2024 2023 2022 Flere år...
10-10-2012
Inatsisartut siulittaasuat Josef Motzfeldt kiisalu USPU-p siulittaaua Justus Hansen Sakkutuut Imarsiortut Ilinniarfianni ilinniartunik oktoberip 9-ani naapitsipput
Sakkutuut Imarsiortut Ilinniarfianni ilinniartut
ingerlaqqiffiusumik premierløjtnantitut Sakkutuut Imarsiortut
Ilinniarfianni "Pilersaarusiorneq Nunallu tamalaat akornaann
Politikkip" ilinniartitsissutigineqarneranut atatillugu,
ilinniarfik Nuummut piffissami oktoberip 7. - 12. 2012-imi
paasisassarsiorluni angalanissamik aaqqissuussisimavoq.
Angalanermi tassani siunertarineqarpoq sakkutuut
imarsiortunngortussat nunani issittuni pissutsinik itinerusumik
paasinninnerulersinnissaat paasisimasaqarnerulersinnissaallu, aamma
maannakkut siunissamilu atorfigilerumaagassaminnut
attuumassuteqartunik, immaqalu ilaasa Issittumi
Sakkutooqarfittaassami Nuummi atorfigilerumaarsinnaasaanni.
Paasisassarsiorluni angalanermi ilinniartut sillimaniarnermi
politikkikkut pissutsit pillugit ilisimasaqarnerulernissaat
kissaataasimavoq, aammali nunatsinni aningaasaqarnikkut,
kulturikkut politikkikkullu ineriartorneq pillugit aammattaaq
paasisaqartinnissaat pingaartinneqarsimalluni.
Aallartitat inuit 22-put, taakkunannga ilinniartut 18-llutik.
Aallartitat kommandørkaptajnimit Poul-Erik Larsenimit
ingiallorneqarput, Søværnets Officersskolemi pisortaagallartumit
aammalu ukiorpaalunngortuni Atlantikup Avannaani umiarsuarnik
nakkutilliisut pisortaattut misilittagaqarluartoq.
Naalagaaffeqatigiinneq Kalaallit Nunaatalu piffissaq
ungasinnerusoq isigalugu siunissaa aammalu Kalaallit Nunaata
Qallunaat Nunaatalu akornanni oqaluttuarisaanikkut pissutsit
pillugit aallartitat Inatsisarsut Siulittaasuat
oqaloqatigerusussimavaat.
Inatsisartut Siulittaasuata aallartitanik naapitsinini ima oqaaseqarfigaa:
"Sakkutuut Imarsiortutut ilinniartut assut soqutiginnipput, aammalu oqarlutik Kalaallit Nunaat assut soqutigineqartoq, allaallu nunat tamalaat akornanni sillimaniarnermi politikkikkut pissutsit taamatulli assut soqutiginartinneqarlutik sammineqartut,nunatsinni maannakkut pingaartumik nunarsuup avannaani silaannaap allanngoriartornera sammineqaleruttortutillugu aammalu killeqarfinnik aalajangersaanerit eqqarsaatigalugit.
Issittumi Sakkutooqarfittaassap atuutilersinneqarnera malinnaavigalugu assut soqutiginassaaq minnerunngitsumillu illoqarfimmi takussaanerulernissaa.
Takusinnaalereerpara issittumi sakkutooqarfittaassap nuummiinnissaa aallaavissiilluarlunilu tunngavissiillualerumaartoq, soorlu maannamut soqutigineqarlualereersoq inuiaqatigiittullu politikkikkut aaqqissuussaanitsinnut pissutsinullu soqutiginnillunilu paasisaqarusunneq ersersinneqartarluni."
Aallartitat immikkut ittumik USPU naapeqatigisussaagaluarpaat, Nuummulli kinguaattoorluni tikinneq pissutigalugu USPU-p naapeqatiginissaa taamaatiinnarneqartariaqarsimavoq, taamaattumillu USPU-p siulittaasua Inatsisartut Siulittaasuata aallartitanik naapitsineranut peqataasariaqarsimalluni.
Josef Motzfeldt
Inatsisartut Siulittaasuat
Paasissutissat sukumiinerusut Inatsisartut Siulittaasuat Josef Motzfeldt angallattagaq 55 76 41 attaveqarfigalugu pissarsiarineqarsinnaapput.