Nutaarsiassat

25-02-2013

Inuusuttut Inatsisartui 2013 iluatsilluartumik ingerlanneqarpoq

Inuusuttut Inatsisartui sapaatip akunnerata naanerani pissanngatigineqarsimaqisumik nutaamik imaqarluni aaqqissuussaallunilu ingerlanneqarpoq. Taamatut nutaamik aaqqissuussinikkut Inatsisartut siulittaasoqarfiata kissaatigisimavaa inuusuttut innuttaasut oqartussaaqataanerat inatsisiliortarnerlu pillugit
ataatsimiinnginnerminni paasisaqarnerunissaat siunertaralugu paasissutissanik siammarterutit nutaaliaasut atorlugit piareersarnissaminnut
periarfissaqarnissaat. Inuusuttut ataatsimiinnerminni siullermik Inatsisartoqarneq innuttaasullu oqartussaaqataanerat sukumiisumik sammivaat,
tamatumalu kingorna ukioq manna sammisassatut qulequtaritinneqartoq "Oqaatsitigut piginnaasassavut eqqarsaatigalugit pingaartitavut anguniakkanut naapertuuppat?" arfininngornermi suleqatigiinnut sisamanut avillutik oqallisigalugu. Sapaatikkut ullaakkut suleqatigiit suliatik naammassivaat Inatsisartut
ataatsimiittarfianni saqqummiunissaannut oqallisiginissaannullu piareersarlugit.

Qularutissaanngilaq inuusuttut ulluni marlunni sulerulussimammata, suliamik sapaatikkut Inatsisartut ataatsimiittarfianni saqqummiunneqarsinnaanissaat
qularnaarniarlugu.

Erseqqilluinnartumik inuusuttut peqataasut suliassamut tunniusimasimapput, nuannaarutissaavorlu nunatsinni sumiiffinnit tamarluinnangajannit peqataasoqarsinnaasimammat. Inuusuttut ingerlaannangajak imminnut ilisaripput suleqatigiilluarlutillu.

Sapaatikkut ualikkut Inatsisartut ataatsimiittarfianni oqallinneq toqqaannartumik TV-kkut aallakaatinneqartoq aallaqqaammut qeratalaaqqaariarluni teknikikkut ajornartorsiutit iluarsiniarlugit unillatsiartoqareernerata kingorna assut uummaarippoq oqaaseqarusunneq imaaginnavilluni oqallinnerlu eqeersimaarluinnartumik peqataaffigineqarluni. Inatsisartut ataatsimiittarfiannit oqallinnerup toqqaannartumik aallaakatinneqarnerata sinerissami atuaqatit, kammalaatit ilaquttallu pitsaasumik periarfissaqartissimavaat Inuusuttut Inatsisartui pillugit paasisaqalaarnissamut, qularnanngitsumillu aamma inuusuttut angerlariarunik peqataanerminni misigisaminnik ingerlatitseqqiinissaannut tunngavissaalluarsinnaalluni.

Taamaattumik nuannaarutissaavoq inaarutaasumik nalunaarut, inuusuttunit annertuumik taperserneqarluni sapaammi ulloq 24. februar akuersissutigineqartoq, maanna saqqummiunneqarsinnaalermat. Inaarutaasumik nalunaarut aaqqissuussineq naggataarnersiorlugu katerisimaarnermi Inatsisartut Siulittaasoqarfiannut ilaasortat sinnerlugit Inatsisartut Naalakkersuisullu siulittaasuinut tunniunneqarpoq, taakku isumagissammassuk nalunaarutip Inatsisartunngortussanut Naalakkersuisuunngortussanullu nutaanut ingerlateqqinneqarnissaa.

Inaarutaasumik nalunaarummi ilanngunneqartumi takuneqarsinnaavoq inuusuttut erseqqissorujussuarnik piumasaqartut siunissami meeqqat atuarfianni oqaatsit eqqarsaatigalugit unammilligassat qanoq qaangerneqarsinnaaneranut. Inuusuttut aamma pissusissamisoorluinnartumik kissaateqarput tullianik Inuusuttut Inatsisartuinik aaqqissuussinissamut piffissaq sivisuneroqqullugu. Maanna aaqqissuussinermut pisussanut pilersaarut assut sukangasimavoq, taamaattorli kusanartumik pissarsiviusumik, inuusuttunit angajullernit tunniussimalluartunit ilitsersortaasunit ilitsersuilluarneq pissutaaqataalluni.

Inuusuttut Inatsisartuinit inaarutaasumik nalunaarut paasissutissallu allat tamarmik aaqqissuussinermut atatillugu nittartakkami www.inu.gl-imi
aaneqarlutillu takuneqarsinnaapput.

Josef Motzfeldt

Inatsisartut Siulittaasuat

Paasissutissat sukumiinerusut Inatsisartut Siulittaasuat Josef Motzfeldt angallattagaq 55 76 41 attaveqarfigalugu pissarsiarineqarsinnaapput.

Taamaattuttaaq paasissutissiisarnermut suliniutinullu suleqat Nils Baum nils@ina.gl piareersimavoq aaqqissuussineq pillugu paasissutissiinissamut, assinik atugassiinissamut il.il. Assit ilannguunneqartut Nils Baumip assilisarai.