2024 2023 2022 Flere år...
05-11-2012
Nunani Avannarlerni Killerni pingaarnertut inuussutissarsiutinik paasinninnerunissamut Nunat Avannarliit Siunnersuisoqatigiiffiat peqataasariaqarpoq
Nunat Avannarliit Siunnersuisoqatigiiffiata pisuusssutit Nunat Avannarliit Killiit nunani avannarlerni nunat sineriallit allat assigalugit iluaqutiginiagaasa iluaqutiginiarneqarnerisa aqunneqarnerat pingaartinnerusariaqarpaat nunani avannarlerni killerni inuussutissarsiutit pingaarnerit imaanik pisuussutinik iluaquteqarniarnermik tunngavillit pitsaanerusumik paasineqarnissaat anguniarlugu. aamatut oqaaseqarpoq Nunat Avannarliit Killiit Siunnersuisoqatigiiffianni siulittaasoq Josef Motzfeldt Nunat Avannarliit Siunnersuisoqatigiiffiata Helsinkimi ataatsimiinnerani ulluni 29. oktoberimiit 1. novemberimut ingerlanneqartumi.
Erseqqissaatigaa silap pissusiisa allanngoriartornerat Nunani Avannarlerni Killlerni uumasoqassutsimut naasoqassutsimullu annertuumik sunniuteqareersut. "Silap pissusisa allanngoriartornerat eqqartorneqaleraangat nanoq eqqaaneqaqqajuttarpoq, kisiannili allanngoriartornerit nerisaqaqatigiinnut allanut sunniuteqarnerupput, nunani avannarlerni killerni uumasut ilaasa takkusimasarneri eqqarsaatigalugit allannguutinik annertuunik misigisaqarfiusimallutik" Josef Motzfeldt oqarpoq, oqaatigalugulu soorlulusooq nunarsuarmi silap pissusii pillugit ataatsimiinnerni, ataatsimeersuarnerni, isumasoqatigiinnernilu nanoq issittumi kunngeqarfimmini kunngitullusooq kisimi uumasuusutut isigineqartartoq. "Nannut najugaqarfiat ulorianartorsiortinneqaraluarpoq, kisiannili aamma tamanna pinngoqqaatinut, aalisakkanut, timmissanut uumasunullu allanut aamma atuuppoq", Josef Motzfeldt oqarpoq. "Uumassusillit arlaata pisarineqarsinnaanera allanngoraangat, uumasut allat aamma takussaajunnaartarput, uumassulu taakku takussaajunnaaraangata taakku peqatigalugit kulturi ukiorpassuarnilu inooriaasiusimasoq aamma tammartarput."
Josef Motzfeldtip erseqqissaatigaa uumasut qangaaniilli takusassat tammakarpata allat nutaat takkutissasut, tamatumanili avaleraasaartut assersuutissaqqissutut tikkuarlugit. "Issittup pingaartinneqarnera eqqarsaatigalugu nunat avannarliit nunarsuatsinni nunanik allanik suleqateqarnerminni nukittunerussapput nunani ataasiakkaani inuuniarnikkut tunngavigisat ilisimasaqarfiginerugunikkit, taamaattumillu siunnersuutigaara silap pissusiisa allanngoriartornerat pillugu Nunat Avannarliit Siunnersuisoqatigiiffiat ataatsimeersuartitsissasoq, pingaarnertut qulequtaralugu pisuussutit uumassusillit tamarmik piujuaannartitsinermik tunngavilimmik iluaqutiginiarneqarnerisa aqunneqarnissaannik ataatsimut paasinninnissaq" Josef Motzfeldt naggasiivoq.
Nunat Avannarliit Killiit Siunnersuisoqatigiiffianni siulittaasup tulliata Henrik Oldip Norge aamma EU avaleraasartuut eqqarsaatigalugit suliami inissisimanerat pillugit sakkortuumik uparuarpai, tassa EU Norgemit tapersersorneqarluni Savalimmiut Islandilu avaleraasartuunik, amerlasoorsuanngolutik nunat avannarliit killiit imartaanniittunik, aalisarnerat pillugu Europami niuerfinni assigiinngitsutigut mattussiniarnerat pillugit. Islandimi Altingimut ilaasortap Ólína Þorvarðardóttirip, aamma Nunat Avannarliit Killiit Siunnersuisoqatigiiffianni siulittaasup tuulliatut inissisimasup, Henrik Oldip Norgemik aamma EU-mik uparuaanera taperserpaa, kaammattuutigalugulu avaleraasartut pillugit nunat tamalaat akornanni ataatsimut ilisimatuussutsikkut misissuisoqarnissaa, tamanna pereerpat avaleraasartuunik pisassat nunat akornanni agguaasseriaasissaq ilisimatuussutsikkut paasisanik tunngavilik naapertorlugu isumaqatigiinniartoqarsinnaassagaluarmat. Ólína Þorvarðardóttirip Nunat Avannarliit Siunnersuisoqatigiiffiat kaammattorpaa suliassamik aallartitseqqullugu.
Josef Motzfeldt
Inatsisartut Siulittaasuat
Paasissutissat sukumiinerusut Inatsisartut siulittaasuat Josef Motzfeldt angallatttagaq 55 76 41 attaveqarfigalugu pissarsiarineqarsinnaapput.
