2024 2023 2022 Flere år...
07-12-2012
Ilaqutariinni siusissumik iliuuseqarneq imminut akilersinnaavoq, tamannalu inatsisitigut qulakkiissallugu isumaliutigisariaqarparput
Olga P. Berthelsen, Ruth Heilmann aamma Astrid Fleischer Rex inatsisartuni ilaqutariinnermut ataatsimiititaliaq sinnerlugu ulluni 3 aamma 4 december 2012 ilaqutariinni siusissumik iliuuseqartarnerup isumaa pillugu nunani avannarlerni isumasioqatigiinnermut peqataapput.
Isumasioqatigiinneq nunanit avannarlernit inunnit 300-nit peqataaffigineqartoq suliniutip "ilaqutariinnut siusissumik iliuuseqarneq" nunat avannarliit suliniutaasa inernerisa kinguneraat. Pingaarutilinnik arlalinnik oqariartuuteqartoqarpoq, aammalu ilaqutariinnut siusissumik iliuuseqarnerup isumaa ilisimasat tunngavigalugit pineqarluni. .
Pingaarnertut oqariartuutigineqartoq tassaavoq, siusissumik iliuuseqarnermi tamatigut imminut akilersinnaasartoq. Ilaqutariit sanngiitsut pillugit suliniarnerini utaqqinermi piffissaq sivitsoriartortillugu meeqqat aammalumi ilaqutariit sumiginnakkat ajoquserneqartarnerat sakkortusiartortarpoq.
Kalaallit Nunaanni isumaginninneq pillugu politikkimik suliaqarnermi ukiut amerlasuut politikikkut anguniagaavoq angajoqqaanut meeqqanullu ajornartorsiutilinnut sullissinermi sapinngisamik siusissumik sullissinerup aallartinneqartarnissaa, taamaalilluni ajoqusernerit sapinngisamik killilersimaarneqarsinnaallutik. Qularutissaanngilarlu anguniakkap taassuma suliarinissaanut ingerlanneqarnissaanullu pitsaanerujussuarmik suliaqarsinnaanerput.
Naalakkersuinermi eqqarsaatigineqassaaq, siusissumik iliuuseqartarnerup politikikkut anguniakkatut pisussaaffiliinngitsutut siunertamiit inatsisitigut qanoq nalimmassarneqarsinnaanera anguniassallugu. 2013-mi upernaakkut ataatsimiinnermi eqqarsaatigineqarpoq meeqqat inuusuttullu pillugit inatsisip nukittorsarneqarnissaa siunertaralugu allannguutissamik siunnersuuteqarnissaq, tassanilu siunnersuummi nalimmassarneqarsinnaassalluni kommunit pisussaaffimmittut suliassarissagaat ilaqutariinni meerartalinni pisariaqartitsineq tunngavigalugu siusissumik iliuuseqartarnissaq suliniuteqartarnissarlu.
Isumasioqatigiinnermi oqaaseqartorpassuit arlalitsigut takutippaat, kalaallit nunaanni ilaqutariinnermut politikki pitsaasunik arlalinnik pigineqaannartariaqartunik aammalu annertusarneqartariaqartunik imaqartoq. Kalaallit Nunaanni politikikkut isumaqatigiittoqarpoq ilaqutariinnermut politikki tamakkiisuusariaqartoq aammalu ilaqutariit iluinni ajornartorsiutit suliarisariaqartariaqartut. Tamanna ataatsimut angajoqqaanut meeqqanut aammalu ilaqutariinnut atuuppoq.
Taamatuttaarlu politikikkut isumaqatigiittoqarsimavoq ilaqutariinnut katsorsaaviit pilersinneqarnissaat pillugu. Ilaqutariinnik sullissinermi aamma ilaqutariit suliaqarfigineranni ilaqutariinnut katsorsaaviit qitiulluinnarput pingaaruteqartorjussuuvorlu ilaqutariinnut katsorsaavinni sulinerup nukittorsarneqarnissaa ineriartortinneqarnissaalu.
Pitsaaliuinermi sulinermi pitsanngorsaasinnaallutalu pitsanngorsaataasinnaasunik ujaasiuassaagut, taamaalilluni suliniutivut tamakkiinerusumik anguniakkatsinnut annguttarniassammata, kisiannili aamma inuttaasunut ilaqutariinnullu sanngiinnerusunut pilersaarusiornitsinni annguttarniassammata.
Pingasunngorneq 5. december 2012 aallartitat Frederiksberg kommunimi utoqqarnut pitsaaliuineq siunertaralugu pulaartartunut paasisassarsiorlutik ataatsimeeqateqarput.
Sulineq tamanna ilaqutariinnermut peqqissutsimullu ataatsimiititaliap UKA 2012/23-mi utoqqarnut pitsaaliuilluni pulaartarneq pillugu sulineranut attuumassuteqarpoq.
Paasisassarsiorluni ataatsimiinneq pissarsiaqaataaffiulluarpoq, aammalu aallartitat Frederiksberg kommunimi sulinermi pitsaaliuilluni pulaartarnerit qanoq aaqqissuunneqarsimanerat pitsaasumik pissarsiffiulluni.
Paasissutissanik annertunerusunik pissarsiniaraanni Olga P. Berthelsen attavigineqarsinnaavoq oqarasuaat angallattagaq 55 33 68. atorlugu.
Ulluni 3 aamma 4 december isumasioqatigiinneq ingerlanneqarpoq Nordens Velfærdscenterimit Nordisk Ministerrådip ataani aaqqissuunneqarluni. Paasissutissanik annertunerusumik pissarsiniartoqarsinnaavoq Nordisk Råd og Nordisk Ministerråd www.norden.org nittartagaq atorlugu.
