2024 2023 2022 Flere år...
06-03-2012
Inatsisartut Siulittaasuat Whitehorse-imi Issittormiut Ukiuunerani Unammiuaatigiinnerinik Arctic Winter Games malinnaavoq
Inatsisartut Siulittaasuat Josef Motzfeldt Kalaallit Nunaanni Timersoqatigiit Kattuffiannit Canadami Whitehorse-imi Issittormiut Ukiuunerani Unammiuaaqatigiinnerannut Arctic Winter Gamesimut marsiup ulluisa sisamaannit qulingannut 2012 ingerlanneqartumut qaaqquneqarsimavoq.
Timersuutit assigiinngitsut, soorlu Inuit pinnguaataannik unammiuaarnernut, nunatta Alaskallu isikkamik arsarlutik unamminerannut, taamatullu aamma nunatta Albertallu volleyballimik unamminissaannut Inatsisartut Siulittaasuata malinnaalluni isiginnaarnissaa naatsorsuutigineqarpoq. Inatsisartut Siulittaasuat taamatuttaaq unammiuaarnerit ingerlanneranni pisunut pisortatigoornerusut peqataasassaaq.
Canadami nunap immikkoortuisa ilaanni Yukonimi illoqarfiit pingaarnersaanni Whitehorse-imi Issittormiut Ukiuunerani Unammiuaarnerisa Arctic Winter Gamesip pisortatigoortumik ammarneqarnissaa sioqqullugu Inatsisartut Siulittaasuat aaqqissuussinernut assigiinngitsunut peqataavoq. Aaqqissuussinerit taakku ilagaat unammiuaarnerit "innerata" nunap immikkoortuani tamatumani nunap inoqqaavisa kulturikkut illorsuartaavata nutaap silataani silagissuullu ataani qaqqarsuarnit kusanaqisunik ungaluneqarsimasutut ililluni pisortatigoortumik ikinneqarnera.
Pisortatigoortumik ammaanersiorneq sapaammi unnukkut Canada Games Centremi ingerlanneqarpoq. Canadama Games Centre inersuuvoq timersuutinik assigiinngitsorpassuarnik ataatsikkut ingerlatsivigineqarsinnaasoq, pitsaasumillu takutitsiviusoq illorsuarmi ataatsimi qanoq timersuutit assigiinngorpassugaluartut ingerlanneqarsinnaanerannut periarfissat ataatsimoortinneqarsinnaanerannik.
Siulittaasoq taamatuttaaq 2016-imi Issittormiut Ukiuunerani Unammiuaaqatigiinnissaannut pisortatigoortumik atsioqatigiinnermut unammiuaarnerillu pisortatigoortumik kusanaqisumik ammarnersiorneqarnerata kinguninngua pisumut najuuppoq. Atsioqatigiinnikkut taamaalilluni nunarput 2016-imi unammiuaarnissamik aaqqissuisussanngorpoq.
Unammiuaarnerit ammarneqarnerannut atatillugu Siulittaasoq oqarpoq:
"Qamannga pisumik nuannaarutissaavoq tusarlugu aaqqissuussinernut AWG-tut ittunut nammineq piumassutsimik suleqataasut taama amerlatigisut peqataanerat. Whitehorse-imi aaqqissuussinermut nammineq piumassutsimik suleqataasut 2.000-it missaat unammiuaarnerit ingerlanneqarnerinut peqataapput, taakkoqanngikkaluarpallu AWG ingerlanneqarsinnaassanngikkaluarluni. Tamatuma saniatigut aamma suliffeqarfiit aningaasatigut ulluinnarnilu suliassat eqqarsaatigalugit toqqaannartumik sullissinikkut tapersersuerusunnerat annertoqaaq.
Nunatsinnit peqataasut eqqarsaatigalugit aamma malunnarpoq Kalaallit Nunaanni Timersoqatigiit Kattuffiannit tassanngaanniillu nammineq piumassutsimik suleqataasunit angalanermut peqataasunit tunniusimaneq annertusoq kusanartorlu, tassami aamma taakku peqataasimanngitsuuppata nunatsinnit peqataasussarpassuit unammiuaarnernut peqataatinniarneqarnerat tamatumalu annertuumik ataqatigiissinniarneqarnera ajornarsimassagaluarmat.
Nunatsinni issitttormiut ukiuunerani unammiuaaqatigiinnissaannut AWG-mut nunatsinni ingerlanneqartussamut qulliunerusumik piumasaqaatit kissaatigisallu oqallisiginiarlugit nunanit peqataatitaqartunit ministerit ataasinngornermi ulloq 5. marts ataatsimiinneranni alaatsinaatsutut peqataaninni maluginiarparattaaq taamatut naalakkersuinikkut qaffasissumik naapeqatigiinnermi ataatsimiinnermut peqataasut qanoq naligiitsigisumik peqataanersut. Issittumi nunanit arlalinnit ministerit peqataapput, namminerlu taamatut qaffasitsigisumik naalakkersuinikkut isumaqatigiinniarnerni allani ilaatigut misigisarsimanngisannik matumani naligiimmik isumaqatigiinniarnerat ingerlanneqarput,apeqqutaatinnagu peqataasut nammineq naalagaaffiunersut, nunap immikkoortuaneersuunersut namminersortumit imaluunniit nunamiit namminersorfiusumeernersut. Taamatut aporfeqanngitsumik ataatsimiinnermut peqataanermik misigisaq kissaatiginaraluarpoq aamma nunat assigiinngitsut akornanni isumaqatigiinniarluni ataatsimiittarnernut allanut nuunneqarsinnaanissaa, ilaatigummi tamatuma akerlerluinnaanik misigisaqarsinnaasaratta.
Inuusuttortatsinnut neriuutigaara kaammattuutigalugulu 2016-imi Issittormiut Ukiuunerani Unammiuaaqatigiinnissaata nunatta aaqqissuussisussanngornerani ataatsimut kivitseqataaqqullugit, periarfissarlu tamanna atorniaqqullugu nunat sanilerisatta kulturiinik nunallu tamalaat akornanni aaqqissuussinermik annertuumik ingerlataqarneq eqqarsaatigalugit piginnaasaqarnerulernissamut paasisimasaqarnerulernissamullu.
Aaqqissuussineq inuusuttunut sammititaq matumani pineqarpoq, timersornikkullu aaqqissuussinernut pikkorinnertut sunngiffimmiluunniit ingerlataqartarneq tunngavigalugit peqataaneq apeqqutaatinnagit, taava aaqqissuussinerit matumanisut ittut nalissaqanngitsumik periarfissiipput kulturinik allanik timersornerullu ataatsimoorfiusinnaaneranik misigisaqartarnissanut."
Josef Motzfeldt
Inatsisartut Siulittaasuat
Paasissutissat sukumiinerusut Inatsisartut Siulittaasut Josef Motzfeldt mobil 55 76 41 attaveqarfigalugu pissarsiarineqarsinnaapput.
