2024 2023 2022 Flere år...
29-10-2012
Finlandimi Helsinborgimi oktobarip ulluisa 30-iannit novembarip ulluisa aallaqqaataanut 2012 Nunat Avannarliit Siunnersuisoqatigiiffiata 64-issaanik ataatsimiinnerani Nunat Avan-narliit Siunnersuisoqatigiiffianut ilaasortat Kim Kielsen aamma Justus Hansen Inatsisartut sinnerlugit peqataapput
Ukioq manna 2012-imi Nunat Avannarliit Siunnersuisoqatigiiffiata pilersinneqarneraniit ukiut 60-it qaangiupput. 64-issaanik ataatsimiinneq Helsingforsimi ingerlanneqassaaq Inatsisartullu sinnerlugit Nunat Avannarliit Siunnersuisoqatigiiffianut ilaasortat Kim Kielsen aamma Justus Hansen
ataatsimeersuarnermi pisussarpassuit ilaannut peqataassallutik.
Ataasinngornermi ulloq 29. oktober 2012 aallartitat tamarmik partiikkaarluni ataatsimiinnermut peqataassapput, soorlu aamma Nunat Avannarliit Siunnersuisoqatigiiffianni Nunani Avannarlerni Minsterit Siunnersuisoqatigiiffiannili ingerlatat eqqarsaatigalugit suleqatigiinnerunissamik Ålandimi, Savalimmiuni nunatsinnilu inatsisartunut ilaasortat naalakkersuisullu akornanni suleqatigiinnissamut isumaqatigiissuteqartoqassasoq. Inatsisartut sinniisaat taamatuttaaq aamma ulloq taanna Qaqortumi ilinniarnertuunngorniat siunnersuisoqatigiiffiup ataatsimiinneranut atatillugu containerini saqqummersitsinermut -Norden Rundt - Sikup Sinaavanit Eqqumiitsuliat- peqataasut naapinnissaannut periarfissaqassapputtaaq.
Marlunngornermi ulloq 30. oktober 2012 tamarmik ataatsimiititaliat ataatsimiinnerini siunnersuiso-qatigiiffiullu ataatsimiinnerata ammarneqarnerani peqataassapput.
Siunnersuisoqatigiiffiup ataatsimiinnera ulloq 31. oktober nangissaq ullorlu 1. november 2012 naammassineqarluni.
Siunnersuisoqatigiiffiup ataatsimiinneranut atatillugu soqutiginartorpassuarnik assigiinngitsunik pisoqartartussavoq peqataasut soqutiginninnertik naapertorlugu peqataaffigisinnaasaannik. Nersornaasiinerit, saqqummersitsinerit kulturikkullu pisut assigiinngitsut ingerlanneqassapput, soorlu aamma nunani avannarlerni inuusuttut akornanni suliffissaaleqineq pillugu isumasioqatigiissitsisoqassasoq.
Paasissutissat sukumiinerusut Kim Kielsen angallattagaq 54 86 92 aamma Justus Hansen angallattagaq 53 12 10 attaveqarfigalugit pissarsiarineqarsinnaapput.
Nunat Avannarliit Siunnersuisoqatigiiffiat inatsisartutigoortumik suleqatigiiffiuvoq Norgemit, Danmarkimit, Sverigemit, Finlandimit, Islandimit nunanillu namminersorfiusunit Ålandimit, Savalimmiunit Kalaallit Nunaanniillu inatsisartunut ilaasortanit 87-init ilaasortaaffigineqartoq.
Inatsisartut Nunat Avannarliit Siunnersuisoqatigiiffianni marlunnik ilaasortaatitaqarput sinniisussalinnik. Inatsisartunut ilaasortat Justus Hansen Demokraatineersoq Kim Kielsenilu Siumumeersoq ilaasortaapput, Olga P. Berthelsen Inuit Ataqatigiinnersoq Akitsinnguaq Olsenilu Siumumeersoq sinniisussaralugit. Justus Hansen siunnersuisoqatigiiffiup Kultureqarnermut Ilinniartitaanermullu Ataatsimiititaliaanut ilaasortaavoq Kim Kielsenilu Avatangiisinut Pinngortitamilu pisuussutinut
Ataatsimiititaliaanut ilaasortaalluni.