni inuussutissarsiornermilu arnat inissisimanerat pillugu saqqummiussaqarput. Nunatsinniit Ilisimatusarfimmi rektor Tine Pars inuussutissarsiornermi arnat inissisimanerat pillugu saqqummiussaqarpoq, Marie Katrine Poppel Inatsisartuni arnat inissisimanerat pillugu saqqummiussilluni.
Saqqummiussanut ataasiakkaanut aallaaviutinneqarsimavoq suliffeqarfiit aqunneqarnerinut nunanilu pineqartuni inatsisiliornermut arnat angutinut naligiillutik peqataappata tamanna qanoq pingaaruteqartigisoq.
Tamanna pereermat ataatsimeersuarnermi naalakkersuinermik suliaqarnermi inuussutissarsiornermilu naligiissitaaneq anguniarlugu sunik suliniuteqartoqarsinnaanersoq sammineqarpoq. Tamatumunnga atatillugu assersuutitut tigussaasutut inuussutissarsiornermi naligiissitaanissaq anguniarlugu inatsit nutaaq Islandimi inatsisartut Althingip qanittukkut akuersissutigeqqammisaat immikkut maluginiarneqarpoq.
Ataatsimeersuarneq naggaserneqarpoq inuiaqatigiinni naligiissitaaneq anguneqassappat attatiinnarneqassappallu angutit akisussaaffiisa oqallisigineqarnerinik.
Jane Petersen Ruth Heilmannilu arnat ataatsimeersuarnerannut peqataareerlutik Nunat Avannarliit Killiit Siunnersuisoqatigiiffiannut aallartitatut Islandip avannaani aalisarnermik aqutseriaatsit pillugit ataatsimeersuarnermut peqataassapput.