Nutaarsiassat

30-05-2013

Allakkat ammasut

Asasara Aja,

 

Ulloq 27. maj tusagassiorfinnut nalunaarutit, taannalu aallaavigalugu ulloq taanna Nuuk TV-mi nutaarsiassani apersorneqarnerit, tunngavigalugit nunatsinni oqartussat inatsisiliortussaatitaasut INATSISARTUT atuutsitsisussaatitaasullu NAALAKKERSU-ISUT akornanni suliassat agguataarneqarsimanerat eqqarsaatigalugu pissutsinik atuuttunik erseqqissaateqarniarpunga.

 

Ulloq 27. maj tusagassiorfinnut nalunaarutinni Naalagaaffinnit Peqatigiinnit nalunaarusiaritinneqarsimasoq tunngavigalugu oqarputit:

" Misissuinermi Inatsisartuni aalajangiinerni inuusuttut qanoq annertutigisumik ilanngunneqarnissaasa akuerineqarnerat isiginiarneqarpoq aammalu inuttut sunniuteqarnissamik aammalu politikikkut oqaluuserisassanut ilanngunneqarnissartik qanoq isumaqarfigineraat misissorneqarluni.

 

Misissuineq ilaatigut Inatsisartuni aamma Samip Inuusuttut pillugit siunnersuisoqatigiivini akissutit tunulequtaralugit ingerlanneqarpoq. Ajoraluartumik kingulleq Kalaallit Nunaanni ingerlanneqarsinnaasimanngilaq, tassa Kalaallit Nunaanni politikikkut aalajangiinernut inuusuttunut kattuffiusumik aaqqissuussamik peqanngimmat."

 

Ilanngullugu allapputit:

"Misissuinerup meeqqat namminneq pillutik aalajangiunneqatunut ilanngutitinneqarnissaat pillugu eqqanaarinnittumik Inatsisartuni aalajangiussamik iluseqartitsisoqannginnera inaarutigaa.

 

Ukiut marlukkaarlugit Inuusuttut Inatsartui, naliginnaasumik ullunik pingasunik sivisussuseqartartut ingerlanneqartarput, kisiannili meeqqat tusaaneqarnissaminnut pisinnaatitaaffiannik eqqanaarinnissappata tamanna naammanngitsoq misissuinermi nalilerneqarpoq. Ilaatigut malittarinninneq amigaataavoq, kisiannili inuusuttut politikkimik soqutiginnilernerannut atatillugu aallaqqaataalluni.

 

Inaarutaasinnaasut ilaat tassaasinnaavoq politikki pillugu ilisimaarinninnermik pilersitsineq aammalu soqutiginnilersitsineq, taamalillutik meeqqat inuusuttullu politikkimik suliaqartunit tusaaneqarumaneqarnerminnik aammalu politikkikkut suliaqartut inuusuttut oqaatigisaannik atuinerannik misigitinneqarnerat."

 

Pisariaqartippara aallaqqaasiutigalugu erseqqissarlugulu tikkuassallugu Naalagaaffiit Peqatigiit nalunaarusiaritissimasaanni takkuitsoorneqarsimannguatsiarmat nunatsinni Meeqqat Inuusuttullu Oqaloqatiginnittarfiat pilersinneqarsimammat meeqqat pisinnaatitaaffiisa atugarisaasalu suliffeqarfimmi aalajangersimasumi inatsisinillu tunngavilimmi isumagineqarnissaat qularnaarniarlugu, soorlu aamma allarpassuarnik oqallittarfeqarlunilu suliffeqarfeqartoq, meeqqat inuusuttullu isummaminnik ersersitsivigisinnaasaannik.

 

Meeqqat Inuusuttullu Oqaloqatiginnittarfiannik pilersitsisimaneq taamaalilluni meeqqat tusaaneqarfigisinnaasaasa amerlasoorpassuit ilagiinnarpaat, killiliussatut inatsisiliorneq siunertamullu Inatsisartut aningaasaliissuteqarsimanerat tunngavigalugit pilersinneqarsimasoq.

 

Inatsisartut taamaalillutik oqartussatut inatsisiliortussaatitaasutut meeqqat inuusuttullu pisinnaatitaaffiisa atugarisaasalu pitsanngorsarnissaasa isumagineqarnissaannut killiliussanik pilersitsisimapput.

 

Tamanna pereermat oqartussat inatsisiliortussaatitaasut atuutsitsisussaatitaasullu akornanni suliassanik agguataarineq imaattussaavoq Naalakkersuisut atuutsitsisussaatitaasutut killiliussat aalajangersarneqareerpata suliassamik tamatuminnga kivitsisussaallutik.

 

Taamaalillunilu tamanna tunngavigalugu meeqqat illersuisuannik meeqqallu pillugit siunnersuisoqatigiiffimmik pilersitsisoqarpoq Nunatsinni meeqqat pisinnaatitaaffii pillugit suliffeqarfimmik Meeqqat Inuusuttullu Oqaloqatiginnittarfiannik pilersitsinissamik Inatsisartut aalajangernerat tunngavigalugu.

