2024 2023 2022 Flere år...
25-10-2012
Aviisinut nuna tamakkerlugu saqqummersartunut tapiissutit pillugit Aningaasaqarnermut Ataatsimiititaliap aalajangiinera
Aviisinut nuna tamakkerlugu saqqummersartunut 1 mio. kr.-inik ersinngitsumik tapiissuteqarnissaq Aningaasaqarnermut Ataatsimiititaliamit akuerineqarsimasoq KNR-ip nittartagaani ullumi allassimavoq. Tamannali eqquinngilaq.
Aviisinut nuna tamakkerlugu saqqummersartunut ammasumik takuneqarsinnaasumillu tapiissuteqartarnissaq kissaatigineqartoq Naalakkersuisut Aningaasaqarnermut Ataatsimiititaliamut qinnuteqaatiminni paasissutissiissutigaat. Taamaattumillu aviisinut nuna tamakkerlugu saqqummersartunut utaqqiisaagallartumik tapiissutit ataavartunngortinneqarnissaat 2013-imi aningaasanut inatsisissatut siunnersuummi siunnersuutigineqarpoq. Kulturikkut ingerlatsivinnut tusagassiorfinnullu amerlasuunut tapiissuteqartarneq tunngaviusumik isigalugu ataatsimiititaliamit tapersersornartinneqarpoq. Taamaattumillu ilaatigut tusagassiornerup pitsaasuunissaa tapersersorniarlugu assersuutigalugu aviisinut, radiumut TV-mullu tapiissuteqartoqartarpoq.
Siuliani taaneqartoq tunngavigalugu sulisussarsiornerit Naalakkersuisut pissarsiarisinnaasaannut naleqquttumik aatsaat akeqarpata naqitertinneqartassasut Naalakkersuisut Aningaasaqarnermut Ataatsimiititaliamut paasissutissiissutigaat. Pineqartoq pillugu manna tikillugu periuserineqartup, taannalu tunngavigalugu Nunatta Karsiata naatsorsuutai naapertorlugit aningaasartuutigineqartut inatsisitigut pisariaqartumik tunngavissaqarluni ingerlanneqarsimanerannik apeqqut Kukkunersiuinermut Ataatsimiititaliap suliassaqarfiata ataaniippoq, taamaattumillu apeqqut taanna Aningaasaqarnermut Ataatsimiititaliap suliarinninnerani ilaatinneqarsimanani.
Andreas Uldum
Aningaasaqarnermut Ataatsimiititaliap siulittaasua
Paasissutissat amerlanerusut ataatsimiititaliap siulittaasuanut Andreas Uldumimut mobil +299 58 73 05 atorlugu attaveqarnikkut pissarsiarineqarsinnaapput.