2024 2023 2022 Flere år...
09-12-2010
Abel Silassenimik sølviusumik Nersornaasiineq
Inatsisartut Siulittaasuata ullumi ulloq 9. december 2010 umiarsuaaqqap naalagaa soraarneq Abel Silassen ("Abilleeraq") Nanortalimmi malunnartitsiniarnermi sølviusumik Nersornaaserpaa.
Siulittaasoqarfiup Abel Silassen sølviusumik Nersornaaserpaat kulturitta tammatsaaliorneqarnerani piffissami sivisuumi annertuumillu nersortariaqartumik suliaqarsimanera pissutigalugu.
Siulittaasup Abel Silassen pillugu oqaaseqarnermini manna erseqqissarpaa:
"Tunniusimallutit akuuffigisimasatit amerlaqaat, maannalu tamaasa taagornissaat annertuallaassaaq. Nalunngilarpulli 14-inik ukioqarlutit qajartaaqqaartutit paasisakkalu malillugit 1944-mi piniartorsuartut Kommunerådimit allagartartaartinneqarputit, taamanilu 19-iinnarnik ukioqarputit. Tamatuma kingorna umiartortutut ilinniarputit 1953-imiillu 1994-imut umiarsuarmi naalagaavutit, ukiuni siullerni 20-ini taamani Kongelige grønlandske Handeliusumi tamatumalu kingorna ukiuni 21-ini peqqinnissaqarfimmi. Peqatigiiffiit arlallit aallarneeqataaffigisimavatit, taakkununnga ilaapput angallatit naalagaasa peqatigiiffiat 1965-imi, Nanortalimmi Katersortarfiutileqatigiit aammalu Brugsen Nanortalik. Tamatuma saniatigut Nanortalimmi Kommunalbestyrelsimut 1967-imit 1972-imut ilaasortaasimavutit ilagiillu sinniisaannut 1977-imit 1998-imut ilaasortaasimallutit."
Josef Motzfeldt
Inatsisartut Siulittaasuat
Paasissutissat sukumiinerusut Inatsisartut Siulittaasuat Josef Motzfeldt angallattagaq 55 76 41 attaveqarfigalugu pissarsiarineqarsinnaapput.
