2024 2023 2022 Flere år...
10-05-2013
Atugarissaarnerup sammineqarnissaa siunertaralugu ulluni 6. - 9. maj 2013-imi Nuummi ulluni sammisaqarluni Ilaqutariinnermut Peqqissutsimullu Ataatsimiititaliami ilaasortat ingerlatsipput
Inatsisartut Ilaqutariinnermut Peqqissutsimullu Ataatsimiititaliaat ulluni 6. - 9. maj 2013-imi sammisassanut pilersaarut ilanngunneqartoq naapertorlugu Naalakkersuisunik apersuinernik, paasisassarsiorluni ataatsimeeqateqarnernik Qeqertarsuatsiaanullu paasisassarsiorluni tikeraarnermik ingerlatsivoq.
Inuiaqatigiinni atugarissaarnitta aalajangiusimaannarneqarnissaanut ineriartortinnissaanullu aningaasaqarnikkut innuttaasullu katitigaaneranni arlalinnik unammilligassaqarpugut.
Qinersinerup kingorna inissitsitereernermi atugarissaarnitta aningaasaqarnikkut innuttaasullu katitigaaneranni unammilligassat sammillugit Ilaqutariinnermut Peqqissutsimullu Ataatsimiititaliami ilaasortat ullunik sammisaqarfiusunik ingerlatsipput. Ulluni sammisaqarfiusuni Aningaasaqarnermut Nunamilu Namminermut Naalakkersuisumit Akileraartarnermut Atugarissaarnissamullu Isumalioqatigiissitap isumaliutissiissutaani tunngavigineqartut naapertorlugit aningaasaqarnikkut innuttaasullu katitigaaneranni takorluukkat pillugit ataatsimiititaliami ilaasortat nalinginnaasumik paasissutissinneqarput.
Tamatuma kingorna ataatsimiititaliap suliassaqarfiisa iluini pissutsit, tassa isumaginninnermut peqqissutsimullu tunngasut, sukumiinerusumik paasisaqarfiginissaat siunertaralugu Ilaqutariinnermut Inatsisinillu Atortitsinermut Naalakkersuisumik aammalu Peqqissutsimut Attaveqarnermullu Naalakkersuisumik ataatsimiititaliaq oqaloqateqarpoq.
Minnerunngitsumik Ilaqutariinnermut Inatsisinillu Atortitsinermut Naalakkersuisumik aammalu Peqqissutsimut Naalakkersuisumik apersuinermi ataatsimeeqateqarnermilu sammineqartuni naalakkersuinikkut aaqqiissuteqarnissaq illuatungeriinnit piumassuseqarfigineqarnissaa pingaaruteqartoq paasinarsivoq.
Taamaalilluni pinaveersaartitsinermik suliniutinik, innuttaasut peqqissusaat, ineqarnermut tapiissutit, utoqqalinersiat, siusinaartumik soraarnerussutisiat meeqqanut inuusuttunullu tunngasut pillugit aallarniutitut ataatsimiititaliap Naalakkersuisunullu ilaasortat ilaatigut oqaluuserineqarput. Atugarissaarnerup nunaqarfinni isorliunerusunilu inuulluarnissap ineriartornissallu qulakkeerneqarnissaat minnerunngitsumik eqqumaffigineqarnissaat naalakkersuinermik sulinermi ataatsimeeqatigiinnermi ilisarnaataasimapput.
Aammattaaq ataatsimeeqateqartarnerni KANUKOKA-p siulittaasua oqaloqatigiilluni ataatsimeeqatigineqarpoq. Innuttaasuni atugarissaarnitsinni inuulluarnissatsinnullu unammilligassanut atatillugu kommunini suliniutit suliaqarnerillu pillugit ataatsimiititaliap paasissutissinneqarnissaa matumani siunertarineqarluni.
Ataatsimut isigalugu ullut sammisaqarfiit pissarsiffiulluarput ataatsimiititaliamilu sulinerup ingerlateqqinnissaanut siumut isigisumik pingaarutilimmik toqqammaviliillutik. Matumani minnerunngitsumik atugarissaarnitta ineriartortinneqarnissaanut innuttaasullu inuulluarnerat, matumani ilanngullugu 2014-mut aningaasanut inatsisissatut siunnersuutissaq, naalakkersuinikkut qanoq kinguneqarnissaa pillugu Naalakkersuisut alloriarnissaannut atatillugu.
Ullut sammisaqarfiit naggaserneqarput Qeqertarsuatsiaanut, Nuup kujataaniittumut paasisassarsiorluni angalanermik, ataatsimiinnermi nunaqarfimmi ajornartorsiutit pissutsillu assigiinngitsut pillugit nunaqarfimmi sinniisuutitanit kommunimilu atorfilinnit ataatsimiititaliaq paasissutissinneqarluni. Matumani pingaartumik nunaqarfimmi inuussutissarsiornikkut, atugarissaarnerup inuulluarnerlu eqqarsaatigalugit.
Tunngaviusumik ataatsimiititaliaq isumaqarpoq illoqarfimmiikkaanni nunaqarfimmiikkaanniluunniit inuit tamarmik inuiaqatigiinnut atugarissaartunut peqataasariaqartut, nunatsinnilu innuttaasut tamarmik peqqissuunissaasa nukittorsarneqarnissaa ataatsimiititaliamit sulissutigineqassaaq.
Ullunut sammisaqarfiusunut ataatsimiititaliami ilaasortat Mimi Karlsen aamma Anders Olsen napparsimasoqarnera pissutigalugu ajoraluartumik peqataasinnaanatik nalunaarput, Gerhardt Petersenilu ullut sammisaqarfiit ilaannai peqataaffigai, Aatsitassaqarnermut Aningaasaqarnermullu Ataatsimiititaliami ataatsimeeqataasariaqarnini pissutigalugu. Taamatuttaaq Mimi Karlsenip sinniisussaanut Naaja Nathanielsenimut pisoqarpoq, Naalakkersuisumik apersuinermi ataasiaannarluni peqataanissaminut periarfissaqarami.
Annertunerusumik paasissutissanik pissarsiniarnermi Peqqissutsimullu Ataatsimiititaliami siulittaasoq attavigineqarsinnaavoq:
Lars P Mathæussen, Siulittaasoq, mobil 24 17 88.