2024 2023 2022 Flere år...
25-02-2011
Inatsisartut isumaqatigiinniarneri 2011-mi upernaakkut ataatsimiinnermiit TV-kkut toqqaannartumik isiginnaarneqarsinnaalissapput
Sapaatip akunnerata tulliani upernaakkut
ataatsimiinneq aallartippat digital atorlugu aallakaatitsissutit
nutaat atorlugit ataatsimiinnerniit toqqaannartumik
aallakaatitsisoqartarsinnaanera Inatsisartut Siulittaasoqarfiata
ullumi akueraa.
Inatsisartut ataatsimiittarfianiit toqqaannartumik
aallakaatitsisalernissamik KNR-ip kissaateqarneranik Ineqarnermut,
Attaveqarnermut Angallannermullu Naalakkersuisup Jens B.
Frederiksenip saaffiginnissutaa tunngavigalugu siulittaasoqarfiup
nuannaarutigaa ukiorpassuarni kissaatigineqartarsimasoq maanna
naammassineqarsinnaalermat. Nutaamik aallakaatitsisalernikkut
ataat-simiinneq tamarmi isiginnaarutikkut
malinnaavigineqarsinnaassaaq.
Aallakaatitsissutinit analogiusunit digitaliusunut
2010-mi decembarimi ikaarsaariarnikkut nuna tamakkerlugu kanalit
aallakaatitsiviusartut amerlineqarsinnaalersimapput. Upernaakkut
ataatsimiinneq siunertamut tamatumunnga pilersinneqarsimasumi
tv-kkut kanalit tallimaanni aallakaatinneqartassaaq, taamaattumillu
kanalit allat Inatsisartunit toqqaannartumik
aallakaatitsisarlernikkut attorneqassanatik.
Peqatigitillugu tamanna aamma ajoraluartumik
isumaqarpoq ataatsimiinneq taamaallaat illoqarfinni digitaliusunik
aallakaatitsisarfiulersimasuni isiginnaarneqarsinnaassammat,
tassalu Uummannami, Qeqertarsuarmi, Ilulissani, Qasigiannguani,
Aasianni, Sisimiuni, Maniitsumi, Nuummi, Paamiuni, Narsami,
Qaqortumi Nanortalimmilu. Taamatuttaaq piumasaqaataavoq
isiginnaarutikkut malinnaarusuttut digitalimik aallakaatitanik
tigusisinnaanissamut eqqortunik
atortoqareernissaat.
Toqqaannartumik aallakaatitsisarneq aallaqqaammut
misiligutitut ingerlanneqassaaq, aallakaatitsisarnerillu
upernaakkut ataatsimiinneq naammassereerpat
nalilersorneqassallutik.
KNR peqatigitillugu pisarnertut ataatsimiinneq
radiukkut ualikkut ataatsiniit tallimanut aallakaatittassavaa.
Aallakaatitsinerilli pingasunngornikkut aqqanernut
aallartereertassapput, akunneq apeqquteqarfiusinnaasoq
aallarniutaasassalluni. Tamatuma saniatigut ataatsimiinneq
inatsisartut nittartagaatigut inatsisartut.gl-ikkut pisarnertut
toqqaannartumik malinnaavigineqarsinnaavoq.
Nutaaliornikkut tamatumuuna Inatsisartuni
isumaqatigiinniarnerit malinnaaviginissaannut periarfissat
ilaneqarnerisigut innuttaasut oqartussaaqataanerata ineriartornera
nukittorsarneqarpoq.
Josef Motzfeldt
Inatsisartut Siulittaasuat
Paasissutissat
sukumiinerusut Inatsisartut Siulittaasuat Josef Motzfeldt
angallattagaq 55 76 41 attaveqarfigalugu
pissarsiarineqarsinnaapput.