2024 2023 2022 Flere år...
26-10-2010
Puigortunngorneq puigortunngortartullu pillugit suliniarnerunissaq
Puigortunngorneq puigortunngortartullu pillugit sammisaq pillugu Inatsisartut Ilaqutariinnermut Peqqissutsimullu Ataatsimiititaliaata Kommuneqarfik Sermersuumi qitiusumik ingerlataqartut ullumi tallimanngornermi ull. 22. oktober 2010 ataatsimeeqatigai.
Puigortunngorneq puigortunngortartullu pillugit nuna tamakkerlugu suliap ingerlateqqinnissaanut Inatsisartut ataanni ataatsimiititaliat taakku marluk ilisimasaqarnerulernissaat paasitinneqarnissaallu ataatsimiinnermi siunertarineqarpoq.
Puigortunngorneq puigortunngortartullu pillugit suliniarnerunissaq ataqatigiissaarinerunissarlu nuna tamakkerlugu ataatsimut isigalugu pisariaqartinneqartoq puigortunngorneq puigortunngortartullu pillugit ullumi ataatsimiinnerup ataatsimiititalianilu suliat uppernarsarpaat.
Kalaallit Nunaanni puigortunngortarnerup qanoq atugaatigineranut uppernarsaatissat annikipput, suliassaqarfimmili misilittakkat tamarmik assigiimmik takutippaat puigortunngortartut amerliartuinnartut kiisalu puigortunngortarneq aamma inuusunnerit akornanni atugaaleraluttuinnartoq. Suliassaqarfimmi immikkut ilisimasallit nunatsinni innuttaasut puigortunngornermik assigiinngitsutigut eqqorneqarsimasut 500-t missaanniissasoraat, tamannalu immini naalakkersuinermik ingerlataqartut eqqumaniarnissaannut iliuuseqarnissaannullu pisariaqartitsivoq. Puigortunngornermik nappaatillit naatsorsuutigisamit amerlanerunissaat ilimanaateqarluarpoq, tassami nappaatip isumannaatsumik suussusersinissaanut peqqutit peqqutaasinnaasullu assigiinngitsut arlaliummata.
Taamaakkaluartoq puigortunngorneq puigortunngortartullu pillugit suliniutit nukittorsarnissaasa saniatigut pitsaanerujussuarmik ataqatigiissaarisoqartariaqarpoq. Utoqqaat angerlarsimaffiini paaqqutarinninnermillu suliffeqarfinni sulisut puigortunngorneq pillugu annertusisamik ilinniartinneqarnissamik pikkorissartinneqarnissamillu neqeroorfigineqarnissaat pisariaqartinneqarpoq, taamaalillutik taakku puigortunngortunut taakkulu qanigisaannut kiisalu nammineq imminnut iluaqutaasumik suliatigut ilisimasaqarnerulersinnaaqullugit.
Puigortunngorneq puigortunngortartullu pillugit kommunit peqqinnissaqarfiullu akornanni suleqatigiinneq annertusineqartariaqartoq pitsaanerusumillu ataqatigiissaarisoqartariaqartoq qularutissaanngilaq. Ataatsimiititaliat marluusut isumaqarput nappaatip aamma isorliunerusuni atugaanerujussuugunarnera pissutigalugu suliap kivinneqarnissaanut naalakkersuinermik ingerlataqartut annertunerusumik suliniuteqartariaqartut.
Kommuneqarfik Sermersuumi suliassaqarfimmi eqqummaarinnerujussuat, tassunga ilanngullugu suleqatigiinnissamut ataqatigiissaarinerullu annertusineqarnissaanut piumassuteqartoqarnera nuannerpoq.
Kalaallit Nunaanni puigortunngorneq pillugu ataatsimut suli pilersaarusiortoqanngilaq, taamaattorli puigortunngorneq puigortunngortartullu pillugit siunnersuutip UKA 2010/30-p ulloq 10. november 2010-mi aappassaaneerneqarnissaa ataatsimiititaliat qilanaarutigaat.
Ullumi ataatsimiinnermi ataatsimiititaliani ilaasortat makku peqataapput: Olga P Berthelsen (IA), Siulittaasoq, Debora Kleist, Siulittaasoq, (IA), Knud Kristiansen, (A), Astrid Fleischer Rex, (D), Jane Petersen, (IA), Loritha Henriksen, (KP).
Annertunerusumik paasisaqarniaraanni Ilaqutariinnermut Ataatsimiititaliami aammalu Peqqissutsimut Ataatsimiititaliami siulittaasut attavigineqarsinnaapput:
Debora Kleist, Siulittaasoq, Ilaqutariinnermut Ataatsimiititaliaq, mobil 49 03 90
Olga P. Berthelsen, Siulittaasoq, Peqqissutsimut Ataatsimiititaliaq, mobil 55 33 68