2024 2023 2022 Flere år...
16-10-2012
Inuusuttut Inatsisartuisa ingerlanneqarnissaa kajumerineqarluarpoq
Inuusuttut Inatsisartuinut 2013-imi februaarip ulluisa 22-iannit 24-iannut ingerlasussamut peqataanissamut qinnuteqarfissaq ippassaq naavoq. Nunarput tamakkerlugu meeqqat atuarfianni atuartut katillugit 67-it peqataaniarlutik qinnuteqarsimapput.
"Inuusuttut Inatsisartuinut atuartut taama amerlatigisut soqutiginninnerat takullugu assut nuannerpoq. Inuusuttut piumassusillit soqutiginnittullu takunissaat qilanaaraara. Inuusuttut inatsisartuisa ingerlariaasissaat nutaaq isumalluarnarpoq" Inatsisartut Siulittaasuat Josef Motzfeldt oqarpoq.
Qinnuteqartut pingajorarterutaat nukappiaraammata, Siulittaasup tamanna aamma immikkut nuannaarutigaa, nalinginnaasummimmi siornatigut niviarsiaqqat peqataanissaminnut kajumissuseqarnerusarmata.
Aaqqissuussinissamut atatillugu peqataasussat 35-it toqqarneqarnissaat maanna tullinnguuppoq. Peqataasussatut piukkunneqartut e-mailikkut SMS-ikkulluunniit oktobarip 30-ani nalunaarfigineqarumaarput.
Maannakkullu Inatsisartut Allattoqarfiata Inuusuttut Inatsisartuini pisussanut pilersaarut aaqqissuutileruttorpaa, taannalu inu.gl-imi atuarneqarsinnaavoq. Taamaalilluni peqataasussat sapinngisamik nuannersumik pissarsiviulluartumillu misigisaqartikkumallugit. Inuusuttut Inatsisartuini qulequtarineqassaaq "Oqaatsit - taassuma iluani "Oqaatsitigut piginnaasassagut, naleqquttumik aalluppagut?"
Josef Motzfeldt
Inatsisartut Siulittaasuat
Paasissutissat allat Inatsisartut Siulittaasuat Josef Motzfeldt oqarasuaatikkut 55 76 41 attaveqarfigalugu pissarsiarineqarsinnaapput.