 

Ulloq 27. maj tusagassiorfinnut nalunaarutinnut tungatillugu Nuuk TV-mi nutaarsiassanut oqaatigaat Inuusuttut Inatsisartuinik taallugu aaqqissuussisarneq "oqaasiinnaasoq", uparuarlugulu atuarfimmi nerisitsisarnerup eqqunneqarnissaa eqqarsaatigalugu Inatsisartut meeqqanik inuusuttunillu tusarniaasimasariaqaraluartut, Inatsisartulluunniit suut nerineqartarnissaannut sunniuteqarsimasariaqaraluartut, pissusiviusut atuuttut uniorlugit ilisimasatillu sipporlugit isummersorputit.

 

Inuusuttut Inatsisartuinik taallugu aaqqissuussisarneq atuarfinni atuartunut angajullernut nalinginnaasumik atuartitsinermut atatillugu asuliinnaanngitsumik aaqqissuulluakkamillu neqeroorutaavoq, taamaallaallu isigineqassalluni Inatsisartut ataatsimiittarfii tikillugit ulluni marlussunni naalakkersuinermik suliaqarnermik misiliinissamut neqeroorutitut.

 

Taamaaqataanik aamma Folketingimi Islandillu inatsisartuini althin-gimi aaqqissuussisoqartarpoq, inuusuttut periarfissinneqartarlutik ulloq ataaseq qinikkatut sulinermik misiliinissaminnut.

 

Inuusuttut isumaqalersinniarneqarneq ajorput taanna aqqutigalugu naalakkersuinikkut immikkut sunniuteqarsinnaanissaminnik. Tamanna ilisimallugulu piareersimaffigereertarpaat, tassalu inuusuttut inatsisartuinut peqataaneq nalinginnaasumik atuarfimmi atuartitaanerminnut atatillugu neqeroorutaasoq innuttaasut oqartussaaqataanerata ulluinnarni qanoq ingerlanneqartarneranik paasisaqarnerunissamut.
 

Taamaattumik malugeqqussavara Naalakkersuisut ataanni suliffeqarfinnik suliniuteqarfinnillu arlalinnik pilersitsisoqarsimammat meeqqat inuusuttullu oqariartuutaat tusaaniarneqarsinnaaqqullugit isumaallu naalakkersuinikkut oqartussanut apuunneqarsinnaaqqullugit.

 

Taaginnarsinnaavakka Meeqqat Illersuisuannik Meeqqallu pillugit Siunnersuisoqatigiinnik pilersitsisimaneq, Nakuusamik suliniut, MIPI, soorlu aamma Sorlak piusoq. Taakku tamarmik pilersinneqarsimapput meeqqat inuusuttullu naalakkersuinermik sulialinnut sunniuteqarsinnaanermut periarfissaasa isumagineqarnissaat siunertaralugu.

 

Tamatuma saniatigut aamma puigortariaqanngilarput atuarfinni tamani nunarput tamakkerlugu atuarfinni siulersorpassuaqarmat atuartullu siunnersuisoqatigeeqartiterlutik. Taakku aqqutigalugit meeqqat inuusuttullu aamma periarfissatik atorsinnaavaat tusaaniarneqarnissamut, assersuutigalugu atuarfinni nerisaqartinneqarnermut isummat kissaatillu eqqarsaatigalugit, naak tamanna tusagassiorfinnut nalunaarutinni suliassatut Inatsisartut isumagisassaattut innersuussutigigaluarit.

 

Suliassaq tamanna kommunit tamakkiisumik oqartussaaffigaat, taamaattunillu Inatsisartuniigani.

 

Taamaattumik isumaqarpunga meeqqat inuusuttullu isumaat tusarneqarsinnaaqqullugit periarfissanik atugassarititaasunillu pitsaasunik nunatsinni pilersitsisimasugut. Naatsorsuutigaaralu susassaqartut taaneqartut taakku ulluinnarni sulinerminni meeqqat inuusuttullu isumaannik naalakkersuinikkut aalajangiisartunut ingerlatitseqqiisarnissaq qularnaartaraat.
 

Naggasiullugu Inuusuttut Inatsisartoqartinneqartarnerannik Inatsisartut siunertaat pillugu sukumiinerusumik paasissutissinneqarnissannut qaaqqorusuppakkit, maluginiarakku Meeqqat Inuusuttullu Oqaloqatiginnittarfiata suliniuteqarfissatut nalunaarsugaani meeqqat inuusuttullu akuliutitinneqarnerannut tunngasuni Inuusuttut Inatsisartuinut meeqqanik inuusuttunillu peqataatitsinissaq ilaatinneqarmat.

 

Tamanna peqatigalusi sukumiinerusumik oqallisigisassaqqippoq tassunga naatsorsuutigisat akunnitsinni naleqqussarsinnaaniassagatsigit, tassami Inuusuttut Inatsisartuinik taallugu aaqqissuussisarneq ilisimaneqartutut Inatsisartut oqartussaaffigisaannik pilersaarusiorneqarlunilu ingerlanneqartarmat atuarfiit qanimut suleqatigalugit.

Ikinngutitut inuulluaqquassi

Lars-Emil Johansen