2024 2023 2022 Flere år...
28-06-2012
Kunngikkormiut aaqqissuussinernut assigiinngitsunut pisortaat kammerherriutigisoq Christian Eugen-Olsen Københavnimi sølviusumik Nersornaaserneqarpoq
Inatsisartut Siulittaasuata ullumi ulloq 28. juni 2012 kunngikkormiut aaqqissuussinernut assigiinngitsunut pisortaat, ceremonimester, kammerherriutigisoq Christian Eugen-Olsen Københavnimi nunatta sinniisoqarfiani nalliuttorsiualaarnermi sølviusumik Nersornaaserpaa.
Siulittaasoqarfiup Christian Eugen-Olsen sølviusumik Nersornaaserpaa piffissami sivisuumi annertuumillu nalitsinni nunatsinni kulturikkut ilinniartitaanikkullu ineriartornissamut killiliussat annertusarneqarnerinut nersortarialimmik nunatsinnik sullissisimanera tunngavilersuutigalugu.
Siulittaasup Christian Eugen-Olsenimut oqaaseqarnermini ilaatigut makku erseqqissarpai:
"1990-imiilli kunngikkormiut aaqqissuussinermut assigiinngitsunut pisortaattut kammerherretullu kunngikkormiut nunatsinnut tikeraartarnerpassui - annertunerusut annikinnerusullu - aaqqissuunneqarnerinut peqataasarsimavutit, soorlu aamma Inatsisartut Naalakkersuisullu kunngikkormiullu akornanni attaveqaataasimasutit pingaarutilik. Sulinikkut qularnaartarsimavat kunngikkormiut nunatsinnut tikeraarnerisa ataqqinassuseqartumik inuiaqatigiinnillu kalaallinik annertuumik ataqqinnissuseqarluni ingerlanneqartarsinnaasimanerat.
Suliassatit tamakku isumagisimavatit nipilersornermik soqutigisaqarnerit nunatsinnilu kulturitsinnik paasinnilluarsimanerit saqqumilaartittuarlugit, tassuunalu aamma annertuumik tunniussaqarsimallutit kunngikkormiunik tikeraartoqartarnerup nunatta pitsaasumik avataaniit isigineqarneranut nukittorsaataasimasumik.
Nunatsinnut tunniusimanerit sullisserusunnerillu taamatuttaaq aamma allatigut ersersittarsimavat assersuutigalugu Ilimmarfik pilersinneqarnialermat tapersersuisutut ataatsimiititaliami peqataasimanikkut maannalu kingullermik Nunatta Eqqumiitsulianik Saqqummersitsivianik pilersitsiniarluni sulinermi peqataanikkut."
Josef Motzfeldt
Inatsisartut Siulittaasuat
Paasissutissat sukumiinerusut Inatsisartut Siulittaasuat Josef Motzfeldt angallattaqaq 55 76 41 attaveqarfigalugu pissarsiarineqarsinnaapput.
