2024 2023 2022 Flere år...
24-08-2012
Siulittaasoqarfiup 2012-mi Inatsisartut ukiakkut ataatsimiinnerminni oqaluuserisassaat saqqummiuppai
Inatsisartut Siulittaasuata Josef Motzfeldtip nuannaarutigaa 2012-imi natsisartut ukiakkut ataatsimiinnissaannut UKA2012-imut oqaluuserisassat saqqummiussinnaagamigit, siunnersuuteqarnissamut killissarititaasumit tallimanngornermit aggustip ulluisa 17-iannit ullut arfineq-marluk qaangiutiinnartullu. Oqaluuserissat taama siusitsigisukkut saqqummiunneqarsinnaanerat nuannaarutissaavoq, taamaaliornikkummi Inatsisartunut ilaasortat, innuttaasut allaffeqarfiillu ataatsimiinneq aallartitsinnagu piareersarnissaminnut sapinngisamik sivisunerpaamik piffissaqartinneqassammata.
Inatsisartut ukiakkut ataatsimiinnerat septembarimi tallimanngornerit pingajuanni 21. september aallartissaaq pilersaarutigineqartullu malillugit ulloq 27. november naammassissalluni.
Ullut ataatsimiiffiusut katillugit 25-unissaat pilersaarutigineqarpoq. Ulluni ataatsimiiffiusuni oqaluuserisassat ingerlaavartussaapput, taamaalillunilu immikkoortut ulluni pilersaarutigineqartutut oqaluuserineqarfissaminni naammassineqanngitsut ullormi ataatsimiiffiusumi tullermi oqaluuserineqartassallutik.
UKA2012-imut oqaluuserisassanut ilaasortat siunnersuutaat nutaat 57-it ilanngunneqarput Naalakkersuisullu immikkoortunik oqaluuseritikkusutaminnik nutaanik 29-nik nalunaaruteqarlutik, taakkulu saniatigut immikkoortut 18-it siusinnerusukkut ataatsimiinnernit kinguartinneqarsimasut siullermeerneqareersulluunniit oqaluuserisassaassallutik.
Sapaatit akunnerini assigiinngitsuni ullut ataatsimiiffiusussat ima agguataarneqarput:
Sapaatit akunnerini 38, 39, 40, 41, 42, 43, 45 aamma 46-mi nal. 13.00-imiit 18.00-imut sapaatip akunneranut ullut ataatsimiiffiusartussat pingasuussapput (marlunngornerit, pingasunngornerit sisamanngornerillu).
Sapaatit akunnerat 44 Inatsisartuni ataatsimiiffiussanngilaq Nunat Avannarliit Siunnersuisoqatigiiffiata ataatsimiinnera pissutigalugu. Taamaattorli ataatsimiititaliat sapaatip akunnera taanna sulinertik allanngortinnagu aamma sulissapput.
Sapaatit akunneranni 47-mi ullut ataatsimiiffiusussat marluussapput (marlunngorneq pingasunngornerlu) sapaatillu akunnerat 48 naatsorsuutigineqarpoq kingullertut ataatsimiiffiussasoq ulloq ataatsimiiffiusussaq ataasiulluni (marlunngorneq).
Inatsisartut Suleriaasianni § 37 malillugu sapaatip akunnikkaartumik akunnermik apeqquteqarfiusinnaasoqassasoq Siulittaasoqarfiup taamatuttaaq pilersaarutigaa. Akunneq apeqquteqarfiusinnaasoq taanna pingasunngornerit tamaasa nal. 11:00-imiit 12:00-imut ingerlanneqartassaaq, tamannalu pereeraangat nal. 13:00 ataatsimiinnerup aallarteqqinneqarnissaanut unillatsiartoqartassalluni.
Siulittaasoqarfik taamatuttaaq 2013-imi upernaakkut ataatsimiinnerup qaqugu aallartinnissaanut siunnersuuteqarpoq, siunnersuutigineqarluni UPA13 ulloq 8. marts 2013 aallartissasoq, ulloq 1. februar 2013 nal. 12.00 siunnersuutinik tunniussinissamut killissaritinneqarluni. Immikkoortoq taanna UKA12-imi ullormi ataatsimiiffimmi siullermi oqaluuserineqassaaq.
UKA2012-imut atatillugu atortussat tamarmik Inatsisartut nittartagaanni inatsisartut.gl-imi takuneqarsinnaapput. Ingerlaavartumik atortussat qarasaasiakkut allakkatigut pisartagarineqarsinnaapput. Tamanna kissaatigigaanni Laila Kristiansen lkri@inatsisartut.gl attaveqarfigineqarsinnaavoq.
Josef Motzfeldt
Inatsisartut Siulittaasuat
Paasissutissat sukumiinerusut Inatsisartut Siulittaasuat Josef Motzfeldt angallattagaq +299 55 76 41 attaveqarfigalugu pissarsiarineqarsinnaapput.