2024 2023 2022 Flere år...
27-09-2012
Oqaatsit pillugit inatsisissatut siunnersuut siunnersuutit allat tamaasa assigalugit taamatut Siulittaasoqarfimmi suliarineqarpoq
Sermitsiap nittartagaatigut atuarneqarsinnaavoq Ilaqutariinnermut, Kultureqarnermut Ilageeqarnermut Naligiissitaanermullu Naalakkersuisup tupigusuutigigaa oqaatsit pillugit inatsisissatut siunnersuut 2012-imi ukiakkut ataatsimiinnermut UKA12-imut oqaluuserisassanut ilanngunneqarsimanngimmat.
Aallaqqaasiutigalugu oqaatigineqassaaq UKA2012-imut oqaluuserisassat ulloq 23. august 2012 tamanut nassiunneqarmata. Taamaalilluni sapaatit akunnerini arlalinni ilisimaneqareerpoq oqaatsit pillugit inatsisissatut siunnersuut oqaluuserisassanut ilaanngitsoq.
Ilaqutariinnermut, Kultureqarnermut, Ilageeqarnermut Naligiissitaanermullu Naalakkersuisoqarfimmit oqaatsit pillugit inatsisissatut siunnersuut siunnersuutillu ataasiakkaat allat ulloq siunnersuutinik tunniussivissamut killigitinneqartoq 17. august 2012 nal. 12.00 qaangiutereersoq tunniunneqarput.
Siulittaasoqarfiup aalajangersimasumik suleriaaseraa Naalakkersuisunit Inatsisartunullu ilaasortanit siunnersuutit ilusissanut piumasaqaatinik naammassinninngitsut, tassungalu ilanngullugu kingusinaartumik tunniunneqartut, oqaluuserisassanut ilanngunneqartannginneri. Taamaattumik Naalakkersuisoqarfimmit siunnersuutit kingusinaartumik tunniunneqartut Siulittaasoqarfimmit isumaqatigiittumit itigartinneqarput.
Oqaluuserisassat nassiunneqareersut Naalakkersuisut Siulittaasoqarfimmut oqaluuserisassanut ilanngussinissanik immikkut akuersissuteqarnissanik qinnuteqarput. Taakku nassiunneqarput Inatsisartut suleriaasianni § 41 innersuussutigalugu. Tamatuma kingorna immikkut akuersissuteqarnissanik qinnuteqaatit taakku Siulittaasoqarfiup ataatsimiinnermini nalilersorpai. Siunnersuutit ilaat eqqarsaatigalugit Siulittaasoqarfik isumaqarpoq immikkut akuersissuteqarnissamut tunngavilersuutigineqartut tunngavissaalluartut qinnuteqaatip akuerineqarnissaanut. Siunnersuutit allat eqqarsaatigalugit tamanna atuutinngilaq.
Aalajangernernut taakkununnga tunuliaqutaasut pillugit sukumiinerusumik massakkut oqallisiginninnissaq, minnerunngitsumik tusagassiorfitsigut, Siulittaasoqarfiup tunngaviusumik kissaatiginngilaa.
Taamaalilluni erseqqissarneqassaaq oqaatsit pillugit inatsisissatut siunnersuummik siulittaasoqarfiup suliarinninnera, suleriaaseq siunnersuutinut allanut tamanut aamma atuussimasoq maleqqissaarlugu pisimammat.
Josef Motzfeldt
Inatsisartut Siulittaasuat
Paasissutissat sukumiinerusut Inatsisartut Siulittaasuat Josef Motzfeldt angallattagaq 55 76 42 attaveqarfigalugu pissarsiarineqarsinnaapput.