2024 2023 2022 Flere år...
02-09-2010
Inatsisartut Siulittaasuat Josef Motzfeldt ulluni 5. - 9. september 2010 Tjekkiami inatsisartunut pisortatigoortumik tikeraassaaq
Inatsisartut Siulittaasuat ulluni 5. - 9. september 2010 pisortatigoortumik Tjekkiamut tikeraalerpoq.
Tjekkiami inatsisartuni senatip siulittaasuata tullia siulleq Alena Gajduskova qaaqqusisuuvoq.
Senatimut ilaasortat siorna ukiakkut Kalaallit Nunaannut tikeraarput, tamannalu tunngavigalugu senatip kissaatigisimavaa Inatsisartut Siulittaasuat Tjekkiamut pisortatigoortumik tikeraarnissaanut qaaqquniarlugu.
Tikeraarnissamut pilersaarut taamaalilluni Pragimi danskit aallartitaqarfiata isumagisimavaa. Tikeraarnermini senatip siulittaasuanik Premysl Sobotkamik naapeqateqarnermi saniatigut Inatsisartut Siulittaasuata aamma naapissavai Tjekkiami inatsisartut nunanut allanut sillimaniarnermullu ataatsimiititaliaanni siulittaasoq Jiri Dienstbier, EU-mut tunngasunut ataatsimiititaliami siulittaasoq Ludek Sefzig, taamatullu aamma pisortat ingerlatsinerannut nunallu immikkoortuini ineriartortitsinermut ataatsimiititaliami siulittaasoq Ivo Barek.
Inatsisartut Siulittaasuat aamma nunanut allanut ministerimik Karel Schwarzenbergimik naapeqateqarnissaminut periarfissaqassaaq.
Inatsisartuni naapeqateqartarnerit saniatigut Charles Universitetimi ataatsimiinnermik aaqqissuussisoqarsimavoq, tassani Inatsisartut Siulittaasuata inatsisilerinermik ilisimatusarfimmi ilinniagartuut naapeqatigissallugit.
Tikeraarnerup naalernerani TV-kkut aallakaatitsisarfimmit CT24-imit Inatsisartut Siulittaasuata apersorneqarnissaa inissinneqarsimavortaaq.
Tikeraarnermi pisussanut pilersaarut tusagassiorfinnut nalunaarummut ilanngunneqarpoq.
Bilag: Program
Josef Motzfeldt
Inatsisartut Siulittaasuat
Paasissutissat sukumiinerusut Inatsisartut Siulittaasuat Josef Motzfeldt angallattagaq 55 76 41 attaveqarfigalugu pissarsiarineqarsinnaapput.