2024 2023 2022 Flere år...
16-09-2011
Josef Motzfeldt Inatsisartut Siulittaasuattut qinigaaqqippoq
Ullumi nalunaaqutaq aqqaneq qaangilaaraa Inatsisartut Siulittaasuata Josef Motzfeldtip Inatsisartut 2011-mi ukiakkut ataatsimiinnerat ammarpaa.
Inatsisartut ataatsimiinnerat Inatsisartut Siulittaasoqarfiannik nutaamik qinersinermik aallartinneqarpoq.
Inatsisartut Siulittaasuattut Josef Motzfeldt qinigaaqqippoq. Taamatuttaaq siulittaasoqarfimmut ilaasortaareersut tamarmik qinigaappit:
Siulittaasoq Josef Motzfeldt (IA) | Sinniisussaralugu Aqqaluaq B. Egede (IA) |
Siulittaasup tullia siulleq Per Berthelsen (S) | Sinniisussaralugu Malik Berthelsen (S) |
Siulittaasup tulliisa aappaat Olga P. Berthelsen (IA) | Sinniisussaralugu Debora Kleist (IA) |
Siulittaasup tulliisa pingajuat Finn Karlsen (S) | Sinniisussaralugu Karl Lyberth (S) |
Siulittaasup tulliisa sisamaat Justus Hansen (D) | Sinniisussaralugu Astrid Fleischer Rex (D) |
Inatsisartut aamma aalajangerpaat ataatsimiititaliat sinnerinut ilaasortassanik qinersinissaq aatsaat pissasoq Inatsisartut Suleriaasiata allannguuteqartinneqarnissaa akuersissutigineqareerpat. Tamatuma ulloq 22. september pinissaa naatsorsuutigineqarpoq.
Siulittaasussamik siuliittaasoqarfimmullu ilaasortassanik qinersisoqareermat ileqquusutut Naalakkersuisut Siulittaasuat ammaanermi oqalugiaateqarpoq.
2011-mi ukiakkut ataatsimiinnermi ullut ataatsimiiffiusut 24-ussasut pilersaarutigineqarpoq. Ullut ataatsimiiffiusut ataasiakkaat ingerlaavartuussapput, taamalu oqaluuserisassat ullormi oqaluuserineqarfissaminni angumerineqanngitsoortut ullormi ataatsimiiffiusussami tullermi oqaluuserineqartassallutik.
Ukiakkut ataatsimiinnerup novembarip ulluisa 15-ianni naammassineqarnissaa naatsorsuutigineqarpoq.
Josef Motzfeldt
Inatsisartut Siulittaasuat
Paasissutissat sukumiinerusut Inatsisartut Siulittaasuat Josef Motzfeldt angallattagaq 55 76 41 attaveqarfigalugu pissarsiarineqarsinnaapput.