2024 2023 2022 Flere år...
28-09-2012
Inatsisartut Siulittaasuat Josef Motzfeldt OLT-t Ilulissani ataatsimiinneranni EU-mut tunngasunut ministerimik Nikolai Wammenimik naapeqateqarpoq
Septembarip ulluisa 26-ianni Ilulissani nunat EU-mi nunanit nunasiaatigineqarsimasut OLT-t ataatsimiinneranni danskit EU-mut tunngasunut ministeriata Inatsisartut Siulittaasuat Josef Motzfeldt apeqqutit EU-mut tunngasut pillugit naalakkersuinikkut paasissutissanik paarlaasseqatigiinnissaq siunertaralugu ilisimateqatigiiffiumik ataatsimeeqatigiinnermut qaaqquaa.
Ilisimateqatigiiffiusumik ataatsimiinneq assut paasisaqarfiuvoq apeqquterpassuit EU-mut tunngasut illuatungeriinniit naalakkersuinikkut oqallisigineqarlutik, tassunga ilanngullugit Nunat Avannarliit Killiit Siunnersuisoqatigiiffiata EU-milu inatsisartut suleqatigiinnerat, EU-p nunattalu aalisarneq pillugu isumaqatigiissutaat kiisalu nunatta EU-llu akornanni pisuussutit uumaatsut pillugit suleqatigiinnissamik qanittukkut isumaqatigiissut.
Inatsisartut Siulittaasuata EU-mut tunngasunut ministeri ilisimatippaa nunatsinni uuliasiorneq aatsitassarsiornerlu eqqarsaatigalugit nalinginnaasumik naalakkersuinikkut oqallinneq pillugu, taamatullu aamma tamatumani siunissami suleqatigineqartartussat eqqarsaatigalugit nunatta sumut ingerlanissaa naatsorsuutigineqarsinnaanersoq. Inatsisartuni naalakkersuinikkut oqallinnerit aamma ersersippaat pisuussutit uumaatsut eqqarsaatigalugit suleqateqarnissamut asiap kangiani nunat suliffeqarfiillu annertuumik timitalimmillu soqutiginninnerusut EU-p europamilu suliffeqarfiit soqutiginninnerannut sanilliullugu.
Siulittaasup ilisimatitsissutigaa ingerlatassanik annertuunik aatsitassanillu piiaavinnik qanoq amerlatigisunik ataatsikkut aallartitsisinnaanermik aalajangiinissat eqqarsaatigalugit nunarput ukiuni aggersuni annertuunik unammilligassaqartoq, soorlu aamma pingaaruteqanngitsuunngitsoq nunanit allanit aningaasalersuinermik ingerlatseqatigiiffiit ingerlanniakkanut annertuunut tunuliaqutaasinnaasut kikkunnit qanorlu pigineqarnerat paaseqqissaassallugu. Taamatuttaaq pisariaqarpoq sukumiinerusumik paasissallugu EU-mi taamatut ingerlanniakkat annertuut aningaasalersornissaannut naammattumik piumassasuseqartoqarnersoq aningaasaatitigullu piginnaasoqarnersoq. Inatsisartuni piffissami aggersumi isumaqatigiinniarnissat naalakkersuinikkullu oqallinnissat takutikkumaarpaat apeqqutinut tamakkununnga nunatsinni naalakkersuinikkut isummat sumiinnersut.
Illuatungeriit taamatuttaaq oqallisigaat ukiuni aggersuni EU nunarpullu ataatsimut sunik ilaatigut nunarsuatsinni suleqatigeeriaatsit nutaarluinnaat saqqummeriartorneranni qaangerniagassaqassanersut, massakkummi takuneqarsinnaalereermat annertuunik nutaanik suleqatigiiffissaqartoq misilittakkanik nutaanik katersuiviusinnaasunik. Siunissami suliniutinik annertuunik nunatsinni aallartitsisoqarsinnaanera nutaajuvoq, taamatullu ingerlanniakkat annertuut nalinginnaasumik nunani Norgetut Canadadullu ittuni nassaassaareerput, taakkunanilu misilittagaqartoqareerluni assersuutigalugu Danmarkimi misilittagarineqarnikuunngitsunik. Ingerlanniakkat annertuut taakkulu tunngavigalugit soqutigisat assigiinngitsut pilersinnaasut naalagaaffeqatigiinnermi suleqatigiinnermi ataatsimut unammiligassaassapput nutaat, naalagaaffeqatigiinnermi killiliussat iluanni unammilligassanik naalakkersuinikkullu oqalliseqarnissanik nutaanik qularnanngitsumik nassataqartussat.
Inatsisartut Siulittaasuata ministerillu isumaqatigiissutigaat naalagaaffeqatigiinneq ataavassappat tamanna paaseqatigiiffiusumik ataavartinneqarlunilu ineriartortinneqartariaqartoq, tamatumunnga ilanngullugu aamma nunatsinni inuiaqatigiit nutaaliaasut ineriartornerat pillugu qallunaat nalinginnaasumik ilisimasaat aamma piffissap ingerlanerani annertusartariaqartut, imaassorinarmammi kalaallit, inuiaqatigiit danskit pillugit, taakku inuiaqatigiit kalaallit pillugit ilisimasaannit, ilisimasaqarnerusut. Siunissami paasissutissiissuteqartarnikkut tamatuma ilorraap tungaanut saatinneqarnissaa illuatungeriit tamarmik kissaatigaat.
Inatsisartut Siulittaasuata taamatuttaaq ministeri ilisimatippaa Nunat Avannarliit Killiit Siunnersuisoqatigiiffiata EU-llu akornanni inatsisartutigoortumik suleqatigiinneq pillugu. Tamatumani ilaatigut EU-p aalisarnermut tunngatillugu ingerlatsinera illuatungeriit arlaleriarlutik oqallisigisarsimavaat. Nunat Avannarliit Killiit Siunnersuisoqatigiiffiat tamatumunnga atatillugu EU-p inatsisartuinut ilaasortanik aalajangersimasumik ataatsimeeqateqartalersimavoq, taakkunanili ullutsinni naalakkersuisunikkut sammisaasut assigiinngitsorpassuit oqallisigineqartarsimallutik, soorlu apeqqutit puisinniartarnermut arfanniartarnermullu tunngasut, avaleraasartuunik aalisarnemut tunngasut aamma issittumik EU-p annertusiartuinnartumik soqutiginnileriartornera. Taamatut naapeqateqartarneq pitsaasunik angusaqarfioreerpoq, tassami taakku tunngavigalugit EU-p inatsisartui puisinit nioqqutissianik EU-mut eqqusseqqusiunnaarneq tamatumalu inuiaqatigiinnut kalaallisut sunniutai pillugit tusarniaatitsisimammat, kingullertigullu avaleraasartuunik aalisarneq pillugu EU-p inatsisartuinut ilaasortanik qanittumik oqaloqateqartoqartarluni, tamatumani naalagaaffeqatigiinnut EU-mullu tunngatillugu unammilligassat ilanngullugit.
Josef Motzfeldt
Inatsisartut Siulittaasuat
Paasissutissat sukumiinerusut Inatsisartut Siulittaasuat Josef Motzfeldt angallattagaq 55 76 41 attaveqarfigalugu pissarsiarineqarsinnaapput.
