Nutaarsiassat

07-09-2010

Inatsisartut Siulittaasuata Josef Motzfeldtip Tjekkiap nunanut allanut ministeria ministeriunerullu tullia Karel Schwarzenberg naapissavaa

Inatsisartut Siulittaasuata Josef Motzfeldtip ullumi Tjekkiap nunanut allanut ministeria ministeriunerullu tullia Karel Schwarzenberg naapissavaa

Inatsisartut Siulittaasuata Josef Motzfeldtip ullumi Tjekkiamut pisortatigoortumik tikeraarnerminut atatillugu Tjekkiap nunanut allanut ministeria ministeriunerullu tullia Karel Schwarzenberg naapissavaa.

Kalaallit Nunaannit tikeraat Pragimut sapaatiummat tikipput maannamullu annertuunik soqutiginartunillu misigisaqartinneqareerlutik. Tjekkiami naalakkersuinermik sulialinnik akimasunik naapeqateqartarnerit saniatigut kulturikkut aamma misigisassaqartitsisoqartarsimavoq.

Ippassaq Josef Motzfeldt angalaqataalu Danmarkip aallartitaanit Ole Moesbymit tikilluaqquneqarput. Kaalersuup Ikaartarfianut pisuttuartoqarpoq Wallensteinillu naatsiivianut illussaarsuartalimmut Tjekkiami Senatip ataatsimiittarfigisaanut pulaartoqarluni. Tamanna pereermat Josef Motzfeldt Tjekkiami Senatip siulittaasuanit Premysl Sobotkamit naapinneqarpoq.

Tamatuma kingorna Josef Motzfeldt nuannaarutigisaminik Pragimi kommunip atuagaateqarfiani Kalaallit Nunaat pillugu saqqummersitsineq ammarpaa, tassani ilaatigut Ole G. Jensenip atuakkiaa "Stripky gronske kultury" ilisaritinneqarluni. Atuagaq Zdenek Lyckamit Tjekkiap Danmarkimi aallartitaanit nutserneqarsimavoq.

Ullumi tikeraarneq Strahovip atuagaateqarfissuanut pulaarnermik aallarnerneqarpoq. Tamatuma kingorna Josef Motzfeldt Nunanut allanut sillimaniarnermullu ataatsimiititaliap siulittaasuanik EU-mullu tunngasunut ataatsimiititaliap siulittaasuanik naapeqateqarpoq. Pisortat allaffissornikkut ingerlatsinerannut, nunap immikkoortuini ineriartornermut avatangiisinillu ataatsimiititaliap siulittaasuanik ullup qeqqasioqateqareeruni Josef Motzfeldtip ministeriunerup tullia nunanullu allanut ministeri Karel Schwarzenberg naapeqatigissavaa.

Aqagu ilaatigut tappiitsut atuarfiat pulaarneqassaaq Tjekkiamilu inatsisartut siulittaasuat Miroslava Nemcova ullup qeqqasioqatigineqassalluni. Pisortatigoortumik tikeraarneq pingasunngornermi unnukkut Strahovip immiorfiani nereqatigiinnermik naggaserneqassaaq.

Kalaallit tikeraat angalanerat uani malinnaaffigisinnaavat:

http://www.ambprag.um.dk/da/menu/OmOs/Nyheder/AmbassadenByderDenGroenlandskeDelegationVelkommen.htm

Josef Motzfeldt

Inatsisartut Siulittaasuat

Paasissutissat sukumiinerusut Inatsisartut Siulittaasuat Josef Motzfeldt angallattagaq 55 76 41 attaveqarfigalugu pissarsiarineqarsinnaapput.