2024 2023 2022 Flere år...
25-10-2012
Meeqqat inuusutullu sumiginnakkat Kalaallit Nunaannit nunanut allanut inissinneqartarnerat Ilaqutariinnermut Peqqissutsimullu Ataatsimiititaliap tunngaviusumik isumaqatiginngilaa, peqatigitillugulu ajornartorsiutip tamatuma aaqqiiviginissaanik Naalakkersuisut kaammattorlugit
Meeqqat inuusuttullu Kalaallit Nunaanni isumagineqarnissaannut naleqquttumik neqeroorutissaqannginneq pissutigalugu Danmarkimut nassiunneqartarnerannik tunngasumik piffissami kingullermi tusagassiuutitigut oqallisigineqarnerat pillugu Ilaqutariinnermut Peqqissutsimullu Ataatsimiititaliaq Ilaqutariinnermut, Kultureqarnermut, Ilageeqarnermut Naligiissitaanermullu Naalakkersuisumik piaartumik oqaloqateqarusuppoq.
Ilaqutariinnermut Peqqissutsimullu Ataatsimiititaliami naalakkersuinikkut tunngaviusumik isumaavoq meeqqat inuusuttullu sumiginnagaasimasut isumagineqarnissaannut kalaallit inuiaqatigiit namminneq neqerooruteqarsinnaasariaqartut.
Taamatuttaaq meeqqat inuusuttullu ilaqutariinni toqqissisimasumik ineriartornissaat qulakkeerniarlugu inuiaqatigiittut uagut suliniuteqarneq sakkortusartariaqaripput Ilaqutariinnermut Peqqissutsimullu Ataatsimiititaliami tunngaviusumik isumaavoq.
Meeqqanut inuusuttunullu meeraneq toqqissisimanartoq pillugu naalakkersuinikkut anguniakkatigut suliniutit isumannaarnissaannut tunngaviusumik pissutsit arlallit pisariaqartut isiginiarneqarnissaat ataatsimiititaliap ilisimavaa. Ajornartorsiutit tigussaasut piffissaq sivikitsoq atorlugu aaqqitassaapput, peqatigitilluguli naalakkersuinikkut anguniakkagut isumannaarniarlugit arlalinnik suliniuteqarnissaq qulakkeertariaqarparput.
Atuarfik pitsaasoq angajoqqaallu suliffeqartut imaluunniit ulluinnarni pisuunnguutaasinnaasumik isumaqarluartumillu tunniussisinnaasut, meeqqatik, ilaqutaasut ikinngutaasullu ilagalugit iliuutsinut pitaasusunut peqqinnartunullu nukissallit, ilaqutariinnut innuttaasunullumi killissanik toqqissisimanartunik aalajaatsunillu pisariaqartunik pilersitsisapput. Killissat meeqqat inuusuttullu akornanni nikallornermik sumiginnaanermillu tuniluuttartumik pitsaaliuisussat.
Unammilligassarpassuaqareerpoq, ajornartorsiutaareersulli imaaliallaannaq aaqqinneqarsinnaanngillat. Inuunerissuunisamut pitsaaliuilluni suliniutit ukiuni makkunani annertusiartuaartinneqarput, misilittaqaqarnerpullu ilutigalugu aaqqiivigineqartassallutik.
Inissiani tunngaviusumik ajornartorsiutinik aaqqitassaqarpoq. Ilinniartitaaneq atuarfeqarnerlu pillugit immikkut suliniuteqartoqarpoq. Inuiaqatigiinni atugarissaarnerup attatiinnarnissaanut annertusarnissaanullu inuussutissarsiutitigut ineriartorneq aamma aningaasaqarnikkut toqqissisimaneq pillugu siunnersuuteqarlunilu isumassarsiaqarpoq.
Unammiligassat tamakku naalakkersuinikkut aallutissagigut Ilaqutariinnermut Peqqissutsimullu Ataatsimiititaliamit kaammattuutigineqarpoq, taamaalilluta ineriartornerup pilerigeqisatta anguniarnerani katatarissanngilagut.
Ineriartorsinnaanngilagut ilaqutariinni innuttaasullu akornanni inuunneq toqqissisimanartoq, isumaqarluartoq imaqarluartorlu isumannaarnagu pinngitsaalisamik ineriartornermi inuusuttavut katakkutsigit.
Inuiaqatigiit ineriartorneranni taamatut nassuerutiginninneq isiginiartariaqarparput.
Meeqqat ikilerneqareersut pillugit aaqqiissutissat ujartorlugillu ineritittariaqarpavut, tamatumani inuiaqatigiit ajattuinnginnissaat Danmarkimullu aallartitsiinnannginnissaat isumannaarneqassaaq. Inuiaqatigiittut ajornartorsiutitta iliuuseqarfiginissaannut nukissaqarfiginagit aallurussuunnalerlugillu pissusilersulerutta, tamanna inuiaqatigiinni ajorsarnerussasoq ataatsimiititaliaq isumaqarpoq. Naak inuppalaassuseq?
Ataatsimiititaliaq isumaqarpoq, sorpianik suliaqarnerput paasiniarlugu unitsiarnissarput eqqarsarluarnissarpullu naalakkersuinikkullu immitsinnut isornartorsiornissarput aallartissallugu piffissanngortoq. Immitsinnut qiviariarta, meerartagut ilaqutariillu peqatigalugit pitsaanerusumik pisinnaanerput iliuuseqarnissarpullu aalajangerlugu, taamaalilluni inuiqatigiittut ineriartornitsinni inuttut ineriartorneq atugarissaarnerlu toqqammavissaalissammata.
Ataatsimiititaliap ilisimavaa Naalakkersuisunut ilaasortamik oqaloqateqarnera inuiaqatigiit, meeqqat inuusuttullu allamut inissitat paarisassat akornanni atugarliornerujussuup ajornartorsiutaanerani imminnermini aaqqiissutaasinnaanngitsoq.
Inuiaqatigiinni ineriartornerup ingerlaqqinnerani inuttut imminut napatissinnaanerup atugarissaarnerullu qulakkeernissaanut Naalakkersuisunut tamarmiusunut ataatsimiititaliamit kaammattuutitut tamanna paasineqassaaq. Tamanna qanoq pissanersoq qularnanngitsumik amerlasuunik isumaqarfigineqarpoq, tamannalu ataqqineqassaaq. Inuiaqatigiinnili ineriartornitsinni tunngaviliisooqqullugit meeqqat inuusuttullu kiisalu taakku angajoqqaavisa ineriartornermut ilaalernissaannik qulakkeerinnittunik iliuutsinik suliniutinillu Naalakkersuisut aallartitsinissaat assut pingaaruteqarpoq.
Paasisaqarnerorusunnermi Ilaqutariinnermut Peqqissutsimullu Ataatsimiititaliami siulittaasoq Olga P. Berthelsen attavigineqarsinnaavoq, mobil 55 33 68.