Nutaarsiassat

25-01-2012

Inatsisartuni Ilaqutariinnermut Peqqissutsimullu ataatsimiititaliap tusagassiorfinnut nalunaarutaa

Inatsisartut ataanni Ilaqutariinnermut Peqqissutsimullu ataatsimiititaliami ilaasortat ulluni 19.-22. januar 2012, assigiinngitsunik arlalinnik suliaqarnertik nangillugu Nuummi naapipput.

Ataatsimiititaliami ataatsimiinnerit assigiinngitsut saniatigut kræftimut pilersaarut UKA 2013-imi akuerineqartussatut naatsorsuutigineqartoq pillugu Peqqissutsimut Naalakkersuisoq peqatigalugu isumasioqatigiisitsineq ingerlanneqarpoq. Tassani peqataasutKræfti pillugu nassuiaat 2011-meersoq aallaavigalugu 2012-imi kræftimut pilersaarutip piviusunngortinneqarnissaanut suliat ingerlanneqareersut suliassallu pillugit nassuiaammik sukumiinerusumik tunineqarput. Peqqinnissaq pillugu naalakkersuinikkut suliallit akornanni naalakkersuinikkut isumaliuutinik eqqartuinissamut periarfissap saniatigut ataatsimiititaliaq nakorsaanernit peqataasunit paasissutissanik  pingaarutilinnik pissarsivoq. Kræftimut pilersaarutip inaarutaasumik naammassineqarnissaanut suliaqarnerup ingerlaqqinnissaa ataatsimiititaliamit tapersersorneqarpoq. Suliassaq annertooq suli pisussaavoq, nakorsianillu sullissinerup isumassuinerullu saniatigut kræftimik eqqugaasut qanigisaasa annertuumik eqqumaffigineqarnerat ataatsimiititaliap naammagisimaarluarlugu maluginiarpaa. Aammataaq kræfti pinaveersaarniarlugu suliniutit nukittorsarneqarnissaat ataatsimiititaliamit tapersersorneqarpoq.

Ataatsimiititaliaq tamatuma kingorna Innuttaasunik sullissivikpillugu KANUKOKA-meersunik ataatsimeeqateqarpoq, innuttaasunullu nittartagaq www.sullissivik.gl, januar 2012-ip naalernerani atuutilertussatut naatsorsuutigineqartoqKANUKOKA-mit ilisaritinneqarpoq. Innuttaasunut nittartakkamik saqqummiinerup saniatigut suliassaqarfimmi naalakkersuinikkut anguniakkat  eqqartorneqarput. Innuttaasunut nittartagaq atuutilertussaq ataatsimiititaliap annertuumik isumalluarfigaa, innuttaasunillu tigulluarneqarnissaa kiisalu kommunini innuttaasut akornanni attaveqatigiinnermut pitsanngorsaataanissaa neriuutigalugu.

Aammattaaq ataatsimiititaliap ulloq unnuarlu paaqqinnittarfimmut Aaqa-mut Nuummiittumut pulaarnissaminut periarfissaqarsimavoq. Aaqa tassaavoq inersimasunut tarnimikkut nappaatilinnut ulloq unnuarlu paaqqinnittarfik. Ulloq unnuarlu paaqqinnittarfinnut paasisassarsiorluni pulaarnissani ataatsimiititaliap pingaartippaa, taamaaliornikkut naalakkersuinikkut suliat ingerlaqqinneranni najugaqartunut sulisunullu atugassarititaasut  ilaasortanit ataatsimiititaliamillu eqqumaffigineqassammata, inunnillu isumaginninnermi naalakkersuinikkut ingerlataqarnermi suliassagut pitsaasumik, imminut nammassinnaasumik akisussaassuseqartumillu ataatsimoorullugit kivinneqarsinnaaniassammata.

Sapaammi 22. januar 2012 Kalaallit Nunaanni peqatigiiffik MCS-miit (Tipinut akuutissanullu Malussarissut/Sapigaqartut Peqatigiiffiata) ataatsimiititaliamut ilaasortaanullu sassarnissaminnut periarfissaq atorpaat. Tipinik akuutissanillu malussarissut/sapigallit ulluinnarni inuunerannut tipigissaatit akuutissallu qanoq ajortumik sunniuttarnerat pillugu paasissutissanik nalilinnik ataatsimiititaliaq tunineqarpoq. Ajornartorsiutip qanoq aaqqiivigineqarsinnaaneranik piffissami aggersumi ataatsimiititaliaq Naalakkersuisullu oqaloqatigiissapput.

Kiisalu ataatsimiititaliap ataatsimiinnermini suliassaqarfimmini sammisat arlallit immikkut ittut siunnersuutillu oqallisigisimavai. Nuummi ulluni sammisaqarfiusuni suliarineqartut oqallisigineqartullu pillugit ataatsimiititaliaq piffissami aggersumi partiinut attuumassuteqartunut kiisalu minnerunngitsumik Naalakkersuisunut malitseqartitsissaaq.

Immikkut sammisaqarluni ataatsimiinnerit Nuummi ingerlanneqarneranni ataatsimiititaliami ilaasortat peqataasut tassaapput: Olga P. Berthelsen (IA), Siulittaasoq, Debora Kleist, Siulittaasut tullia, (IA), Astrid Fleischer Rex, Demokraatit, Isak Hammond, (IA), Malik Berthelsen, (S) og Ruth Heilmann (S). 

Paasissutissanik amerlanerusunik piniarnermi Ilaqutariinnermut Peqqissutsimullu ataatsimiititaliap siulittaasua Olga P. Berthelsen, oqarasuaammut angallattakkamut 55 33 68-mut attavigineqarsinnaavoq.