2024 2023 2022 Flere år...
29-02-2012
Inatsisinut Ataatsimiititaliamit Folketingip Eqqartuussiveqarnermut Ataatsimiititaliaanut: Pissutsit Ilungersunarput.
Inatsisartut Inatsisinut Ataatsimiititaliaa Nuummut Københavnimullu paasisassarsiorluni angalaqqammerpoq. Nuummi ataatsimiititaliap pinerluuteqarsimasunik isumaginnittoqarfimmit aallartitat, politiit/unnerluussisussaatitaasut kiisalu eqqartuussiviit ataatsimeeqatigai. Københavnimi Ataatsimiititaliap ilaatigut Folketingip Eqqartuussiveqarnermut Ataatsimiititaliaa ataatsimeeqatigalugu. Kalaallit Nunaanni piffissami atuuttumi inissiisarfinnut inissitassanngorlugit pineqaatissitanut inissanik amigaateqarnerup ajornartorsiutaanera eqqartorlugu.
Kalaallit Nunaanni pineqaatissinneqarsimasunut inissiisarfimmi inissat tamarmiusut 153-iupput, massakkullu pineqaatissinneqarlutik inissitaanissaminnik utaqqisut inuit 300-ut missaaniillutik. Taamaammat pineqaatissitat inissiisarfinnut inissamik utaqqisut, massakkut isertitsivinni inissinneqarsimasuniit marloriaammik amerlanerungajapput. Piffissami qanittumi pissutsit suli ilungersunarnerulernissaat naatsorsuutigineqarpoq, tassami qaammatit marluinnaat ingerlaneranni ilimagineqarmat pineqaatissinneqarlutik pinerlussimasunut inissiisarfinnut utaqqisuutit 400-uulereersimanissaat.
Tassa imaappoq, pineqaatissitat pinerluuteqarsimasunut inissiisarfimmi inissaminnik piffissami sivisuumi utaqqisariaqartarput. Pissutsit massakkutut itsillugit inissiisarfinnut utaqqisuutit affaat sinnerlutik ukiup aappaata affaa sinnerlugu pineqaatissitanut inissiisarfimmi inissaminnik utaqqisimapput.
Inatsisinut Ataatsimiititaliap pissutsit taamaannerat illersorneqarsinnaanngitsutut isigaa, tamannalu Folketingip Eqqartuussiveqarnermut Ataatsimiititaliaanut erseqqissaatigisimallugu: Ataatsimiititaliap nalunngilaa Inatsisinik atuutsitsinermut ministeriaqarfiup akisussaaffiini aamma aningaasatigut inissisimaneq ilungersunarmat, Folketingimulli ilaasortat ima imminnut aperisariaqarput: Pineqaatissinneqarnermiit pineqaatissinneqarsimasunut inissiisarfimmi isertinneqarnissamut piffissaq qanoq sivisutigisoq sivisunerpaamik utaqqisoqartassava? Kalaallit Nunaanni inissiisarfinnut inissitassanngorlugit pineqaatissitat ilaqarput ukiut pingasut missaat tikillugit utaqqisariaqartunik. Pissutsit taamaattut Danmarkimi atuuttuuppata Folketingip akuersaarsimassagaluarpai?