2024 2023 2022 Flere år...
05-11-2010
Ulloq 5. november 2010 Jonathan Motzfeldtip ilisaanerani Inatsisartut Siulittaasuata Josef Motzfeldtip eqqaaniaalluni oqaaserisai
"Sikikkumaarpugut ilaanni,
qaraartut mallit sissap saani.
Ilippagu qajaq piniartuusup
qimappagu
sakku uumassutituaasoq
kisimi akiuussutituaasoq,
atuunnerini ukiorpaat."
Juntaaq inuusuttuulluni taalliamini ilaatigut taama oqaaseqarpoq.
Inuiaat qinikkatut, inoqatitut ikinngutitullu qajavittarput qaannaminit niuvoq.
Inuiattut nanerussisartorput qimaguppoq.
Nunarput ukialerpoq, timmiannguit nipaallereerput.
Taamaattoq Juntaap nipaa isummersuutaalu anorip siorsuppalunneratut akornatsinni akisuartuassapput.
Qajaviit akornanni Qassimiuni perorsimanini inuunermini, isummersornermini navialiffiusinnaasunullu alaatsinaattuarnermini naleqqersuutimisut pingaartittuaramiuk isertunngisaannarpaa.
Ikinngutaalluartoq, akimanernik inukulunnguanillu taajumasakkaminik assigiinngisitsinani nalorninani nuannaartitsisoq isummersuiuartoq qasuerfissaminut annguppoq.
Erinarsorumatooq, erinnniortoq, taalliortoq, piniakkaminut qanittoq, palasi oqaluusillaqqissoq, iggarissoq, inuiassuit assigiinngisitaarnerannik mianerinnittoq, suli ilisimasaqarnerulerumalluni alapernaattuartoq inuianni siuttussatut inunngorsimasoq tulluussimaartaqaanga nunatsinni nunanilu tamani angalaninni tamanit apersuutigineqartuarlutit ataqqineqarnerit tusartuartarakku.
Kristjana, Karen, Klaus ilaqutaasullu tamassi peqatigalusi Inatsisartut aamma nanertisimapput siuttup inussuup qimammatigut.
Taamaattoq qujamasuppugut inuiattut neriunnermik qaqugumut najummerusutatsinnik ikkussivigisimammatigut.
Juntaamik ataqqinnilluta qujamasuuteqarnerput qanortoq inuiattut nakooqutitsitut ataatsimoorfiginiartigu.