2024 2023 2022 Flere år...
06-09-2010
Ilaqutariinnermut Ataatsimiititaliaq ulluni 1. - 9. september 2010-mi Kommune Kujallermi illoqarfinnut nunaqarfinnullu paasisassarsiorluni angalavoq
Ilaqutariinnermut Ataatsimiititaliaq ulluni 1. - 9. september 2010-mi Kommune Kujallermi illoqarfinnut nunaqarfinnullu paasisassarsiorluni angalavoq
Ilaqutariinnermut Ataatsimiititaliaq 1. september 2010 aallarnerfigalgu ukiup ingerlanerani aappassaa nunatsinni paasisassarsiorluni angalavoq. 2010-mi martsimi Qaasuitsup Kommunianut ataatsimiititaliaq tikeraarpoq. Maannakkut Kommune Kujalleq pilersaarutinik imaqarluartumik attuumassuteqartunillu suliaqarnermi Ilaqutariinnermut Ataatsimiititaliamut ikiuussimasoq tikeraarneqassaaq.
Tikeraarnerup siunertaraa Kommune Kujallermi innuttaasut isumaginninnikkut atugaat pillugit paasitinneqarnissaq.
Suliffeqarfiit Kommunimit Namminersorlutillu Oqartussanit pigineqartut aammalu meeqqanit, inuusuttuaqqanit, innarluutilinnit, utoqqarnit il.il. orninneqartartut ataatsimiititaliap takuniassavai. Takuniaanerni taakkunani ataatsimeeqateqarnernilu suliffeqarfinni sulisunik atuisunillu oqaloqateqarnissamut ataatsimiititaliami ilaasortat periarfissaqassapput taamaalillunilu ulluinnarni atugaat aalajangersimasut pillugit paasisaqarfigissallugit.
Tamatuma saniatigut qinikkanik kommunimilu ingerlatsivimmi sulisunik ataatsimiititaliaq ataatsimeeqateqassaaq, taamaaliornikkut isumaginninnermut tunngasuni malittarisassat atuuttut aqunneqarnerat pillugu ataatsimiititaliaq paasitinneqassalluni. Matumani pingaartumik pisortanit ikiorsiissutigineqartartut pillugit malittarisassat saniatigut meeqqanut, inuusuttuaqqanut, pensionistinut, innarluutilinnut suliffissarsiortunullu tunngasut. Taamaaliornikkut kommunip illoqarfiini nunaqarfiinilu inuuniarnikkut atukkat pillugit kommunimiit kommunillu innuttaanit paasissutissanik pingaarutilinnik ataatsimiititaliaq katersisinnaalluni.
Ilaqutariinnermut Ataatsimiititaliap suliassaqarfimmi iluani paasitinneqarnissaq pingaartippaa, taamaaliornikkut siunissami aningaasanut inatsisissamut siunnersuummut isumaginninnermullu tunngasuni suliniutinut atatillugu inatsisiliornermi aalajangiiniarnernilu ilisimalikkat tunngavissatut atorneqarsinnaaqqullugit.
Ilaqutariinnermut Ataatsimiititaliamit makku peqataassapput: Debora Kleist, (IA), Siulittaasoq, Jane Petersen, (IA), Siulittaasup tullia, Ruth Heilmann, (S), Astrid Fleischer Rex, (D). Angalaqatigiinni Atassut peqataatitaqanngilaq.
Annertunerusumik paasisaqarniaraanni Ilaqutariinnermut Ataatsimiititaliami siulittaasoq, Debora Kleist, mobil 49 03 90-mut attavigineqarsinnaavoq.