2024 2023 2022 Flere år...
06-04-2011
Inatsisartut 2011-mi upernaakkut ataatsimiinnertik Kommuneqarfik Sermersuumi kommunalbestyrelsip ataatsimiittarfiani naammassissavaat
Inatsisartut Siulittaasoqarfiata ullumi aalajangerpaa upernaakkut ataatsimiinneq naammassiniarlugu Kommuneqarfik Sermersuumi kommunalbestyrelsip ataatsimiittarfiani ataatsimiittoqassasoq. Taamatut aalajangerneq pivoq Inatsisartut allaffeqarfiisa ilaata ulorianartumik oqoqalersimaneranik pasitsaassinerit tunngavigalugit matoqqatinneqarnissaanik Sullivinnik Nakkutilliisoqarfik peqqussuteqareertorlu. Taamaattumik siulittaasoqarfiup nuannaarutigeqaa kommune nalunaaruteqarmat Inatsisartut kommunalbestyrelsip ataatsimiittarfia atorsinnaagaat upernaakkut ataatsimiinnermi ullut ataatsimiiffiusussat kingulliit ingerlanneqarnerinut.
Upernaakkut ataatsimiinnermi ullut ataatsimiiffiusussat sinneruttut sisamaagaluartut marluinnanngortinneqarput. Taamaalillutik Inatsisartuni ullut ataatsimiiffiusut 15-iat tallimanngornermi ulloq 8. april ingerlanneqassaaq ullullu ataatsimiiffiusut 16-iat kingullersaallu pingasunngornermi ulloq 13. april ingerlanneqassalluni. Ulluni taakkunani tamani ataatsimiinnerit nal. 10.00 aallartittassapput.
Taamaalilluni aamma immikkoortut ataatsimiinnermi matumani oqaluuserineqartussaagaluartut arfiniliinnaat 2011-mi ukiakkut ataatsimiinnissamut (UKA11) kinguartinneqassapput, tassalu Nunatta Karsiata 2010-mut naatsorsuutaasa siullermeerneqarnerat, apeqquteqaat aallaavigalugu oqallinnissamut siunnersuut ataaseq, taamatullu aamma aalajangiiffigisassatut siunnersuutit sisamat 2011-mi upernaakkut ataatsimiinnermi (UPA11) siullermeerneqareersut kisiannili ataatsimiititaliani naammassillugit suliarineqaqqaartussat Inatsisartuni aappassaaneerneqannginnerminni.
Kommunalbestyrelsip ataatsimiittarfiani ataatsimiinnerit internettikkut, radiukkut tv-kkullu aallakaatinneqarsinnaanissaannut periarfissat maanna sulissutigineqarput. Tamanna pillugu ulluni qaninnermi sukumiinerusumik paasissutissiisoqarumaarpoq.
Kommunalbestyrelsip ataatsimiittarfiani ataatsimiinnernut Inatsisartut akisussaasuusussaapput, taamaattumillu ullut ataatsimiiffiusussat taakku marluk pillugit saaffiginnissutit suugaluartulluunniit Inatsisartut Allattoqarfiannut ingerlatinneqartassallutik.
Ulluni ataatsimiiffiusussani taakkunani marlunni oqaluuserisassat immikkoortunik oqaluuserineqartussanik takussutissiissut tusagassiorfinnut nalunaarummut matumunnga ilanngunneqarput.
Josef Motzfeldt
Inatsisartut Siulittaasuat
Paasissutissat sukumiinerusut Inatsisartut Siulittaasuat Josef Motzfeldt angallattagaq 55 76 41 attaveqarfigalugu pissarsiarineqarsinnaapput.